Read Biete EZEKIELA 35 Bible Online

EZEKIELA 35 - Biete bible

EZEKIELA 35

¹PUMAPA khan a ne sôn a.

²“Famthei miriam, Edom ram tiang ngat inla, thu inpuangin rikôk roh.

³Keimah, Pumapa PATHIAN thusuak hih iril roh: “Seir tlâng, nang kî theimâk a nit, Ni chungah kut iṭhum ki ta, nang inram vang ki ti.

⁴Ni khopuihei chu isehchit ki ta, ram chit a ti. Khanchu, PUMAPA ki nit iti riang ni ti.

⁵“Nang chu Israel naihei irâl rilun ni nit a, vânduai inrît a tong lâi tak, an sual sika kuttum dêrên itho an nit lâiah khan a mihei chu ithat inchiai rangin ni lekrilôi a.

⁶Keimah Pumapa PATHIAN hi Pathian iring kî nit angkan thina chu nî sik rang a nit a, amakhah khêl thei tlak no tin e. Thisen isuaa rinang ni nit a, thisenin nang zui mai a ta, nî thi ngêt rang a nit.

⁷Edom tlângramhei chu ram iṭôl inchang ki ta, kha muna thleng rilôi murdi chu kî that riai rang a nit.

⁸Mual tlânghei chu ruak insip ki ta, itlânghei neh varuamheiah khan khandaia thi riphek dûl an ti.

⁹Mangsangin nang siam thal tâng ki ta, ni khopuihei khom tutên lua khâi no nih; khanchu, PUMAPA ki nit iti reh tâng ni ti.

¹⁰“Keimah, PUMAPA hih an Pathian ki nit ṭian mai pumin, ‘Hi nam inikah Judahei neh Israelhei ram hih ki ta a nit, kî dong rang a nit,’ ni ti a.

¹¹Khasikin, Keimah, Pumapa PATHIAN hi Pathian iring kî nit angkah hin, anmani ni nel a, an chungah ningmur ner lâk a, ni narsa lam angkah takah hin ni chungah kî châng rang a nit. An chunga ni sintho sikah khan kuttum nang kî tho a nit iti riang an ti.

¹²Khanchu, ‘Israel tlânghei chu a ṭôl zoi tâk a, ei nuam lam lamin ei lo thei tâk,’ itia ni musitzia kha ki lei iriat a nit iti riang ni ti.

¹³Ki chunga ripâk takka ni ṭong khah kî riat a nit.”

¹⁴Pumapa PATHIAN khan hingka hin a ti: “Nang inram chit ki ta, ne lîr sikin rammual pumpui lôm an ti.

¹⁵Ki mi, Israelhei an siatchit ni mu lâia ni lôm lam angkah takah khan ni chungah kî châng rang a nit. Seir tlânghei chu Edom ram pumpui neh khan ram vang an ti. Khanchu, mi tinin PUMAPA ki nit iti reh tâng an ti.”