Read Biete EZEKIELA 33 Bible Online

EZEKIELA 33 - Biete bible

EZEKIELA 33

¹PUMAPA khan a ne sôn a,

²“Famthei miriam, mipuihei ziangah hingka hin isîr roh: Ram sungah ridoina ke thlunin, kha rama mihei khan an lâia mi khatkah râlvêngtu rangin phun sela,

³kha mi khan irâl an hong a mu kaneh chu mipui riningna rangin bekul a tum rang a nit.

⁴Tukhôk manin bekul irî kha an riatin taksôn no sela; riningna khah a ngaisak no sikin irâl khan hong that khom sela, a thina chunga rinangna chu amah ngirin ai pêl rang a nit.

⁵A thina khah a tuklullian sika a nit a; riningna kha a lei ngaisak no sikin ai thi a nit. A lei irngai ni sela chu ai zôk thei rang a nit.

⁶Khanniseh, râlvêngtu khan irâl ihong khah a muah khan bekul tum no sela, irâlhei khan mi tukhom hong that sela, mi sual ithi a nit khoma a thisen phuba khah râlvêngtu chungah kî lâk rang a nit.

⁷“Atûnah hin, nangmah famthei miriam, Israel nam ta rangin râlvêngtun nang kî phun a nit. Ki thu nang iril murdi chu an riningna rangin anni chu iril roh.

⁸Keiman, mi sual chu ai thi rang a nit ki ti a, khan a ringna inzôk ranga a omdânhei arlet theina rangin ne ril non chu a sualna sikin thîng a ta, a thina chunga rinangna chu ni chungah ki irngat rang a nit.

⁹Mi sual chu ni lei iril a, a sual rilet nuam loiin, a sualna sikah khan thîng a ta, nangma ringna chu izua nîng a ti.”

¹⁰PUMAPA khan a ne sôn a, “Famthei miriam, Israel insungkuahei iril roh: ‘Kin siatnahei neh kin pualoinahei khan an ne del a; khasikin, kin irzal neng tâk a nit. Ingkan im kin ring thei rang?’ an ti ngai a.

¹¹Anni chu hingka hin iril roh: Keimah, Pumapa PATHIAN hih Pathian iring chu ki nit, mi sual ithi hi ki lômlam ni mak a, a sual rilet a, ai ring hih kî nuam a nit. Mi sualhei o, rilet unla, ki tiang hong kîr nôk rei, Israel insungkuahei, ithôm nin ithi rang hi?

¹²“Famthei miriam, atûnah hin Israel insungkuahei chu iril roh: Mi ṭha khan thil isual a thon chu a thil iṭha lei itho khan inzôk thei no nih. Mi sualin a thil isual tho arletin chu intuang ni no nih. Mi ṭha khomin sual a sinin chu ring thei ual no nih.

¹³Mi ṭha kha ring ngêt a ti, ti khom inlang a sin lei thon ṭhat khah inrupin a be a, sual isin a phutin chu a thil lei thon ṭhat khah ireh mai ni khâi no nia, a sual sikah khan thîng a ti.

¹⁴Mi ṭhano chu ai thi ngêt rang a nit ti khom inlang, a sual kha arlet a,

¹⁵a lâkai ritânghei siakham kha â khîr nôk a, a thil irûkhei a pêk ikhîr a, sual isin a bâng a, a ring theina rangin ki dânhei a zômin chu thi no nia, ai ring rang a nit.

¹⁶Thil iṭha neh thil idik a tho sikin sual a lei isinhei khah remai khâi no ning a, ai ring rang a nit.

¹⁷“Ni mihei khan ‘PUMAPA thil tho hih idik mak,’ an ti a; khanniseh, an omdân khah â dik ino chu a nit.

¹⁸Mi fel khan thil iṭha tho a bâng a, thil ṭhano a thon chu a sual sikah khan ai thi rang a nit.

¹⁹Mi sual khan sual isin a bâng a, thil idik neh thil iṭha a thon chu a ringna chu a înzôk tâk a nit.

²⁰Nikhomsela, O Israel, PUMAPA sintho hih idik mak nin ti a, nin sintho lam angkah takin nin chungah roi kî rêl rang a nit hih,” a ti a.

²¹Suaka kin itâng kum sômleiinikna, thla sômna, a sûn ringa nî-ah khan Jerusalema rithoka hong irel, a hong tlung a, khopui kha irâlin an lâk tâk iti a ne ril a.

²²Kha mi hong tlung rang zânah khan PUMAPA ompuina ritha khan a ne tôn a. Atûk zîngah kha mi khah a hong tlungin chu PUMAPA khan ṭong theina a ne pêk nôk tâk a, ṭongthei loiin om khâi mang a.

²³PUMAPA khan a ne sôn a,

²⁴“Famthei miriam, Israel ram khopui irama omhei khan, ‘Abrahama, mi khâtka lua ram hih a puma ipe a nitin teh eini vâng chu mi itam takkah ei la nit a, ram pumpui chu ei ta ni ngêt a ti,’ an ti.

²⁵“Anni chu Keimah, Pumapa PATHIAN thusuak hih iril roh: Sa chu a thisen la kop ṭiankan nin fâk ngai a, mirmil chubai nin ûn a, mi thisen nin isua ngai a. Ram hih nin ta inih rangin ingkana nin irngai thei mani?

²⁶Nin khandaiah nin ringat a, thil porinche tak tak nin tho a, mahni bungtualbôm nupui nin innim a. Ram hih nin ta inih rangin ingkana nin irngai thei mani?

²⁷“Anni chu iril roh, Keimah, Pumapa PATHIAN hih Pathian iring kî nit angkah hin kî ti a nit: Khopui irama omhei kha khandaiin thîng an ti. Mun infiara omhei kha ramasahein fâng an ta, itlângah neh ipûka ribihei kha ripuiin thîng an ti.

²⁸Ram chu mangsang ichang rakkan isehchit ki ta, an râtna an isongkolôi ngai khah inmong pêk ki ti. Israel rama tlânghei chu châr titakin inchâr ki ta, tutên pâl ngam khâi no nih.

²⁹An sual porinche sika mipui kuttum ki tho a, ram chu mangsang ichanga ken ram vang tenan chu keimah hi PUMAPA ki nit iti reh tâng an ti,” a ti a.

³⁰PUMAPA khan, “Famthei miriam, ni mihei khan kul bangkôpheiah, kotbâi kôlheiah, an ritongna mun tinah ni thurchi an isîr sup sup a. Hingka hin an riril a, ‘Tho fêng ei ta, PUMAPA rithoka thucha zuang itlung la var ngai rei u,’ an ti a.

³¹Khaangkan ki mihei chu ni thu ringai rangin an hong ribûm a; khanniseh, isin ranga ni îril kha chu tho nuam mak a. An ṭongbâi chu a thlum a; khanniseh, marangṭhat bang an izong a nit.

³²La chanlamboi isak thiam tak neh seranda ât ithiam tak angkah ringotin nang an irngai a nit. Ni thuhei kha an ringai vang a; nikhomseh, ṭongbâi khatkate lua khom an izôm ino a nit.

³³Khanniseh, ni ṭong khah a hong itlung idik ngêt rang a nit a, a hong tlung tenan chu an lâiah zânthla a lei iom titak a nit iti reh tâng an ti,” a ti a.