Read Biete EZEKIELA 34 Bible Online

EZEKIELA 34 - Biete bible

EZEKIELA 34

¹PUMAPA khan a ne sôn a,

²“Famthei miriam, Israel enkoltu berapuhei idemin thu inpuang inla, keimah, Pumapa PATHIAN thusuak hih anni chu iril roh: Nangmani Israel berapuhei, nin chung ân khôk vang na! Marangṭhat bang nin zong a, nin bera chu donsui tlak ngai mak chei.

³Dût nin ina, samula siam puan nin sil a, bera ṭha tak tak nin that a, a sa nin fâk a; khanniseh, bera lômhei lak kha donsui tlak ngai mak chei a.

⁴Arzalhei enkol mak chei a, â dam inohei indam mak chei a, sâbe tuanghei kha tuam pêk mak chei a, â vâi tâkhei hong ṭhui ikhîr mak chei a, armanghei zong mak chei a, kha nêkan chu an chungah nuniter takkan thil nin itho ngai a nit.

⁵Berapu an neino sikah khan berahei kha an rithekindar a, ramsahein arthekindarhei khah an that a, an fâk a.

⁶Khaangkan ki berahei chu itlâng risângheiah neh mual rizatheiah an îvâi a nit. Rinêng chung muntinah an rithekindar a, tutên zong mak a, ikoi khom koi mak e.

⁷“Khasikin, atûnah hin nangmani berapuhei, keimah Pumapa PATHIAN thu nangni ril hih ringai rei.

⁸Pathian iring kî nit angkan ki thu hih nin ringai ngêt rang a nit. Enkoltu an neino sikin ki berahei chu iol tengka that thei zelin an om a, ramsa tinrêngin an that a, an ifâk ngai a nit. Ki berapuhei khan an berahei izong suak rêng rêng tum mak a, berahei ifâ loiin anmani bang an irfâ a nit.

⁹Khasikin, berapuhei o, PUMAPA thu hih ringai rei.

¹⁰Keimah, Pumapa PATHIAN ngêi hin nin irâl ki nit tâk iti ki înpuang a nit. Ki berahei chu nangni sutpai ki ta, enkol nôk tlak khâi no tin u. Nin kuta rithokin ki berahei khah sanisuang ki ta, mahni bang rivâiin an sa fah tlak khâi no tin u.

¹¹“Keimah, Pumapa PATHIAN hin hingka hin kî ti a nit: Keimah ngêiin ki berahei chu zong ki ta; anni chu donsui ki ti.

¹²Berapun a bera rithekindarhei a hong ibûm nôk ngai angkah hin kei khomin ki berahei chu kha izîng neh vânduaina inrît an tong nî sûna an indarna ram tin ata kha hong ṭhui bûm nôk ki ti.

¹³Nam dang mihei ram ata ṭhui suakin munkan bûm ki ta, an ram ngêiah khan hong ṭhui nôk ki ti. Israel tlângram neh vadung rikam, mun hoinaheiah ṭhuiin, amakhan inlêng ki ti.

¹⁴Loisûl ṭhatna mual rizatheiah anni chu izôkriamkan inlêng ki ta, itlâng ihoiheiah neh phâi rizatheiah in-om ki ti. Israel ram sunga itlâng sûl ringzunna munah khan ki înlêng rang a nit.

¹⁵Ki berahei chu keimah ngêiin donsui ki ta, an ringamna rang mun inrifûk pêk ki ti. Keimah, Pumapa PATHIAN hin kî ti a nit.

¹⁶“Armanghei chu zong ki ta, â vâi tâkhei chu hong ṭhui kîr nôk ki ta, â pophei chu tuam ki ta, â daminohei chu iduam takkan enkol ki ta, â takhei neh â râthei chu ensui [30] mai ki ta, inrup takkan ifâk pêng ki ti.

¹⁷“Atûnah hin nangmani ki berahei o, keimah, Pumapa PATHIAN hin nangni ke ril, ‘Nin sik sikah nangni rêl ki ta, â ṭha chu a ṭhanoa rithokin khâi inran ki ta, bera chu kêlheia rithokin khâi inran ki ti.

¹⁸Nin lâia a ṭhen chu nin sûl ipet iṭha tak takah khan nin ilung tluk mak a, nin ifâk zoi ino kha nin sir isiat chit ngai a. Tui rithiang liai nin in zoiin chu nin pâl inrinok ngai a.

¹⁹Ki bera danghei khan nin isirpol tâk sûl khah an fâk a, nin ipâl inrinok tâk tui bang khah an in ai nang tâk a nit.’

²⁰“Khasikin, atûnah hin Keimah, Pumapa PATHIAN hin nangni ki iril a nit: Bera rât neh rât ino kârvân thu kî rêl rang a nit.

²¹Â rât ino chu a kôl tiang nin ineng a, a lôm lâia rithokin nin sik isua pai ngai a.

²²Nikhomsela, ki berahei chu sanisuang ki ta, nuamning iloa an om rang phal khâi no ning. Ki berahei chungthu, a khât khâtin rêl pêk ki ta, â ṭha neh â ṭhano ithlei ki ti.

²³Ke som Davida angkana mi an rêng rangin anni chu pêng ki ta, an berapu omsun inin ani khan anni chu donsui a ti.

²⁴Keimah, PUMAPA hi an Pathian nîng ki ta, ke som Davida angkana rêng khah an roirêltu nîng a ti. Keimah Pumapa PATHIAN hin kî ti a nit.

²⁵Rithla ringam taka an om theina rangin anmani neh thuthlung siam ki ta, rama sarâng murdi chu kha ram ata ûmisuang ki ta; khanchu, ki berahei kha ram inthimhei khomah izôkriamkan om an ta, rampui nuaiah khom ningibei takkan in thlar thlar an ti.

²⁶“Anni chu ṭhatvur ki ta, ke tlâng rithiang ivêlkan inlêng ki ti. Amakhan an nang zoro takah ṭhatvurna rua an chungah ki însûr pêk ngai rang a nit

²⁷Theikunghei kha inrâ pêk ki ta, loiah khan fâknêk vâng a ta, mi tin mahni ram chitah thlangam takkan om an ti. An ringkolhei ke khiak pêk a, bôia neituhei kut ata ki sanisua tenan chu keimah hi PUMAPA chu ki nit iti riang an ti.

²⁸Nam danghein man pai pai khâi no nia, ramasahei khomin ithatin fah khâi no nih. Thlangam takkan om an ta, tutên thlavâi sak khâi no nih.

²⁹An bu neh chimuhei inpuang pêk ki ta, iṭâm reh khâi no nia, nam dangin musit khâi no nih.

³⁰Mi tinin Israelhei chu keiman kî donsui a nit iti neh ki mihei an nit iti riang an ti. Keimah Pumapa PATHIAN hin kî ti a nit.

³¹“Nangmani ki bera, ki beralôm, ki îfa ngaihei nin nit a, keimah hi nin Pathian ki nit,” Pumapa PATHIAN thu suak khan a ti.