Read Biete EZEKIELA 31 Bible Online

EZEKIELA 31 - Biete bible

EZEKIELA 31

¹Suaka kin itâng kum sômleikhatna, thla thumna, a sûn khatnin PUMAPA khan a ne sôn a,

²“Famthei miriam, Aigupta rêng Faroa neh a mihei ziangah hingka hin ti roh: “Ni roinpuizia chu ingka takin im ken rikhek rang tâk?

³Lebanon tlânga sidar angkah ni nit a, Iṭang ribuk vung, dâilîm ihoitak inei a, Arzîk thangvân [29] isun chu.

⁴Ân thuartu rang tui a tam a, Rinêng ril tuihei khan a îfa inlian a nit. A ṭoina kha ân rizil pêk a, Rampuia thing tinrêng ifâ rangin a luang a.

⁵Iṭha takka tui a khop sikah khan, Thing danghei nêka inzâi ualin a thuar a, Â ṭanghei khom an irolin an sei a.

⁶Chungavuang iva chi tinin â ṭangah ribu an kâi a; Ramsahei khan a dâilîm nuaiah an intêt a; A dâilîmah khan rammuala nam tinhei an ringam ngai a.

⁷Thingkung khah â en a hoi tak tak a, Ân zâi ṭhat a, â ṭanghei khom ân bûrlûp a, Arzunghei kha rinêng ril tuinâr iringah ai kâi a nit.

⁸Pathian rikula sidar thing lâiah ama tluk zel omak a, Ifâr thinghei lak ama tluka â ṭang ribom omak a, Ithên thing khom khangkah dôrah chu inṭang ngai mak. Pathian rikula thinghei khah khangkah taka enihoi omak e.

⁹Â ṭang ribom vung enihoi takkan kî siam a nit. Pathian rikul, Edena thing tin tinin an ithîk a nit.

¹⁰“Khasikin, atûnah hin Keimah, Pumapa PATHIAN hin kî ti a nit: Kha thing khah a hong thuar dur dur a, arzîk khan sûmhei ten a sun tâk sikin arpâk tâk a;

¹¹khasikin, kî heng tâk a nit; ram dang rêng ziangah pêng ki ta, a thil isual tho lam angkah takin a chungah hong tho tâng an ti.

¹²Nam nuniter tak takhei khan hong iphûr an ta, a ṭhuampui neh â ṭanghei kha itlângheiah neh varuamheiah rithek a ti. A dâilîma lêng ngai namhei kha rithekindar an ta, an irot vang rang a nit.

¹³A thluangzâlah khan ivahei chu hong fûng an ta, â ṭanghei khah ramasahein sirpol an ti.

¹⁴Khanchu, atûna rithokin tui ṭhatna muna thing rêng rêng, ama tluka thuar neh inzâi, arzîk sûm isuna ding om nôk khâi no nih. Miriamhei angkana thi rang neh mithi khua fe riai rangin an rêngkan kî ti tâk a nit.”

¹⁵Pumapa PATHIAN khan hingka hin a ti: “Seolah a ṭul nikhuan chu rinêng nuai tui kha ama sûn nan inringam ki ta, vadungpui iluang inmong ki ta, vatedunghei â luang suak om no nih. Thing kha a thi tâk sikin Lebanon tlâng chu izîng hong inrikhû ki ta, rampuia thing murdi ki înthêm vang rang a nit.

¹⁶Seolah ki nam iṭhul nikhuan chu a ṭul irî-ah khan namhei chu inîng an ti. Eden rikula thing murdi neh Lebanon tlânga thing iṭha ṭha, tui tamnaa mông, rinêng nuai khura lei itla tâkhei khah rinêng nuai khurah a tlâk sa tâk sikin lôm an ti.

¹⁷Khandaia an isât thathei lâia om sa rangin mithi khua tiang munkan fêng an ta; a dâilîma om ngaihei chu nam tin lâiah indar an ti.

¹⁸“Thingkung chu Aigupta rêng neh a mihei an nit. Eden rikula thinghei ilua ama dôra inzâi neh riming inthang an iom ino a nit. Khanniseh, Eden thinghei angkan atûn chu khandaia that, sertan inohei lâiah khan mithi khuaah ai om rang tâk a nit,” Pumapa PATHIAN thu suak khan a ti.