Read Biete EZEKIELA 3 Bible Online

EZEKIELA 3 - Biete bible

EZEKIELA 3

¹Pathianin, “Famthei miriam, ama lekhabuzuat hih fan la; khanchu, fen la, Israel mihei ziangah thu va sîr roh,” a ti a.

²Khanchu, ki bâi ki âng a, lekhabuzuat khah a nen fâk tâk a.

³Ani khan, “Famthei miriam, ama lekhabuzuat nang kî pêk hih fan la, ni khop kan fah roh,” a ti a. Khanchu, ki fâk a, khuaitui angkah takin a thlum a.

⁴Khanungchu, Pathianin, “Famthei miriam, Israel mihei ziangah fen la, nang ki îril murdi hi va ril roh.

⁵Nam dang, nî riat ino ṭong dang imang nam ziangah nang tir mang a, Israel insungkuahei ziangah kêng nang kî tir ai nit.

⁶Nam ilian, nî riat ino ṭong dang imanghei ziangah nang kî tir ni sela chu ni thu sîr an lei ringai khom a nit thei.

⁷Khanniseh, Israel mihei hin chu ni thu ringai no nih; ki thu khom an irngai nuam ngai ino a nit. An rêngkan mi tuklulilian neh helâkloi an nit.

⁸Atûnah hin nang khom anmani angkah takin mi tuklulilian neh mi lungril ikhirin nang siam ki ti.

⁹Lungpui angkah taka det, lungilu angkah taka khirin nang siam ki ti. Rihel irât tak ni khom seh, anni chu ṭi non la, an makungah indôp no roh,” a ne ti a.

¹⁰Pathianin ki ziangah thu â sîr mai a, “Famthei miriam, ki thu nang iril hih iṭha takkan ringai inla, vong mai roh.

¹¹Thoi inla, ni chipui, bôia tânghei ziangah fen la, an ringai nuam le an ringai nuam no le khom an zianga, Keimah, PUMAPA Pathianin iril ranga kî ti hih anni chu iril roh,” a ne ti a.

¹²Khanchu, Pathian rithla khan a ne dom a, ke nungtiangah khan, “PUMAPA, roinpuina chu rivân chungah khin inpâk rei,” itia rôl iring takka khêk kha ki riat a.

¹³Thiliring ilika rithla môr ritôn phâk chakka an vuang irî neh tâli tlân irî vung vung khom kha ki riat a.

¹⁴PUMAPA rithla ritha khah ki chungah a zuang tlung a, a ne ṭhui tâk a. Ke lung hoi mak a, ningthiknan ki sip a. Khanniseh, PUMAPA kut irât khah ki chungah a om mai a.

¹⁵Khanchu, Kebar vadung rikam, Tel Abib muna om bôia tânghei ziangah khan a ne ṭhui a. Amakhan sûn sarikah sar ki om a, kî muhei neh kî riathei khan lungbuai an ne sak ok a.

¹⁶Sûn sarikah a thleng tenan chu PUMAPA thu ki ziangah a zuang tlung a.

¹⁷“Famthei miriam, Israel nam pumpui irungtun nang kî phun a nit. Riningna thu nang kî pêk murdi Israelhei ziangah ne thlun ngai rang a nit.

¹⁸Keiman, mi sual chu ai thi ngêt rang a nit ki ti a, nangman kha mi khah a ringna inzôka a om theina ranga a thil isual tho khah rilet ranga ne ril non chu, kha mi khah a sual sikah khan thi ngêt a ta; khanniseh, a thina chunga rinangna chu ni chungah ki irngat rang a nit.

¹⁹Kha mi sual khah ni ril a; nikhomsela, a sualna rilet nuam loia â sual maiin chu a sualna sikin thîng a ta; khanniseh, nang chu a thinaah khan rinangna îte nei no tin e.

²⁰“Mi dik khom, nung ritolin thil isual tho sela, dingmun inrît takah ki sia a; nangman ni ril non chu ai thi ngêt rang a nit. A sual sikin thîng a ta, a thil iṭha tho ngaihei khan rifena îte nei khâi no nih; a thina chunga rinangna chu ni chungah ki irngat rang a nit.

²¹Mi ṭha kha sual tho loi rangin ni ril a, thil isual a tho non chu ni rilna â pom sikin kha mi khah ring ngêt a ti. Khante, nangma ringna khom izuan om a ti,” a ti a.

²²PUMAPA ompuina tharât khan a ne zuang itûk ngit a, ki ziangah, “Thoi inla, phâizôlah fe roh. Kha munah khan thu nang iril ki ti,” a ti a.

²³Khanchu, ki thoi a, phâizôlah khan ki fe tâk a; amakhan PUMAPA roinpuina, Kebar vadung rikama kî mu angkana kha a lei om a, rinêngah ki khupin ke lîr tâk a.

²⁴Pathian rithla khah ki sungah a zuang lût a, a nen ding a. PUMAPA khan ki ziangah “Inah fen la, insungah rikhâr khap roh.

²⁵Famthei miriam, ruia khuap khap nîng ni ta, mipui lâiah nî suak thei khâi ino rang a nit.

²⁶Ne lei nang inkhir pêk khap ki ta, ṭong thei khâi no tin a, rihel irât mihei kha nî ril thei khâi ino rang a nit.

²⁷Khanungchu, ni ziangah thu ki ril nôk tenan ni bâi chu iong nôk ki ta, Keimah, Tinrêngthothei PUMAPA hin iril ranga thu nang kî pêk khah an ziangah ni îsîr rang a nit. Ṭhenkan ringai an ta; khanniseh, ṭhenkan chu nang ngaisak no nih, anni chu rihel irât nam an nit a,” a ti a.