Read Biete EZEKIELA 36 Bible Online

EZEKIELA 36 - Biete bible

EZEKIELA 36

¹PUMAPA khan, “Famthei miriam, Israel rama itlânghei ziangah thu inpuang inla, hingka hin ti roh:

²Israel ram itlânghei o, Pumapa PATHIAN thu hih ringai rei. Israel irâlhei khan ‘Thôk, tlâng risâng, mun rilunhei chu ei ta a nit tâk,’ an ti a.

³“Khasikin, thu inpuang roh: Keimah, Pumapa PATHIAN thusuak hih inpuang roh. A kôlvêla namhei khan Israel tlânghei kha an lâkin an chêkinbual a, an rêngkan Israel chu an iêsêl a nit.

⁴Khasikin, Israel tlânghei o, Pumapa PATHIAN thu hih ringai ta u: nangmani mualhei neh tlânghei, vatedunghei neh varuamhei, mun iram neh irial tâkhei, khoram neh irok itong tâk khopuihei, an vêla nam danghein an inuisohei ziangah Keimah, Pumapa PATHIAN hin hingka hin kî ti a nit.

⁵“Keimah, Pumapa PATHIAN hin ki ningthik lumlâi takin an vêla nam danghei idemin thu kî ril a nit. Edom vâng chu kî dem ual a nit. Râifân neh musit pumin ki ram chu an lâk a, an risem a, ran vâi munhei kha an nei tâk a.

⁶“Khasikin, Israel ram chungthu rillôk inla; mualhei, itlânghei, vatedunghei neh varuamhei ziangah hingka hin ti roh: Pumapa PATHIAN khan hingka hin a ti: Nam danghein imusit neh mualphoi an sak sikin ki ṭhatnemringaina ningthika thu ki îsîr a nit:

⁷Keimah, Pumapa PATHIAN hin an kôlvêla nam danghei chu mualphoiin om an ti iti ṭong ki înkung a nit.

⁸Khanniseh, Israel tlângheiah chu thinghei kha ithuarin nâ thar la mai an ta, ki mi Israelhei ta rangin an irâ kûr ngut a ti. In tianga nin hong kîr nôk rang zoro a nâi teng tâk.

⁹Ringai rei, nin tiang ki ṭang a, nin tiang mâi ngat nôk ki ta, nin ram chu tukirît nôk nin ta, chimuhei tho nôk nin ti.

¹⁰Israel nam chu inpung ki ta, khua ram tâkhei kha inlua nôk ki ta, inding nôk nin ti.

¹¹Nin lâiah miriam neh ran chu pung an ta, nai nei intam nin ta, zoro thleng tâka nêkan tam ual nin ti. Sûn ithleng tâka nin lei om ngai lam angkah takin kha munah khan nangni in-om nôk ki ta, zoro thleng tâka nêkan vângsak inṭum ualin nangni siam ki ti. Khanchu, PUMAPA ki nit iti reh tâng nin ti.

¹²Ki mi, Israelhei chu an ram ilua nôk rangin hong ṭhui ikhîr nôk ki ti. Nin ram chu dong nin ta, nin nainetehei kha voniṭâm tuang khâi no nih.

¹³“Keimah, Pumapa PATHIAN hin kî ti a nit: ‘Hi ram hih miriam ifân rimangtu a nit a, an naihei an isûn mai ngai a nit,’ an ti ngai a.

¹⁴Khan vuaninta rithokin chu, ‘Miriam ifân rimang ram, naihei sûnna ram,’ ti khâi no nih. Keimah Pumapa PATHIAN thu suak hin kî ti a nit.

¹⁵Nam dang musitna rî reh khâi no ni a, mualphoi hong sak khâi no nih. Ram khan naihei khom lah pêk khâi no nih. Keimah, Pumapa PATHIAN hin kî ti a nit.”

¹⁶PUMAPA khan a ne sôn a.

¹⁷“Famthei miriam, Israel insungkuahei hin an ramah an om lâiah khan an omdân neh an sintho khan ram kha porinchen an siam a. Nupang omhoino lâi angkan ki makungah an înim a nit.

¹⁸Ram sungah thisen an isua ngai sik neh mirmila porinchen an risiam ngai sikin an chungah ki ningthik ki îṭhum a nit.

¹⁹Nam danghei lâiah ke chekindar a, ram tinah ke thekindar a, an om dân neh an sintho dân angkah takin kuttum kî tho a nit.

