Read Biete EZEKIELA 46 Bible Online

EZEKIELA 46 - Biete bible

EZEKIELA 46

¹Pumapa PATHIAN khan hingka hin a ti: “Sin tho zoro sûn rukka sung chu sak tianga chuanchung thapuk sungitah ual lûtna kotbâi kha arkhâr mai rang a nit; a sûn sarinî, sabat nî neh Thla Thar sûn masa takah khan chu iong rang a nit.

²Chuanchunga lûtnaah khan rêng kha lût a ta, thapuka chopui bulah khan â ding rang a nit. Hâlrivâm thillan neh ringeina thillan a hong ichôi kha thiampuhei khan lan an ta, thapuka rithokah khan Pathian chubai a ûn rang a nit; khante, a fe nung khomin kholoi idênin ikot khah ikhâr rang ni mak.

³Sabat nî fengin neh thla thar kût fengin kotbâiah hin Israel mi murdi PUMAPA maah ikhûnin chubai an ûn ngai rang a nit.

⁴Sabat nî-ah khan rêngin hâlrivâm thillan rang berate demnaboi irukkah neh berachal demnaboi khatkah a hong chôi rang a nit.

⁵Berachal lan rualin ibaidi efa khatkah a lan sa rang a nit, berate chit lan rualin chu a phal dôrkah ibaidi chu a lan rang a nit. Baidi efa khatkah chitin oliv riak hin (litar ithumkah) khatkah a hong chôi rang a nit.

⁶Thla thar Kût zoron serâtchaltuai demnaboi khatkah, berate demnaboi sarikah neh berachal demnaboi khatkah a lan rang a nit.

⁷Serâtchal lan rualin ibaidi efa khatkah, berachal lan rualin ibaidi efa khatkah, berate lan rualin a lukipah ibaidi a phal zâk zâkah lan a ta, ibaidi efa khatkah rualin oliv riak hin khatkah ilan sa rang a nit.

⁸Thapuk a hong lûtna kotbâi ngirah khan rêng kha a suak nôk ngêt rang a nit.

⁹“Kût zoroa ram sunga mipuihein PUMAPA chubai iûn ranga an hong zoron, mâr tianga kotbâia hong ilût kan sim tianga kotbâiah suak an ta, sim tianga kotbâia hong ilût kan mâr tianga kotbâiah an suak rang a nit. Tu khom a lûtna kotbâiah khan a suak nôk rang ni mak, itlûn thalkan kiangtianga kotbâiah khan a suak ngêt rang a nit.

¹⁰Rêng chu mipuihei neh lômkan hong lût a ta, mipui an suak tenan a suak nôk rang a nit.

¹¹Ruaiṭhe nikhuahei neh Kût zorohein serâtchal lan rualin ibaidi efa khatkah, berachal lan rualin ibaidi efa khatkah, berate khatkah chit lan rualin ibaidi an phal zâk zâkah ilan rang a nit. Khangkana ibaidi efa khatkah chitin oliv riak hin khatkah chit an hong lan sa rang a nit.

¹²“Rêng khan mahni lung suaka hâlrivâm thillan manih, ringeina thillan manih PUMAPA ziangah ribôlnaa lan nuamin chu sak tianga rithoka lûtna kotbâi iong pêk an ta, sabatnîa a tho ngai lam angkah takah khan hâlrivâm thillan neh ringeina thillan kha lan pêk an ti; khanchu, a suak zoi nungin kotbâi kha an khâr nôk rang a nit.”

¹³PUMAPA khan, “Kôlnisua kipah berate kumka mi, demnaboi kha PUMAPA zianga hâlrivâm thillanin an lan mai ngêt rang a nit.

¹⁴Baidi efa mun irukka ṭhena munkah neh â metna rang riak Hin mun ithumka ṭhena munkah zîng tin ilan sa rang a nit. Hi PUMAPA zianga thilpêk pêk rang dânhei hih kumkhuaka imang mai rang a nit.

¹⁵Berate hei, ibaidi hei neh oliv riak hei hi zîng tin PUMAPA ziangah kumkhuakan ilan mai rang a nit,” a ti.

¹⁶Pumapa PATHIAN khan hingka hin thu ai pêk a nit: “Rêng khan ama ram neia rithokin a naipa khatka ziangah ram a pêkin chu, kha a naipa ta nîng a ta, ama dongtum richon ai nit rang tâk a nit.

¹⁷A sinthotu khatka ziangah a ram kha a pêkin chu pêk kîr nôk kum [43] a hong tlungin chu rêng ta ngir ai chang nôk rang a nit. Ram chu rêng neh a naipahei bangin kumkhuakan an inei thei rang a nit.

¹⁸Rêng khan mipui ram richon a lâk pêk rang ni mak a, an ram dongtuma rithok khomin a ûmisua rang ni mak e. A naipahei ziangah ram a pêk khomin ama dongtum ram ngêia rithokin a pêk rang a nit. Khanchu, ki mihei hi an ram isutin a sirde rang ni mak.”

¹⁹Khanchu, mi khan sim tianga rithoka lûtna kotbâi bula thiampuhei omna chontan rithiang, mâr tiang isongah khan a ne ṭhui a. Hi chontanhei kôl, tlâk tiang panga mun iom kha a nen en a.

²⁰Hingka hin a ti a: “Hi mun hih thiampuhein sual ribôlna neh siat ribôlna sa rithiang an butna rang mun chu a nit; ibaidi ilana omhei khom hi munah hin an zêi rang a nit. Thil rithiang rêng rêng chuannuai tualzôlah an chôi suak rang ni mak, an chôi suak duaiin chu mipuiin an ituang rang a nit.”

²¹Khanchu, chuannuai tualzôlah khan a ne ṭhui a, â kil ikapah thapuk rikul a om a, a dung mûk sômilikah, a khang mûk sômithumka rizat a nit.

²³Thapuk tin khah â vêlkan lungbang a nit a, bang bulah khan ritaphei ai om a nit.

²⁴Mi khan, “Hihei hih thlâisin in, Tempila sinthotuhein mipui ribôlna sa an but pêkna rang mun chu a nit,” itin a ne ril a.