Read Biete EZEKIELA 45 Bible Online

EZEKIELA 45 - Biete bible

EZEKIELA 45

¹Rangtum ranga nam tinin ram nin risem tikin PUMAPA ta ranga Mun Rithiang rang, a dung mûk sînginikah sângringaka sei, a khang mûk sînginika [38] rizat ram nin serinran rang a nit, kha ram khah ram iser ai nit rang a nit.

²Hi ram sungah hin mun iser bîk, Tempil mun rang, kil ilika nei, mûk rizarngaka ri-el banga rizat mun in-ôl rang a nit.

³Hi mun iser pumpuia rithokah hin a dungtiang mûk sînginikah sângringakah, a khangtiang mûk sîngkah rikhî suak unla, amakhah Tempil mun bîka serinran rang a nit.

⁴Amakhah mun rithiang bîk a nit a, Tempila PUMAPA sin ithotu thiampuhei ta rang a nit, an in sinna rang neh Tempil sinna rang a nit.

⁵Artiakah dang, ram a dung mûk sînginikah sângringakah, a khang mûk sîngka rizat khah Tempila sinthotu Levia chihei ta rang a nit a, amakhan an omna rang khua sin an ti.

⁶Mun iser kôlah khan khopui rang ram, a dung mûk sînginikah sângringakah, a khang mûk sângringaka rizat khopui rang rikhî suak unla, amakhah Israel mi rêng rêng omna rang a nit.

⁷Rêng ta rang khom ram inran pêk sa rang a nit. Mun Rithiang ramrîa rithokin tlâk tiang Mediteranean tuipui idênin nîng a ta; khosak tiang ramrî chu sak tiang ram mongna dênin nîng a ti; a dung kha Israelhei nam khatka ram dongtum tiakah a nit rang a nit.

⁸Israel ramah rêng dongtum rang chu hi ramhual hih nîng a ta, mi dang â neng rang ni mak a, hi bana ram a la om khah chu Israel namhein an dong rang a nit.

⁹Pumapa PATHIAN khan, “Nangmani, Israel roirêltuhei, nin isual sôt vang tâk na! Zâlrâta kuttum rithona neh risirdena hih marak zel rei. Idik takkan roirêl unla, thil dik sin rei. Ki mihei hih an rama rithokin neng isua tlak no rei. Keimah, Pumapa PATHIAN ngêiin nangni ki îril a nit hih.

¹⁰“Mi tinin varna dikhei neh ritâna dikhei [39] an mang ngêt rang a nit.

¹¹“Efa neh bath hih artluk bang rang a nit, efa sômkah kha homer khatkah a nit a, bath sômkah khom kha homer khatkah nîng a ta, homer hi rikhîna sûtna rang tak chu nîng a ti. Rikhî dân chu hingka hin a nit: “Homer khatkah kha efa sômkah, bath sômkah khom homer khatkah a nit.

¹²“Nin hîllung khom hingka hin a nit rang a nit: Gera sôminikah kha sekel nîng a ta, Sekel [40] sômirukkah kha Mina khatkah nîng a ti.

¹³“Thillan nin pêk rang dân chu hingka hin a nit: Bu chu puak sômirukka ata puakkah, Barli khom puak sômirukka ata puakkah, Oliv riak chu ṭin rizaka ata ṭinkah nin lan rang a nit. “Nin riak rikhî rang chu bath imangin rikhî unla, bath sômkah kha homer khatkah a nit a, Homer neh Kor hih artia bang a nit. “Israel rama bera vâi muna Bera chu rizanika chit ata bera khatkah nin lan rang a nit. “Bubâl thillan rang hei, hâlrivâm thillan rang hei neh ringeina thillan rang hei nin hong chôi ngai rang a nit; khanchu, nin sualhei izâ nîng a ti. Keimah, Pumapa PATHIAN ngêi thupêk a nit.

¹⁶“Ram sunga mi murdîn Israel rama roirêltu ziangah hi thilhei hih an hong pêk rang a nit.

¹⁷Thla thar kût hei, sabat nî hei neh kût dang dang heiah roirêltu khan Israel nam pumpui rithûlin hâlrivâm ribôlna mang rang ran hei, bubâl thillan rang hei, uain thillan rang hei a tum rang a nit. Israel mipui sual ribôlna thillan hei, bubâl thillan hei, hâlrivâm rang thillan hei neh ringeina thillan hei kha aman a tum rang a nit.”

¹⁸Pumapa PATHIAN khan, “Thla masa sûn masa takah khan serâtchal demnaboi that nin ta, Tempil nin thâr rang a nit.

¹⁹Thiampu khan hi sual ribôlna thisen ṭhenkah lâng a ta, Tempil inkot ibiangheiah, mâichâm kil ilikaheiah, sung ita ual thapuk kotbâi [41] ngulheiah khan a nâl rang a nit.

²⁰Thla thar a sûn sarinî-ah khan chângripalin manih, riatno manih sika thil thonsualhei ta rangin khangkah ngirah khan nin tho nôk rang a nit. Khangkah khan Tempil kha rithiangin nin isia rang a nit.

²¹“Thla thar a sûn sômleiilika nî-ah khan Kalkan Kût nin mang ngai rang a nit. Sûn sarika sung mi tinin chol pol ino bairiam nin fâk rang a nit.

²²Kût riphutnî takah khan rêng khan ama sual neh mipui sual ribôlna serâtchal a lan rang a nit.

²³Kût mang zoro sûn sarika sungah khan chu sûn tin serâtchal sarikah neh berachal sarikah demnaboi korong PUMAPA ziangah hâlrivâmin a lan ngai rang a nit. Sûn tin sual ribôlna rangin kêlchal khatkah khom a lan sa ngai rang a nit.

²⁴Serâtchal neh berachal ribôlnaa an ilanhei lukipah khan ibaidi efa khatkah chit ilan sa rang a nit a, ibaidi efa khatkan oliv riak Hin [42] khatkah a ṭang sa rang a nit.

²⁵“Thla sarina a sûn sômleiringa nî-a riphut ngai kût rang khomah khan sûn sarika sung khangkah ngirah khan a tho ngai rang a nit: sual ribôlna hei, hâlrivâm thillan hei, baidi neh oliv riak thillan hei a lan rang a nit,” a ti a.