Read Biete EZEKIELA 44 Bible Online

EZEKIELA 44 - Biete bible

EZEKIELA 44

¹Khosak tianga rithoka Mun Rithiang chuannuai lûtna kotbâiah a ne ṭhui nôk a, kotbâi khah a lei rikhâr a.

²PUMAPA khan ki ziangah, “Hi kotbâi hih rikhâr mai a ta, iong ni tlak no nih. Tu miriam khomin imang rangin iphal ni mak, keimah, PUMAPA Israelhei Pathian chu ama kotbâiah hin ki zuang ilût a nit sikin arkhâr ṭian mai rang a nit.

³Ram roirêltu chu thapukah hin PUMAPA maa ruai ifah rangin fe thei a ta, a hongna lam tiang ngir a kîr nôk rang a nit,” a ti a.

⁴Khanchu, mi khan mâr tiang panga kotbâi, Tempil matianga lûtnaah khan a ne ṭhui a. Tempil sung khah PUMAPA ompuina vâr ri-el khan a sip a. Khanchu, lingisikin ki khupin ke lîr tâk a.

⁵PUMAPA khan ki ziangah, “Famthei miriam, nî mu neh nî riat murdi hih iṭha takkan richik tap roh. Mun Rithiang mang rang dân hei, tûm â lût â suak thei ranghei nang ki îril rang a nit hih.

⁶“Rihel irât Israel mihei iril roh: Keimah, Pumapa PATHIAN hin thil porinche itam takkah an lei hong ithoheiah hin ke lung dil zoi khâi no ning e.

⁷Tempilah ki rang, sathâi neh thisen an hong lan zoro khomin nam dang, lungril neh taksaa ser tan inohei an ṭhui inlût a, an inbor a, thil porinche an itho murdi sikah hin ki thuthlung an îsiat a nit.

⁸Ki Tempil vong inrithiang mak a, â enkol rangin nam dang mi an isia a nit.

⁹Keimah, Pumapa PATHIAN hin ki inpuang a nit: Nam dang, lungril neh taksaa ser tan ino rêng rêng ki Mun Rithiangah an lût rang ni mak a; Israelhei lâia lêng ram dang mihei khom lungril neh taksaa ser tan inohei chu an lût rang ni mak e,” a ti a.

¹⁰PUMAPA khan ki ziangah, “Mirmil chubai iûna Israelhei an rimang lâiah khan Levia chihei khom hin an ne mâk a, an siatna sikin kuttum kî tho a nit.

¹¹Tempil kotbâi ingâktuhei neh Tempil enkoltuhein ki sin an tho rang a nit. Hâlrivâm thillan neh ribôlna ranga mipui hong ilanhei khah lei that pêk thei an ta, mipui an lei ṭangpui rang a nit.

¹²Mipuiin mirmil an biak lâiah khan an thillanhei lei ilanpêktu an chang a, Israel insungkuahei ta rangin suala an ilîrna bulpui an nit sikin an chungah ki kuttum ki îṭhum rang a nit iti keimah, Pumapa PATHIAN hin ṭongrikhâmin kî ti a nit.

¹³Thiampu angkan ki sin an tho rang ni mak a, ki thil rithiang khom an nâi rang ni mak a, Mun Rithiangtak khom an lût rang ni mak e. Amahih thil porinche an lei ithohei sika an kuttum tuangna chu a nit.

¹⁴Ki in ingâktu neh a sunga ithorua om murdi itho ranga mi tirtôn rangin kî phun an nit,” a ti a.

¹⁵Pumapa PATHIAN khan, “Levi nam, Zadoka richi thiampuhei kha chu, Israelhei an rimang lâiah khan ki Tempil an vong khap a; khasikin, anni hin chu ne hong nâi thei an ti. Ki sin thông an ta, ki maah iding an ta; ribôlna sathâi neh thisen ki ziangah hong lan ngai an ti.

¹⁶Anmani bang hin ki Tempil hong lût an ta, ki mâichâmah sin thông an ta, Tempil inkhôm iruai an ti.

¹⁷Tempil sungitah thapuk kotbâi an hong lûtin patzâi rimia siam thlukthla an ribel rang a nit. Sungitah thapuka manih, Tempil sunga manih sin an tho zoron samula siam silbom an ihâk rang ni mak.

¹⁸An rithlân a suak nona rangin patzâi rimia siam lukôm kôm an ta, patzâi rimia siam tuman an ribun sa rang a nit, kongkhit an vong rang ni mak.

¹⁹Mipui omna thapuk putah ualah an fe rangin chu Tempila an sinthona thlukthlahei khah khek an ta, chontan rithiangah khan siang an ta, thlukthla dang an ribel rang a nit; khanonchu, thlukthla rithiang kha mipuiin tôn duai an ta, an ituang [37] rang a nit.

²⁰“Thiampuhei khan an lu an mêt inkol rang ni mak a, an sam an zua insei rei rang khom ni mak, a rup takkan an insei rang a nit.

²¹Thiampuhei khan thapuk sungitah ual an lût rangin uain an in rang ni tlak mak.

²²La nûnngâk ok khom seh, pasal lei isûn tâk manih, mi lei imâk tâk manih rêng rêng thiampu khan nupuiin a nei rang ni mak a, Israel nungâk rithiang bang khah a nei rang a nit.

²³“Thiampuhei khan thil rithiang neh rithiang ino hei, thil iser neh ser ino hei ki mihei an inrisei rang a nit.

²⁴Thubuai a om zoro khomin thiampuhei khan ki Dân ilekin an rêl rang a nit. Ki Dânhei neh thupêkhei angkan kût nikhuahei an mang rang a nit a, ki sabatnî an ser inrithiang rang a nit.

²⁵“Thiampu chu mithi ruak itônin borinnimin a om rang ni mak, ân zirna a nu manih, a pa manih, a naihei manih, ân zirpuipa manih, a farnu pasal la nei ino manih ruak kha chu tôn thei a ti; nikhomseh, borinnim chang ngir a ti.

²⁶A hong rithâr rithiang nôk zoi nung khomin sûn sarika sung chu a sin arngam ngêt rang a nit.

²⁷Khanchu, sungitah ual Tempil thapukah fêng a ta, Tempil sin a tho nôk theina rangin rithârna rangin ribôlna thillan a lan rang a nit. Keimah, Pumapa PATHIAN hin kî ti a nit.

²⁸“Thiampuhei ta rangin keimah hih an neisun chu ki nit. Israel lâiah dongtum dang îte ipe an nit rang ni mak a, ki thiampu sin an itho hih an dongtum chu a nit.

²⁹Bubâl thillan hei, sual ribôlna hei, siat ribôlna thillan hei kha thiampuhei dongtum rang a nit a, Israel rama ki ta ranga thil iser isia inran rêng rêng khom an ta rang a nit.

³⁰Thlâi chi tinrêng râ masahei neh ki zianga thilpêk rêng rêng chu thiampuhei dong rang a nit. Ibai isiam rêng rêngin thliam masatak kha thillanin thiampu an pêk rang a nit; khanchu, kha insungkua khah ṭhat kî vur rang a nit.

³¹Iva hei, ramsa hei, a tôta thi neh ramsa dang ithat rêng rêng chu thiampuhei khan an fâk rang ni tlak mak e,” a ti a.