Read Biete EZEKIELA 37 Bible Online

EZEKIELA 37 - Biete bible

EZEKIELA 37

¹PUMAPA ompuina ritha ker tem a, PUMAPA Rithla khan a ne ṭhui a, phâiah a ne ṭhum a. Phâi khah ru chârin a sip a.

²Phâi khah a ner fangpui a, a phâi idâpin ru châr khah a om a, ru châr tak tak korong a nit.

³Ani khan ki ziangah, “Famthei miriam, hi ruhei hih hong ring nôk thei an tîm?” itin a ner don a. Keiman, “Pumapa PATHIAN, nangman ni riat ual,” itin ki sâm a.

⁴Ani khan, “Ruhei ziangah thu inpuang inla, hi ru chârhei hih PUMAPA ṭong ringai rangin iril roh.

⁵Keimah, Pumapa PATHIAN hin hi ru chârhei ziangah hin hingka hin ki ti a nit: Ringai rei, rithuak nangni hong insêm ki ta; khanchu, nin iring nôk rang a nit.

⁶Ritharui nangni pêng ki ta, vun nangni rikhû sâng ki ti. Nin sungah ker thuak khum ki ta; khanchu, ring nôk nin ta; keimah hi PUMAPA chu ki nit iti riang nin ti,” a ti a.

⁷Thu a ne pêk lam angkah takin ki tho a; thu chu ken puang tâk a. Thu ken puang lâi takah khan irî risek rêk ruk ki riat a, ruhei khah mahni rizompuihei neh khan an rizom tâk a.

⁸Ki en mai a, ruhei kha ritharuihei neh taksan a hong tuam a, vunin arkhû riai tâk a. Nikhomseh, takpumheiah khan rithuak chu la omak a.

⁹Pathian khan, “Famthei miriam, ithli[31] ziangah thu inpuang inla, hingka hin ithli kha iril roh: Kôlkil ilika ithlihei o, hong unla, hi mithi ruakhei hi hong sêm unla, hong ring nôk riseh, Pumapa PATHIAN khan ai ti a nit iti iril roh,” a ne ti a.

¹⁰Thu a ne pêk lam angkah takin thu chu ken puang tâk a. Ithli khan a hong sêm a, an hong ring a, an hong iding tâk a. Sipai lôm ilian tak an hong nit tâk a.

¹¹Pathian khan hingka hin a ne ti a: “Famthei miriam, Israel mihei chu hi ru chârhei angkah hih an nit: ‘Ei ruhei chu a châr zoi tâk a, itûng rang a boi a, matiang isabei rang khom om khâi mak,’ an iti a nit.

¹²Khasikin, ki mi, Israelhei ziangah hingka hin thu inpuang roh: Keimah, Pumapa PATHIAN hin an thlânhei chu iong ki ta, anni chu ithlâna rithokin la suak ki ta, Israel ramah ṭhui ki ti.

¹³Ki mihei iphûma an omna thlânhei ke ong a, ki kêlisua tikin chu keimah hi PUMAPA chu ki nit iti reh tâng an ti.

¹⁴Anmaniah ker Thla siang ki ta, inring nôk ki ta, an ram ngêiah ṭhui nôk ki ti. Khanchu, keimah hi PUMAPA chu ki nit iti reh tâng an ti. Itho ranga ki lei înkung tâk kha kî tho rang a nit. Keimah, PUMAPA hin kî ti tak a nit.”

¹⁵PUMAPA khan a ne sôn a,

¹⁶“Famthei miriam, irol khatkah lan la, amakhan, ‘Juda rêngram’ iti riziak roh. Irol dang la nôk inla, amakhan ‘Israel rêngram’ iti riziak roh.

¹⁷Khanungchu, irol thluankah a ang theina rangin a môr rizom thapkan ni kutin ifûn roh.

¹⁸Ni mihei khan, ‘Amahih îm a omzia ne ril roh,’ itia nang an ridonin chu hingka hin iril roh:

¹⁹Keimah, Pumapa PATHIAN hin ‘Josefa rol, Efraim neh a thunrualpui Israel chihei kuta om chu lâng ki ta, Juda rol neh inrizom ki ta, irol thluan khatkan siam ki ta, ki kutah khatkah ni tâng an ti,’ a ti, ti roh.

²⁰“Ni kutin irol inikahei khah ifûn inrikop inla, amakhah mipuiin mu riseh.

²¹Khanungchu, an ziangah, Keimah, Pumapa PATHIAN hin ki mihei chu an omna ram nam dang lâia rithokin la suak ki ta, munkan bûm ki ta, an ram ngêiah hong ṭhui nôk ki ti.

²²An ram, Israel itlângheiah khan nam khatkan siam ki ta, roiirêl pêk rang rêng khatkah nei an ta, nam inikah neh ram inikah lei inih ngai khah inṭhen khâi no nih.

²³Mirmilhei neh thil porinche an ithohei neh an siatnahei khan borinnimin om khâi no nia, an isualna ngai mun ata kha sanisuang ki ta, thâr inrithiang ki ti; khanchu, ki mihei nîng an ta, kei khom an Pathian nîng ki ti.

²⁴Ke som Davida angkana mi khah an rêng nîng a ta, roirêltu khatka nuaiah om an ta, ki dânhei chu iamom takkan zôm tâng an ti.

²⁵Ke som Jakoba zianga kî pêk ram, an chibulhei lei omna ramah khan om an ti. Kha munah khan om mai tâng an ta, an naihei neh an richi suanpârhei khom kumkhuakan om tâng an ti.

²⁶Thlangam takka an om theina rangin kumtluang ringeina thu thlungpui ki ti. Indet ki ta, anni chu inpung ki ta, ki mun rithiang chu an lâiah kumkhuakan in-om ki ti.

²⁷An lâiah om ki ta; an Pathian nîng ki ta, ki mihei nîng an ti.

²⁸An lâia kumkhuaka om rang, ki Mun Rithiang, an lâiah ki sia tenan chu nam danghei khomin keimah, PUMAPA hin Israelhei chu ki mi inih ranga ki irthlang an nit iti riang an ti.”