Read Biete EZEKIELA 29 Bible Online

EZEKIELA 29 - Biete bible

EZEKIELA 29

¹Suaka kin itâng a kum sômna, a thla sômna, a sûn sômleiiniknî-ah khan PUMAPA khan a ne sôn a.

²“Famthei miriam, Aigupta rêng chu rikôk roh. Amah neh Aigupta ram pumpui chu kuttum an ituang rang a nit iti thu iril roh.

³Pumapa PATHIAN khan Aigupta rêng iril rangin hingka hin a ti: Nangmah Aigupta rêng, Ole lian, Nail dunga om ngai Faro, ne râl ki nit tâk. ‘Nail dung chu ki ta, kî siam a nit,’ ni ti a.

⁴Ner kamah rikuai rithil ki ta, ni lipah vadunga ingahei khah ikhop ki ta; Nail dunga rithokah khan vadung inga ni lipa kophei neh khan nang kâi isuang ki ti.

⁵Ramchârah nang pai ki ta, nangmah neh ingahei khah rinêng ichârah itâl ṭian nin ti. Tutên nin ruak khah phûm no nia, chungavuang ivahei neh nuaia ramsahei bu rangin kî pêk rang a nit.

⁶Khanchu, Aigupta mi murdîn keimah hih PUMAPA chu ki nit iti riang an ti.” PUMAPA khan a ti, “Nangmani Aigupta mihei chungah Israel mihei khan ṭangpuitu rangin an ringat ngai a; khanniseh, lâiluang angkah pai nin nit.

⁷Nang an rinêl a, ni kiak pêk tâk a; an izaknuai ni sun pêk a, an kong an înri-el tâk a nit.

⁸Khasikin, Keimah, Pumapa PATHIAN hin kî ti a nit: Ringai roh, ni chungah khandai ilek ki ta, ni mihei neh ni ranhei kî that riai rang a nit.

⁹Aigupta ram chu isehchitin, ram vang tâng a ti. Khanchu, keimah hi PUMAPA chu ki nit iti reh tâng ni ti. “‘Nail chu ki ta a nit a, kî siam a nit,’ ni ti sikin,

¹⁰Aigupta neh Nail dung chungah ki kut ki îṭhum rang a nit: Aigupta ram pumpui mâr tiang Migdol khopuia rithokin sim tiang Aswan [27] khopui idên, Ethiopia ramrî dênin îsehchit ki ta, mun irongin om a ti.

¹¹Kum sômilika sung chu miriam khom ramsa khom rilong khâi no nia, îte lêng khâi no nih.

¹²Kum sômilika sung Aigupta ram chu rammual pumpuia ram iseh takin siam ki ta, khopuihei khah khoram titakin om a ti. Aigupta mihei chu nam dang lâiah ichekindar ki ta, ram tinah lâizâm ithon rithekindar an ti.”

¹³Pumapa PATHIAN khan hingka hin a ti: “Kum sômilikah a hek tenan chu an rithekindarna nam tinhei lâia rithokin Aigupta mihei chu hong ṭhui ikhîr nôk ki ta,

¹⁴an insiangna ram ngêi, Aigupta ram sim [28] tiangah khan om nôk an ta, kha munah khan rêngram rizal tak nîng an ti.

¹⁵Nam danghei rêng rêng nêkan arzal tak nîng an ta, nam dang chungah risong khâi no nia, tu nam chungah khom thu nei khâi no nih.

¹⁶Israelhei khan tiklâi khomin ṭangpui rangin ni chungah ringat khâi no nih. Aigupta vânduaina khan an chunga ringat â diknozia Israelhei khah inreh suak nôk ngai a ti. Khanchu, Israelhei khan keimah hi Pumapa PATHIAN chu ki nit iti reh tâng an ti.”

¹⁷Suaka kin itâng kum sôminikah kum sarina, a thla masa sûn masatakah PUMAPA khan a ne sôn a,

¹⁸“Famthei miriam, Babilon rêng Nebukadnezara khan Tura doi rangin sipai itam takkah a ṭhui a, an puak a rik sikin an lusîp a kol a, an dâr arlông a; khanniseh, rêng neh sipaihei khan an sôl man îte mu mak e.

¹⁹Khasikin, atûnah hin keimah, Pumapa PATHIAN hin kî ti a nit: Aigupta ram chu rêng Nebukadnezara kutah kî pêk a nit. Ani khan irok infâi riai a ta, Aigupta ram richon murdi kha a sipaihei thalo rangin chôi vang a ti.

²⁰Ki sin an tho sikin Aigupta ram hih kî pêk a nit a. Keimah, Pumapa PATHIAN hin kî ti a nit.

²¹“Amakhah a tlung tenan chu Israel mihei kha inrât ki ta, nangmah Ezekiela hi an lâiah nang an riat theina rangin thu nang inril ki ti; khanchu, PUMAPA chu ki nit iti reh tâng an ti.”