Read Biete EZEKIELA 28 Bible Online

EZEKIELA 28 - Biete bible

EZEKIELA 28

¹PUMAPA khan a ne sôn a,

²“Famthei miriam, Tura rêng ziangah khan Keimah, Pumapa PATHIAN thusuak hih iril roh. Ner pâk a, pathianin ner be a, tuikhanglianah pathian angkan rêngṭhungmunah ki îṭhung a nit ni ti a. Pathianin ribe khom inla, famthei miriam ringot bang kêng nî nit.

³Daniela [25] nêka vâr ual, ni maah îte rithup thei inon ni irbe a nit.

⁴Ni vârna neh ni kutthiam khan rângkachak neh tangkarua nei intamin richongin nang ai siam tâk a nit.

⁵Rivai ni thonaah ni hong inṭum a, ni hong richong tâk sikin ni lungril a hong irpâk tâk a nit.

⁶“Khasikin, Keimah, Pumapa PATHIAN hin kî ti a nit: Pathian dôra vâra ner be sikah khan;

⁷ni mêlriatloi, nam nunter, nangma doi rang ki hong iṭhui rang a nit. An khandaihei ilek an ta, ni vârna neh ni kutthiamna sika ni îsua thil enihoi tak takhei kha an hong îsiat chit rang a nit.

⁸Khurmongboiah nang iṭhul an ta, sâr thin tuiah thîng ni ti.

⁹Nang ithat rang an hong tenan pathianin ni la irbe thei mai rang mani? Nang ithat ranghei kutah khan chu famthei miriam pai ni nit a, Pathian ni tlak mak cheh.

¹⁰Ram dang mi pathian nei inohei kutah ui angkan nî thi rang a nit. Keimah Pumapa PATHIAN hin thu kî pêk tâk a nit.”

¹¹PUMAPA khan a ne sôn nôk a,

¹²“Famthei miriam, Tura rêng chungah siatna a hong tlung rang sikin ngaisiatin om roh. Keimah, Pumapa PATHIAN thu suak hih ani chu iril roh: Ṭhatrikip enton rua ni lei hong nit ngai a. Vârna neh mêl ṭhatnaa rithluk ni lei nit ngai.

¹³Pathian rikul Edenah ni lêng a, lungmantam chi tinrêng, lungilu hei, topaz hei, beril hei, karnelian hei, Jaspar hei, safir hei, emeral hei neh garnet hein ner tluk ngai a. Rângkachaka siam thil ilu rivonahei ni nei a, khahei khah nen zir nî-a rithoka ni ta ranga siam an nit.

¹⁴Kha munah khan nang irung rangin Cherub ki sia a. Ke tlâng [26] rithiangah khan ni om a, lungilu ritle lâiah nî lêng a nit.

¹⁵Thil isual ni tho mâkah kha chu demnaboi ni nit a.

¹⁶Thil richo neh izuar ni buaipui titak a, hi thilhei hin mi tôksola nang isiamin, sualah nang a ṭhui inlût tâk a. Khanchu, ke tlâng rithiang chu imah rangin nang ki tir a, nang irungtu Cherub khan lungilu ritle lâia rithokin nang a ûmisua tâk a.

¹⁷Ni mêl ṭhat khah ner pâkpui a, ner ming inthangna khan invêt angkan sin nang a întho tâk a nit. Hi sik takah hin rinêngah nang ki pai a, rêng danghei ridînna rangin nang kî mâk tâk a nit.

¹⁸Ner vai thonaah lepinrûk ni song sikin ni mun rithianghei tena khom porinchen ai om tâk a nit. Khasikah khan khopuiah mei isuang ki ta, kî hâl inrivâm vang rang a nit. Nang ithlîrtuhei mitmuah meirivâm nang ki închang rang a nit.

¹⁹Ni irmang a nit tak, kumkhuaka rangin ni irmang tâk a nit, nam tin ni thurchi riahei murdi khah rilônthingin om an ta, ni siatna tong khah nang itlângpui duai an ti iti an iṭi titak a nit.”

²⁰PUMAPA khan,

²¹“Famthei miriam, Sidon tiang ngat inla, demna thu inpuang roh.

²²Keimah, Pumapa PATHIAN thusuak hih khantaka mipuihei khah iril roh: O Sidon, ne râl ki nit hih, ni chunga ki sintho sikin mihei khan ne chôiinrisâng an ti. Ni sunga omhei kuttum itho a, ker thiangzia ken lang tenan chu keimah hi PUMAPA chu ki nit iti riang an ti.

²³Ni chungah ripui hong inlêng ki ta, ni kotsuaheiah thisen luang a ti. Kil tinah khandaiin nang doi an ta, ni mihei chu that an ti. Khanchu, keimah hi PUMAPA chu ki nit iti reh tâng ni ti,” a ti a.

²⁴PUMAPA khan, “Israelhei rangin, an kôlvêla om nam dang iom, anmani musittuhei chu, sûlrilingnei neh sâisorling angkana â sun ngaitu ni khâi no nia, keimah hi PUMAPA chu ki nit iti riang an ti,” a ti a.

²⁵Pumapa PATHIAN khan hingka hin a ti: “Nam tinhei lâia ke chekindarna muna rithokin Israel mihei chu hong ṭhui ikhîr nôk ki ta; khanchu, nam tinhei khan ker thiangzia reh tâng an ti. Ke som Jakoba kî pêk an ram ngêiah khan Israel mihei chu om tâng an ti.

²⁶Râlringam riamkan amakhan om an ta, inhei sin an ta, grep bilhei siam an ti. An kôlvêla om, anmani musittuhei kha kuttum ki tho tenan, Israel mihei chu râlringam takkan om an ti. Kha tikin chu keimah PUMAPA hi an PATHIAN chu ki nit iti riang an ti.”