²⁰An fena mun tinah ker ming rithiang mualphoi an sak ngai a, mihei khan, ‘Hi mihei hih PUMAPA mihei an nit a; nikhomseh, an ram ata ûm isua an nit,’ an lei ti mai ngai a.

²¹Israel insungkuahei fena ram ikipah ker ming mualphoi an sak sikin ker ming rithiang chu ki irngai innat tâk a nit.

²²“Khasikin, atûnah hin Israel insungkuahei chu keimah, Pumapa PATHIAN thucha hih iril roh. Ki thil tho tum hih nangmani Israel insungkuahei lung ken kham sika itho kî tum ni mak; nin lei fena ram tinah mualphoi nin lei isak ngai ker ming rithiang sika itho kî tum a nit.

²³Ker ming rithiang roinpuizia hih nam tin lâiah ki înrilang rang a nit; nangmani sikin an lâiah ker ming a lei siat tâk a; kha mihei khan keimah hi PUMAPA ki nit iti an riat rang a nit. Keimah, Pumapa PATHIAN hin kî ti a nit; ker thiangzia hih an imu rang a nit.

²⁴Nam tin lâi ata neh ram tina rithokin nangni ṭhui suak ki ta, nin ram ngêiah nangni hong ṭhui ikhîr nôk ki ti.

²⁵Tui rithiang nin chungah rithêng ki ta, nin inim porinchena nangni infâi ki ta, mirmilheia rithokin nangni inrikiang ki ti.

²⁶Lungril ithar neh rithla thar nangni pêng ki ta, nin lungril lung angkana khir khah khâi inrimang ki ta, lungril rivuai, taksa angkana rinêm thu zômna lungril nangni pêng ki ti.

²⁷Nin sungah ker Thla siang ki ta; khanchu, ki dânhei neh ki thupêk zôm tâng nin ti.

²⁸Nin chibulhei kî pêk ramah khan om nin ta, ki mihei nîng nin ta, keimah hi nin Pathian nîng ki ti.

²⁹Nin porinchena ata nangni inzôk ki ta, nin bu neh bâl inpung ki ta, iṭâm tuang khâi no tin u.

³⁰Nin thei kunghei irâ ṭuk a ta, nin loiheiah chimu vâng tak tak a ta; khanchu, ṭâm sikin nam danghein nangni musit khâi no nih.

³¹Nin om dân ṭhatnozia reh suak nin ta, nin sualna sikin neh thil porinche nin tho ngai sikin nangmani neh nangmani ritir nin ti.

³²Israel insungkuahei o, nangmani sikin hi thilhei hih kî tho ni mak. Nin thilthohei sika izak neh mâimôk itong nin nit iti nin iriat kî nuam a nit. Keimah, Pumapa PATHIAN hin kî ti a nit.”

³³Pumapa PATHIAN khan hingka hin a ti: “Nin sualhei ata nangni ken fâi tenan nin khopuiheiah nangni in-om nôk ki ta, â ram tâkhei kha inding inthar nôk nin ti.

³⁴Nin loi kôla thleng rilôi murdihei kan nin loi iping khap tâk kha an mu a; khannisela, nin loihei khah irît nôk nin ti.

³⁵Mi tinin, ‘Hi rikul, â ram rip tâk hih Eden rikul angkan kêng a nit nôk tâk. Khopui iram tâk, â chim rem rum, imaraka om tâk khah kulpuia rikulin an lua nôk tâk hi,’ tîng an ti.

³⁶A kôlkianga nam la omhei khan, ‘Keimah PUMAPA hin khopui ichim neh iram tâkhei chu ki înding nôk a nit iti neh chulramhei khom chimu kî phun nôk a nit’ iti riang an ti. Keimah, PUMAPA hin ki ṭonginkung lam angkah takin itho khom kî tho rang a nit.”

³⁷Pumapa PATHIAN khan hingka hin a ti: “Israel insungkuahei chu ki ziangah ṭangpuina lân ngên nôk ki ta, bera lôm angkan anni chu ki înpung rang a nit.

³⁸Kût nikhuaa an bera lan rang Jerusalem khopui ai sip ngai angkan khopui iram tâkheiah khan miriam la sip an ti. Khanchu, keimah hi PUMAPA chu ki nit iti reh tâng an ti.”