Read Biete EZEKIELA 30 Bible Online

EZEKIELA 30 - Biete bible

EZEKIELA 30

¹PUMAPA khan a ne sôn nôk a,

²“Famthei miriam, thu inpuang inla, Keimah, Pumapa PATHIAN thusuak hih iril roh. Hi thu hih thang nen thei rang a nit: “Nikhua inrît chu a hong tlung thiai tâk e!

³Nikhua a hong nâi tâk, PUMAPA nikhua a hong nâi tâk e! Nam tin rang sûm zîng nî neh buaina nî chu.

⁴Aigupta ramah ridoina suak a ta, Ethiopia ramah lungzîng inkhôkna om a ti Aigupta ramah mi itam takkah thîng an ta, Ram richongna chu irokin om a ta, An ringatna chu isehchitin om a ti.

⁵“Kha ridoinaah khan Ethiopia hei, Ludia hei, Libia, Arabia hei, Kub hei ata sipai lôm a îruaihei kha thîng an ta, ki mihei tena khom thi sâng an ti.”

⁶Pumapa PATHIAN khan hingka hin a ti: “Mâr tiang Migdola rithokin sim tiang Aswan idênin Aigupta ram indingtuhei chu ritukbualah thîng an ti. Aigupta risongpuina sipai lôm khom rimang vang an ti. Keimah, Pumapa PATHIAN hin kî ti a nit.

⁷Ram chu rammual pumpuia mun inthim tak chang a ta, a khopuihei khom khoram natinsat tak nîng a ti.

⁸Aigupta ram ki hâl inrivâm a, â rungtuhei ki that inrimang riai tenan chu keimah hi PUMAPA chu ki nit iti riang an ti.

⁹“Kha nikhua khah a hong tlung a, Aigupta inrimang zoi a nit tenan chu lungrinîk riama om Ethiopia mihei iṭhông rangin rikuangin thangkoitu tir ki ta, Aigupta ram angkan an rithla thla dipin om a ti. Kha nikhua khah a hong itlung lôk lôk tâk a nit.”

¹⁰Pumapa PATHIAN khan hingka hin a ti: “Rêng Nebukadnezara kut imangin Aigupta richongna ki înmong rang a nit.

¹¹Amah neh a sipai nunterhei, ram chu mangsang inchang rangin hong an ta, Aigupta mihei chungah khandai ilek an ta, ram pumpuiah ruak itâl dûl a ti.

¹²Nail dung chu inkang ki ta, Aigupta chu mi ṭhanohei kutah pêng ki ti. Nam danghei khan ram pumpui kha isehchit an ti. Keimah, Pumapa PATHIAN hin kî ti a nit.”

¹³Pumapa PATHIAN khan hingka hin a ti: “Memfis khua mirmilhei neh pathian dikino chubai an iûn ngaihei khah isehchit ki ti. Aigupta rama roiirêl rang tute om no nia, a mipuihei chu thlavâi sak ki ti.

¹⁴Aigupta sim tiang ram chu mangsangin siam ki ta, mâr tianga om Zoan khopui khom kî hâl rang a nit. Thebeshei khopui chu kuttum thông ki ti.

¹⁵Sin khopui, Aigupta kul roinpui sungah khan ki ningmur iṭhum ki ta, Thebes khopui richongna chu inboi vang ki ti.

¹⁶Aigupta ram chu hâl inrivâm ki ta, Sin khua chu lung âminvâiin ai om rang a nit. Thebes kul banghei chu chim a ta, a khopui chu tui ilianin dîl a ti.

¹⁷Heliopolis neh Bubastis khua tlangvâlhei chu ridoinaah khandaiin thîng an ta, mi danghei chu bôia ṭhui nîng an ti.

¹⁸Aigupta râtna ke siat a, an kulpui idet an risongpuina kha ke sim tenan chu Tapanhes khua khah izîng richelin zuang ibô a ti. Aigupta ram chu sûm izîngin rikhû khap a ta, a khopuia mihei chu bôia ṭhuiin om an ti.

¹⁹Aigupta kuttum ki tho tenan chu keimah hi PUMAPA chu ki nit iti reh tâng an ti.”

²⁰Suaka kin itâng kum sômleikhatna, thla khatna, a sûn khatnin, PUMAPA khan a ne sôn a,

²¹“Famthei miriam, Aigupta rêng Faroa bân chu ki îkhiak pêk tâk a nit, a dam theina rangin tuam mak a, khandai â lek nôk theina rangin tute arzang pêk omak e.

²²Khasikin, atûnah hin keimah, Pumapa PATHIAN hin kî ti a nit: Keimah hi Aigupta rêng irâl ki nit tâk a. Â bân kiang ruaikan, â ṭha neh a lei ikiak tak khom khah ikhiak seng seng ki ta, a kuta rithokin khandai kha ṭul a ti.

²³Aigupta mihei chu nam tin lâiah ichekindar ki ta, ram tinah rithekindar an ti.

²⁴Khanchu, Babilon rêng kut kha inrât ki ta, a kutah ki khandaihei pêng ki ti. Khanniseh, Aigupta rêng ibânhei chu ki îkhiak rang a nit a, â râlhei makungah khan sâbe tuangin irung a ta, ai thi rang a nit.

²⁵A nit, ani chu ritha rizalin siam ki ta, Babilon rêng ritha chu inrât ual ual ki ti. Ani kha ki khandai ki pêk a, Aigupta chungah â lek tenan chu mi tinin keimah hiPUMAPA chu ki nit iti reh tâng an ti.

²⁶Aigupta mihei chu nam tin lâiah ichekindar ki ta, ram tinah rithekindar an ti; khanchu, keimah hi PUMAPA chu ki nit iti reh tâng an ti.”