Read Biete EZEKIELA 32 Bible Online

EZEKIELA 32 - Biete bible

EZEKIELA 32

¹Suaka kin itâng kum sômleiinikna, thla sômleiinikna, a sûn masatakah khan PUMAPA khan a ne sôn a,

²“Famthei miriam, Aigupta rêng chu rilna ṭong ikhir tak pen la, hi thucha hih ani chu iril roh: Nam tin lâiah sakeibaknei vânglâi angkah ni nit a; nikhomseh, tuipuia Ole, vadunga om angkah kêng nî nit ual, tui kha ni ken ne per a, ni înrinok riai tâk a nit.

³Nam itam takkah an hong ribûm tikin, ki lên zar ki ta, lêna ne ôk tenan chu imuangah nang kâi isuang ki ti.

⁴Rinêng ichârah nang pai ki ta, nang ifah rang chungavuang ivahei neh ramasahei hong ṭhui ki ti.

⁵Ni ruak ithu tâk khah itlânghei neh varuamheiah thekindar ki ti.

⁶Itlânghei ni thisen indîl ki ta, vadunghei chu thisenin sip a ti.

⁷Nang kên rimang tikin chu rivân khi rikhûng ki ta, ârsihei ki înzîng rang a nit. Inî chu sûmin rili a ta, ithla khom â vâr isua no nih.

⁸Rivâna ivâr iom murdi inzîng riai ki ta, ni ram chu zîng richel khap a ti. Keimah, Pumapa PATHIAN thu suak hin kî ti a nit.

⁹“Ni siat rimang thu ki thanginthei tenan chu nam itam takkah an rithla ivâi a ta, nî riat ngai ino rama omhei khom an ilung buai a ti.

¹⁰Ni chunga ki thiltho hin nam itam takkah lungzîng sak a ta, ki khandai ke lek tenan chu rênghei chu iṭin inthing an ti. Ne lîr nî takin chu mi tin ithi rang iṭin an rilo inthing a ti.”

¹¹Pumapa PATHIAN khan Aigupta rêng ziangah hingka hin a ti: “Babilon rêng khandai nî tuang rang a nit.

¹²Ni mihei chu nam nunter takhei sipai inthat ki ti. Ni mi murdi neh ni thil songkolôihei chu isehchit an ti.

¹³Tui tamna muna ni ran ilênghei chu that riai ki ti. Miriam manih, ran manih khom tui inrinok nôk rang om khâi no nih.

¹⁴Ni tuihei chu thling rithiang langin in-om ki ta, vadunghei khom idamzankan inluang zan zan ki ti. Keimah, Pumapa PATHIAN thu suak hin kî ti a nit.

¹⁵Aigupta ram chu inram ki ta, a sunga mi omhei murdi ki that riai tikin chu keimah hi PUMAPA chu ki nit iti reh tâng an ti.

¹⁶Hi rilna ṭong ikhir tak hih sûnna lâ chang a ta, nam tina nupanghein Aigupta neh a mihei sûnna lâ rangin lasak an ti. Keimah, Pumapa PATHIAN hin kî ti a nit.”

¹⁷Suaka kin itâng kum sômleiinikna, thla khatna, a sûn sômleiringa nî-ah khan PUMAPA khan a ne sôn a.

¹⁸“Famthei miriam, Aigupta mihei ta rangin ṭap roh; nam dang irât tak tak, mithi khua lei ife tâkhei ziangah infen la, an ziangah hingka hin ti roh:

¹⁹“Tu mi dang nêkan im nin iṭhat ual hi? Mithi khuah fêng nin ta, Sertan inohei lâia nin izâl rang tâk a nit.

²⁰“Aigupta mihei chu ritukbuala thihei lâiah thi sâng an ta, anmani that inrimang vang rangin khandai chu ringat chak a nit tâk.

²¹Seola lei ife tâk, râlpahei neh an tianga lei iṭang râl idoi ngaihei khan Aigupta mihei chu an lei lôm a, ‘Sertan ino ritukbuala thihei chu hin an zuang tlung tâk a, hin an zâl tâk e,’ itin an ikhêk a.

²²“Amakhan Asuria khom, a mihei neh an om a, khandaia thihei thlân khan a thlân chu an rikul tûng a.

²³An thlânhei kha rinêng thuai mithi khua inthûk takah khan a om a. A mihei khah khandaia thi an nit a, an ithlânhei khan a thlân khah an irhual tûng a nit. Zoro thlengah khan chu ringmihei ram rithlavâia lei isiamtuhei an nit.

²⁴“Elam khom a om sa a, a mihei thlân khan â thlân kha arkul tûng a. An rêngkan khandaia thi an nit a, sertan loiin rinêng thuai mithi khuaah an ife tâk a nit. Ringmihei ram thlavâia lei isiam ngaihei an nit a, atûn chu khur inthûkah mualinphoi takkan an om tâk.

²⁵Elam chu khandaia thihei lâiah a zâl a, a sipaihei thlân khom arkhîlkan a om a. Sertan ino, khandaia thi korong an nit. Ringmihei ram thlavâi lei isak ngaihei an nit a, atûn chu mithi khuaah mualinphoi takkan an om tâk.

²⁶“Amakhan Mesek neh Tubal khom an om sa a, an mihei thlân khan an thlân khah arkul tûng a, sertan ino korong an nit a, ritukbuala thi korong an nit. Zoro thlengah khan chu ringmihei ram thlavâi lei isak ngai an nit.

²⁷Tianlâi râlpahei angkana marit taka iphûm lo mak a, Seolah râlthluk neh an ṭum a, an khandaihei lukhamin an mang a, an iphohei khah an takpum rikhû nan an chungah ikhup a nit. Hi mihâihei hih ringmihei ram thlavâi lei isak ngaihei chu an nit.

²⁸“Aigupta khom ritukbuala ithata om sertan inohei lâiah an la îtâl ṭian rang a nit.

²⁹“Edom khom, a rênghei neh a milianhei neh khan roinpui ok ngai khom sela, mithi khuaah khan an fe a; sertan ino, khandaia ithathei lâiah mithi khuaah an izâl dûl tâk a nit.

³⁰“Mâr tianga roirêltuhei neh Sidon mi murdihei khom amakhan an om a. An thuneina khan thlavâina an lei ithlun ngai a, atûn chu sertan ino, rituk buala thihei neh khan mualinphoi takkan mithi khuaah an ife tâk a nit.

³¹“Rituk buala thi murdihei khah Faroa neh a sipai, khandaia thihei khan an lei mun chu an lungril dam tâng a ti,” Pumapa PATHIAN thu suak khan a ti.

³²“Faroa neh a sipaihei khah ringmihei ram murdi thlavâi isak rangin lei mang khom inlang, amah neh a sipailômhei chu sertan ino, ritukbuala thihei lâia zâl rangin ithatin om riai an ti,” Pumapa PATHIAN thu suak khan ai ti a nit.