Read Biete EZEKIELA 39 Bible Online

EZEKIELA 39 - Biete bible

EZEKIELA 39

¹Pumapa PATHIAN khan, “Famthei miriam, Mesek neh Tubal nam ruaitu lian tak Goga demin thu inpuang inla, ani chu kî doi a nit iti iril roh.

²Ani chu lam ithar tiang inrihêl ki ta, mâr tiang ilah taka rithokin la suak ki ta, Israel tlângah ṭhui ki ti.

³Khanchu, a voi kuta phelngul kha ikhiak ki ta, a chang kuta thalhei khom kha ikhiak ki ti.

⁴Goga neh a sipaihei, a ṭhuiruaihei chu Israel tlângheiah thîng an ta, an ruakhei kha ramsahei neh chungavuang ivahein fâng an ti.

⁵A ram idâpin itâl dûl an ti. Keimah, Pumapa PATHIAN hin kî ti tâk a nit.

⁶Magog ramah neh tuipui rikam, ningibei takka an omna ramah khan mei isuang ki ta, mi tinin PUMAPA chu ki nit iti riang an ti.

⁷Ki mi, Israelhei chu, ker ming rithiang inriang ki ta, ker ming rithiang kha anmani sikin mualinphoiin om khâi no nih. Khanchu, nam danghei khan keimah, PUMAPA hih Israel Mi Rithianga ki nit iti reh tâng an ti,” a ti a.

⁸Pumapa PATHIAN thusuak khan hingka hin a ti: “Ringai roh, ki zoro inkung khah a hong nâi a, ai tlung rang tâk a nit.

⁹Israel khuaa omhei khan irâlthluk tinrêng, iphohei, ṭângiphohei, phelngulhei, thalhei, tôkmolhei neh ifeihei khah thinga tua rangin rikhôm an ta, meiah tuang an ta, kum sarika sunga tua rang inrup a ti.

¹⁰Thing ituarua pêl rangin an loiah fe no nia, rampuia thinghei khom iphûr no nih. Râlthluk an imâkrakhei kha itua rua thingin an imang rang a nit. Anmani roktuhei chu irok an ta, â suamtuhei chu an isuam rang a nit.” Pumapa PATHIAN thu suak khan a ti.

¹¹PUMAPA khan, “Hihei murdi hih a hong tlung tenan chu Tuipui Ithi sak tianga om Abarim Phâi [33] an iti Israel ramah khan Goga kha thlân mun pêng ki ta, amakhan Goga neh a sipai lômhei khah phûm an ta, kha phâi riming khah ‘Hamon Gog Phâi’ iti nîng a ti.

¹²Ram kha arthiang nôk theina rangin ruakhei irêna rangin Israelhei khan thla sarika sung nang an ti.

¹³Ram sunga om murdi chu ruak iphûm rangin rithok an ta, ke nêna nikhua a tlung tenan chôiinrisângin om an ti. Keimah Pumapa PATHIAN hin kî ti tâk a nit.

¹⁴Thla sarikah a hek tenan chu, ram pumpui rifang suaka, ruak phûm loia rinênga la tâl ṭianhei izonga phûm rang mi rithlang suak an ti. Khangkah khan ram chu an ithâr infâi vang rang a nit.

¹⁵Kha mihei khan an rifang vêlnaah miriam ru an mu ngânin chu a kôlah khan risin târ an ta, thlân ichoituhei khan an phûm rang a nit.

¹⁶Kha munah khan sipailôm riming riputin khua khatkah arming ‘Hamona’ [34] iti om a ti. Khanchu, ram khah a hong irthiang nôk rang tâk a nit,” a ti a.

¹⁷Pumapa PATHIAN khan ki ziangah, “Famthei miriam, chungavuang ivahei neh ramsahei chu kil tina rithoka hongin an ta ranga ribôlna ruai roinpui Israel tlângrama ki înrifûk pêk hih hong fah sela, thisen hong in riseh.

¹⁸Sipaihei sa khah fâng an ta, ram ruaituhei thisen khah in an ti; anni khah Basan rama berachal neh berate hei, kêl neh serâtchal vâi intakhei ribôlna kî thathei chu an nit.

¹⁹Hi mihei hih ribôlna angkana ki that tenan chu chungavuang ivahei neh ramsahei khan an ning imâk rakkan fâng an ta, thisen kha an inrui mâkah in an ti.

²⁰Ki dochamah sakorhei neh a chungchuang, mihâi irâthei neh ridoi ithiamhei sa khah an nuam dôrah fah thei an ti. Keimah, Pumapa PATHIAN hin kî ti tâk a nit,” a ti a.

²¹PUMAPA khan, “Nam tin ziangah ki roinpuizia inlang ki ta, ki roirêl tâk dân kha inmûng ki ti.

²²Kha nikhuaa rithokin chu Israel insungkuahein keimah hi PUMAPA, an Pathian chu ki nit iti reh tâng an ti.

²³Ki chungah thil an thonsual sika Israelhei chu suakah ki întâng a nit iti nam danghei khan riang an ti. Ki chungah iamom mak a, anni chu nung ki song tâk a, an irâlhei kutah khandaiin an ithi a nit.

²⁴An porinchena neh an pualoina sikin kuttum ki tho a, nung kî song a nit,” a ti a.

²⁵Pumapa PATHIAN khan, “Khanniseh, atûn chu Israel mi, Jakoba richihei chungah lungkhamna nei ki ta, anni chu vângsak inṭumin siam nôk ki ta, ker ming rithiang chu ki îhoih rang a nit.

²⁶Tutên inbuai loia an ram ngêiah thlangam takka an om tenan chu nung an ne song sika an mualinphoina khah ringil thei tâng an ti.

²⁷Ker thiangzia nam tin en rangin ki mihei chu an irâlhei omna rama rithokin ki hong iṭhui bûm nôk rang a nit.

²⁸Khanchu, ki mihein keimah hi PUMAPA, an Pathian chu ki nit iti riang an ti. Nam tin lâiah suaka tâng rangin ke chekindar a, an ram ngêiah ki hong ṭhui ikhîr nôk a, an lâia khatkate lua nungtiang ki hong mâk no sikah khan an PathianPUMAPA chu ki nit iti reh tâng an ti.

²⁹Nung song khâi no ning a, Israel mihei chungah ker Thla iṭhum ki ti. Keimah, Pumapa PATHIAN hin kî ti tâk a nit,” a ti a.