Read Biete EZEKIELA 43 Bible Online

EZEKIELA 43 - Biete bible

EZEKIELA 43

¹Mi khan sak tiang isong kotbâiah khan a ne ṭhui nôk a,

²amakhan khosak tianga rithoka zuang Israelhei Pathian ompuina vâr ri-el ki mu a. Pathian rôl irî kha tuikhanglian risok irî angkah a nit a, a roinpuina vâr ri-el sikah khan rinêng kha a vâr pum a.

³Hi inlârna kî mu hih Jerusalem isehchit ranga Pathian zuang inlârna kî mu angkah neh Kebar vadung rikamah ki om lâia inlârna kî mu angkah khah a nit. Khanchu, ki khupin ke lîr tâk a.

⁴Kha PUMAPA ompuina vâr ri-el tak khah khosak tianga kotbâi ife thlengin Tempil sungah a lût tâk a.

⁵PUMAPA Rithla khan a ne dom a, chuanchung tual thapukah khan a ne ṭhui a, Tempil chu PUMAPA roinpuinan a sip riai a.

⁶Mi khah ki kôlah khan â ding a, Tempila rithokin PUMAPA khan a ne sôn ki riat a, hingka hin a ne ril a:

⁷“Famthei miriam, amahih ki rêngṭhungmun ken ṭhungna neh ki ke ringatna omna chu a nit. Hi munah hin ki mi Israelhei lâiah kumkhuakan om tâng ki ta, an chungah roi kî rêl rang a nit. Israel naihei neh an rênghei khan pathian danghei chubai iûnin manih, an rêng ruakhei hi munah hin iphûmin [35] ker ming rithiang mualphoi sak khâi no nih.

⁸Rênghei khan ki kotmâi isongin in an sin a, ki bang bul itôn rêt kan chopui an phun a, an thil porinche thohei sikah khan ker ming mualphoi an sak a; khasikin, ki ning a thik a, anni chu ki înrimang tâk a nit.

⁹Atûnah hin pathian danghei chubai iûn marak sela, an rênghei ruak [36] khah khâi pai riseh. Khanchu, an ziangah kumkhuan om mai ki ti.

¹⁰“Famthei miriam, Israel insungkuahei ziangah ki Tempil sin rang dân hih iril inla, a sin rang dânhei chu risei riseh. An thil thonsualhei sikah khan izak inrimu roh.

¹¹An sualhei sikah khan izak an riat ngaiin chu Tempil inding rang dân an ziangah rilfian la, a lûtna neh a suaknahei, a lian rang dôr hei, arzat rang dôr hei, iril roh; thil tinrêng zêk rang dânhei neh a mang rang dânhei an mu rangin riziak roh. Khanchu, thil tinrêng zêk rang dân mûng an ta, a mang rang dân murdi an izui thei rang a nit.

¹²Amahih Tempil mang rang dân chu a nit, a tlâng ivêlkan mun iser a nit a, mun rithiang a nit rang a nit.”

¹³Mâichâm rikhîna kha Tempil rikhîna mangrua ngir khah imang a nit. Mûkkah neh zabokka kha mûkka ringaiin mâichâm kha hingka hin a nit rang a nit. A bul iṭhungna kha mûkka sa lung inrichuan rang a nit; a kôlmôr â rei khah a vêlkan khâpkah a pông rang a nit.

¹⁴Mâichâm risâng dân chu hingka hin a nit rang a nit: a bul iṭhungna khah mûkka risâng nîng a ta, a kôlmôr ipông ata khah mûk inika risângin lung inrichuan rang a nit a; hin tak ata hih a kôlmôr indôr mûkkah om a ta, khantaka rithokah khan mûk ilika risângin lung inrichuan nôk rang a nit.

¹⁵Mûkkah inpông nôkin ritap kha mûk ilika risânga inrichuan nôk rang a nit; mâichâm chung richam ritap dêngna khah kil ilika neia siam rang a nit a, kil tinah riki, mûkka risâng inding rang a nit.

¹⁶Mâichâm chung ritap kha kil ilika nei, mûk a dung neh a khang mûk sômleiinika seng seng a nit rang a nit.

¹⁷A kôl môr ipông nuai khom khah a dung neh a khang mûk sômleiilika thla seng seng nîng a ta, a kôlmôr thlop khah khâpkah â vêlkan a om rang a nit; Mâichâm luina kalbihei kha sak tiang pangah a om rang a nit.

¹⁸Pumapa PATHIAN khan ki ziangah, “Famthei miriam, nang ki îril hih ringai roh. Mâichâm nin sin zoi tenan chu, a chungah khan hâlrivâm thillan lan nin ta, ribôlna sa thisen khah rithen mâichâm khah nin thâr rang a nit.

¹⁹Levi nam, Zadoka richia mi thiampuhei bang khah ki sin itho rangin ki maah an ihong thei rang a nit. Keimah, Pumapa PATHIAN thupêk a nit. Nangman sual ribôlna lan rang serâtchaltuai ni pêk rang a nit.

²⁰A thisen ichînkah kha mâichâm ikila riki ilikaheiah khan nâl ni ta, mâichâm inlâina ân dôr ipông kil tinah neh a kôlmôr irei kha a vêlkan ni nâl sa rang a nit. Kha angkah takah khan mâichâm kha ni thâr inrithiang rang a nit.

²¹Sual ribôlna rang serâtchaltuai ilana om kha kâi ni ta, Tempil tuala mun inrifûk bîkah khan ni hâl rang a nit.

²²A sûn niknî-ah khan sual ribôlnan kêlchal, demnaboi ni lan rang a nit. Serâtchaltuai thisena ni tho lam angkah takah khan kêlchal thisenah khan mâichâm kha ni thâr inrithiang rang a nit.

²³Khangkan mâichâm ni thâr zoi tenan chu serâtchaltuai neh berachaltuai demnaboi seng seng ni lan rang a nit.

²⁴Khahei khah ki ziangah hong kâi ni ta, thiampuhei khan an chungah ichi rithêng an ta, ki ziangah thillan rangin hâl inrivâm an ti.

²⁵Sûn sarika sung chu sûn tin sual ribôlnan kêl hei, serâtchaltuai hei neh berachaltuai hei nin lan rang a nit. An rêngkah khan demnaboi korong an nit rang a nit.

²⁶Thiampuhei khan mâichâm kha imang a nit theina rangin sûn sarika sung an thâr rang a nit a; khanchu, mâichâm kha rithiang tâng a ti.

²⁷Kha sûn sarikah khah a hek a, a sûn iriatnîa rithokin, thiampuhei khan hâlrivâm thillan neh ringeina thillan kha mipuihei ta rangin lan tâng an ta; khanchu, nin rêngka chungah lôm tâng ki ti. Keimah, Pumapa PATHIAN hin kî ti tâk a nit,” a ti a.