Read Biete EZEKIELA 4 Bible Online

EZEKIELA 4 - Biete bible

EZEKIELA 4

¹Pathianin, “Famthei miriam, talung phêk lan la, ni matonah sian la, a chungah khan Jerusalem khopui rilim sin roh.

²Khante, ihuala om angkan siam inla, ribîkna ranghei siam inla, ipil inpông inla, riabuk siam inla, bang sukisiatna a vêlkan siam roh.

³Thîr phêk lan la, khopui rilim nî siam neh nin kârah khan sung roh. Khopui rilim kha ma song inla, ihual khapa om a nit a, â hualtu chu nangmah khah ni nit. Amahih Israel nam ta ranga inriatna nîng a ti.

⁴“Khanungchu, ne voitiang idelin ni sîrin zâl inla, Israelhei sualna kha ni chungah ki irngat rang a nit. Ni zâl pumin Israelhei sual kuttum thona chu nî tuang rang a nit. An kumkah sual rithûlin sûnkah chit nang intuang ki ta; sûn rizathumkah sômikuakka sung Israelhei sual sikin nî tuang rang a nit.

⁶Ama rizoiin chu changtianga delin ni sîr ngirin zâl nôk ni ta, sûn sômilika sung Judahei sual sikin tuang nôk ni ta, an kumkah sual rithûlin sûnkah chit nî tuang rang a nit.

⁷“Ni mit kha ihuala om Jerusalem tiang en inla, ni kuttum chu khopui tiang ilek inla, a siat rang thu inpuang roh.

⁸Ihual ranga nang ki ti sung nen hek mâkah chu rihêl thei loiin nang kî khuap khap rang a nit.

⁹“Atûnah hin huit neh barli hei, ibe neh dâl hei, fatun neh ibaidi la roh. A rêngkan inripol inla, ibai siam roh. Amakha ne voitiang idela ni sîra sûn rizathumkah sômikuakkah ni zâl sunga ni fâk rang a nit.

¹⁰Ni nuam tik tikah sûnka sungin ibai gram rizanikah sômithumkah bang fah thei ni ti.

¹¹Tui khom, ni nuam tik tikah sûnka sungin kilât inikah bang in thei ni ti.

¹²Ibai thliam siam ni ta, miriam êk ichâr[2] imangin mei sêm ni ta, mei chungah khan ibai khah ri-em inmin ni ta, amakhah mi tin nang mu theina rangah ni fâk rang a nit,” a ti a.

¹³PUMAPA khan, “Ke chekindarna rang rama mihei lâiah ama angkah hin Israelhei khomin fâk inim, Dânin ai phal ino kha an ifâk rang a nit,” a ti a.

¹⁴Khante, keiman “Ni mak e, Tinrêngthothei PUMAPA, thil rithiang ino fan iborin la om ngai mang e. Ki chîn lâia rithokin a tôta thi neh ramsahei ithat sa rêng rêng fah ngai mang a, sa rithiang ino sa kha ritem khom lar tem ngai mang e,” itin ki sâm a.

¹⁵Khanchu, Pathianin, “A ṭhat, miriam êk rithûlin sial êk nang pêng ki ti, amakhan ibai kha ner em inmin rang a nit,” a ti a.

¹⁶Ki ziangah khan thu â sîr mai a, “Famthei miriam, ringai roh, Jerusalem kho mihei fâk muna nâr chu ki îsat rang a nit. Khantaka mihei khan an neisun kha rita tap kan rithlavâi neh lunginzîngin fâng an ta; tui khom rita tap kan in tâng an ti.

¹⁷Fâknêk neh tui risam an ta; lunginzîng takkan ri-en an ta, an sualhei sikin an irôp rimang rang a nit,” a ti a.