Read Biete EZEKIELA 38 Bible Online

EZEKIELA 38 - Biete bible

EZEKIELA 38

¹PUMAPA khan a ne sôn a,

²“Famthei miriam, Magog rama Mesek neh Tubal [32] ruaitu lian tak; Goga tiang ma song inla, ama demin thu inpuang roh:

³Keimah, Pumapa PATHIAN hin Mesek neh Tubal ruaitu lian tak Goga ziangah hingka hin kî ti a nit:

⁴Ani chu kî nel a nit, ani chu inngûm ki ta, arkamah rikuaiin rithil ki ta, amah neh a sipaihei, sakor neh rithluk takka rivo sakor chungchuang sipaihei, mi itam takkah ṭângipho hâk neh ipho chôi, khandai ichôihei neh khan kî kâi isua rang a nit.

⁵A lômahei chu Persia mihei, Ethiopia mihei, Libia mihei an nit a; an rêngkan ipho neh dâr lukhum an nei korong a.

⁶Gomer neh mâr tianga om Beth Togarma rama ridoi ithiam mihei khan an zui a, nam dang lâia sipai itam takkahei khom an iom sa a nit.

⁷A thunuaia sipaihei neh risiam diamka om rangin iril roh.

⁸Sûn izâka manih nungah khan nangni ki lai mang nôk rang a nit. Kum itam takkah a vun tenan nam itam takka lâia indar kî ṭhui bûmhei, ningibei takka an om tâkna, khandai ata ki înzôk ram, zoro sôt takka â ṭôl neh imaraka om tâk, Israel tlângram iseh tâk neh iram tâk, khan atûn chu lungrinîk riamka an om nôk tâkna ram irûn rangin thu pêng ki ti.

⁹Amah neh a sipailôm neh a zianga om nam dang itamkahei khan thlipui irâng vung vung angkan doi an ta, sûm angkan ram chu an ituam rang a nit,” a ti a.

¹⁰Pumapa PATHIAN khan Goga ziangah hingka hin ai ti a nit: “Kha zoro khah a hong tlung tenan chu thil ṭhano tak itho ni înlung rang a nit.

¹¹Rirungna rang nei ino ram, kulpui nei ino, a khârna neh a kal khom om ino khopuiheia rithlaringam tak neh ningibei takka om mihei chu irûn rangin risiam ni ti.

¹²Khopui lei isehchit tâka omhei kha irok ni ta; kha mihei khah nam tin lâia rithek tâk, iṭhui bûm nôk an nit a, ran neh richon an inei nôk tâk a nit.

¹³Seba neh Dedan mihei neh Tarsis rivaimihei khan, ‘Irok rang neh isuam rangin ni sipaihei nî bûm mani? An tangka neh rângkachak hei, an ran neh neinun hei isuta ipêl riai nî tum mani?’ itin nang ridon an ti.”

¹⁴Khasikin, Pumapa PATHIAN khan Goga zianga thu inpuang rangin a ne tir a; “Ki mi, Israelhei chu thlangam takka an om lâiin idoi rangin

¹⁵mâr mong, ni omna rama rithokah khan mi itam takkah, sakor chungchuang lôm neh sipailôm iṭhuiin rithok suak ni ti.

¹⁶Sûmin ram ai tuam ngai angkan ki mi Israelhei chu hong tuam ni ti. A zoro kî ti-ah khan nam tinin tûm kî nit an mu a, ker thiangzia a lang theina rangin O Goga, ki ram chu nang inrûn ki ti.

¹⁷Ke som Israel zânthlahei imanga ki lei înpuang tâk, ‘Israelhei idoi rangin mi tu manih ki hong iṭhui rang a nit,’ kî ti khah ni nit,” Pumapa PATHIAN thu suak khan ai ti a nit.

¹⁸Pumapa PATHIAN khan, “Goga kha Israel ram irûn rang a hong tikin ki ningthik titak a ti.

¹⁹Ki ningmurah khan, ‘Israel ramah, kha nî-ah khan ninupui innîng ki ti,’ ki ti a.

²⁰Itlânghei ritol a ta, ikhoihei chim a ta, kul banghei chim an ti; tuia ingahei, chungavuang ivahei, ramsa â lian neh â chînhei, bokrivâka lônhei neh rinêng chunga miriam iom murdihei kha ne ṭin inthing an ti.

²¹Goga chu vânduaina chi tinrêngin thlavâi kî sak rang a nit. Keimah, Pumapa PATHIAN hin kî ti a nit. A mihei chu khandaiin rituk risak an ti.

²²Ani chu ripui neh thisen suaknan kuttum thông ki ti. Rosângsari neh irial insûr ki ta, amah neh a sipailôm neh a ṭhuiruai nam itam takkahei chungah khan mei neh kât insûr zut zut ki ti.

²³Khanchu, nam tin mitmuah ki roinpuizia neh ker thiangzia inlang ki ta, keimah hi PUMAPA chu ki nit iti reh tâng an ti,” a ti a.