Read Biete EZEKIELA 27 Bible Online

EZEKIELA 27 - Biete bible

EZEKIELA 27

¹PUMAPA khan a ne sôn a,

²“Famthei miriam, Tura sûnna lâ sak roh.

³Tuikhanglian kotsuaa khopui iom, tuikhanglian rikama om murdihei neh rivai itho ngaitu ziangah Pumapa PATHIAN khan hingka hin a ti ti roh: “O Tura, ne enhoi rikipna kha ni song ngai a.

⁴Tuipui rikama om ni nit a, Nang indingtuhei khan rikuang enihoi tak angkan nang an siam a;

⁵Hermon tlâng ifâr thinghei an mang a, Ni puanzâr ngul rangin Lebanon tlânga sidar thing an imang a nit.

⁶Vaitha rangin Basan ram saso thing an lâk a, Iṭuang rangin Kupra ram ata ifâr thingphêk, Saiha phûm kha an mang a.

⁷Aigupta puanṭial enihoi tak chu, Rikuang ithli puanzârin ni mang a, Ilah taka rithok khomin indang thei zel a nit. Ni chunga zar chu puan iṭhatak a nit a, Elisha tuihual puan duk neh senduk a nit.

⁸Sidon neh Arvad [20] mihei chu vaithapuhein ni mang a Ni mithiamhei ngêi khah rikuangpuhei an nit.

⁹Gebal [21] kutthiamhei kha rikuang isiamtuhei an nit. Tuikhangliana rilong rikuangpu murdi kha, Ni ta ranga rivai mi korong an nit.

¹⁰“Persia mihei, Ludia mihei neh Libia [22] mihei chu ni sipai lômah an ṭang a, ni sipai inheiah khan iphohei neh dâr lukhumhei an itâr fer fur a nit. Anni kha roinpuina nang insiltuhei an nit.

¹¹Arvad neh Heleka rithoka sipaihei khan ni kulbanghei an rung a, Gamada rithoka mihei khan ni in risânghei an ngâk a. An iphohei khah ni bangah an târ a, roinpui taka nang isiamtuhei an nit.

¹²“Tarsis ramah rivai ni tho a, ni thil zuarhei neh kâirithleng rangin tangkarua hei, thîr hei, ṭîn hei, sisâr hei an hong chôi a.

¹³Grik ram, Tubal neh Mesek hei khan nangmah neh rivai an tho a, ni thil zuarhei neh kâirithleng rangin suakhei neh dâr bêlheiin an hong chôi ngai a.

¹⁴Ni neinunah khan Beth Togarma a rithokin sinitho ngai sakor hei, ridoi sakor hei neh sakuartung hei ni thleng a nit.

¹⁵Dedan [23] neh nin ridôr a, tuipui rikama ram itam takka mihei khan ni thil zuar neh kâirithleng rangin saiha neh thingril idukhei nang an hong pêk ngai a.

¹⁶Suria [24] mihei khan ni thil zuarhei neh ni thil siamhei an hong richôk a, ni neinun man rangin lungmantam hei, puan senduk hei, puanzia ṭha hei, risompuan hei, tuikep lung hei, rubi lunghei an hong chôi a.

¹⁷Judai ram neh Israel ram khomin ni thil man rangin bu hei, khuaitui hei, oliv riak hei, thingnâi damdôi hei an ichôi ngai a nit.

¹⁸Damaska mihei khan ni thil zuarhei neh ni thilsiamhei an hong richôk a, a man rangin Helbon uain neh Sahar samul hei nang an hong pêk a. Thîr ritle hei, fâkinnikna namhoihei an hong chôi ngai a.

²⁰Dedan mihei khan sakor chunga ṭhungna puanhein ni neinunhei an hong thleng a.

²¹Arab mihei neh Kedar rênghei khan berate hei, bera hei neh kêl hein ni thil zuarhei an hong richôk a.

²²Seba neh Rama rivaimihei khan lungmantam hei, rângkachak hei, fâkinnikna namhoi iṭha chihein ni neinun zuarhei an hong richôk a.

²³Haran hei, Kana hei neh Eden kho mihei chu, Sebaa rivaimihei neh Asur neh Kilmad kho mihei murdi nangmah neh ridôr ngai an nit.

²⁴Puan roinpui hei, puan senduk hei, puanzia ṭha hei, ṭuangdâp puan enihoi hei, pat iphiar neh pat irual enihoi tak takhei nang an inrichôk a.

²⁵Tarsis rikuanghei khan ner vaithil neinun kha an pêl ngai a. “Neinun itam takka pêl, Tuikhanglian rikuang angkah ni nit.

²⁶Ni vaithapuhei khan tuikhanglian rizat takah nang an infe a, Khosak ithli khan imuang ata ilah takah nang ai sêm isiat tâk a nit.

²⁷Ner chongna, neinun murdihei, ner kuangpuhei murdi, Ner kuang isiamthiamhei neh ner vai mihei, Ner kuang vêngtu sipai murdihei neh, Rikuanga chuang murdihei kha, Tuikhanglianah an rimang riai tâk a.

²⁸Rikuangpuhei rilônthing khêk irî khah vakôl arkhông a.

²⁹Rikuang tin tin imarakin a om a, Rikuangpuhei neh vaithapuhei murdi vakôlah an rot tâk a.

³⁰Nangma sikin an ṭap ngûi ngûi a, Pilvut an riphul a, rinêngah an itâl ṭian a.

³¹An luhei an mêt inkol a, borapuan an sil a, Ngaisiatin an ṭap a, lung inah takkan an irung a.

³²Ni ta rangin ṭâ la isam an ta: Tura angkana hih tu dang im â om rang tâk? Tuikhanglian nuai inthûk taka rinîk val tâk hi! tîng an ti.

³³Ner vai mihei khan tuikhanglianah, Izuar rua neinun an itol zut zut a, Nam tinhei ilung nen tluk ngai. Ni neinunhei sikin rênghei kha richongin nî siam ngai a nit.

³⁴Atûn chu tuikhanglianah ni siatchit tâk a, Ân thûkna takah ner nîk tâk a, Ni neinunhei neh ni sin itho ngaihei chu, Tuikhanglianah ner nîkpui tâk.

³⁵“Mi tin tuipui rikama om murdihei kha nangma sikin an ringai arkhêl a. An rênghei tena khom an chungmul a thoi a, an ṭizia kha an mêlah khan a îlang suak a nit.

³⁶Ni irmang a nit tâk, kumkhuaka rangin ni irmang tâk a nit; rammual pumpuia rivaimihei chu rilônthingin an sip tâk a, ni siatna tong nang itlângpui rang khah an iṭi titak a nit.”