Read Biete EZEKIELA 47 Bible Online

EZEKIELA 47 - Biete bible

EZEKIELA 47

¹Tempil lûtnaah a ne ṭhui kîr nôk a. Chontan masa lûtna nuaia rithokah khan tui a zuang luang a, Tempil songna tiang sak tiang isongin a luang a. Tui kha Tempil lûtna nuaiah a luang thal a; sim tiang mâichâm omna sim tiang pangah khan a luang a.

²Khanchu, mi khan mâr tiang kotbâia rithokah khan a ne ṭhui suak a, khosak tianga lûtna kotbâi ipanin a ner vêlpui a. Kotbâi sim tiang pangah khan tui kha a zuang luang zan zan a.

³Ani khan arkhîna rolin tuidop ipanin mûk sângkah arkhî a, khatenah khan tui khah ipâl rangin a ne ril a. Tui khah ki keârtuihei tena inthûk a nit.

⁴Khanchu, mûk sângkah dang arkhî nôk a, kha munah khan tui khah a nen pâl nôk a, ker khûk tenah a hong phâk tâk a. A dop ipanin mûk sângkah dang arkhî nôk tenan chu tui khah ki kong tenah a hong nit tâk.

⁵Mûk sângkah a zuk rikhî nôkin chu vadungpui, pâl thei khâi ino, riliai banga kâi thei a nit tâk a.

⁶Ani khan ki ziangah, “Famthei miriam, iṭha takkan hihei hih richik roh,” a ne ti a. Khanungchu, vadung rikam imuangah khan a ne ṭhui kîr nôk tâk a.

⁷Imuang ki suakin chu vakôl kiangruaikah khan thingkung a lei iding fur a.

⁸Ani khan ki ziangah, “Hi tui hih khosak tiang a luang a, Jordan phâiah a luang thal a, Tuipui Ithi-ah ai luang lût a nit. Tuipui Ithi-ah khan a luang lût tenan chu Tuipui Ithi, ichitui khah tui itui a închang tâk a nit.

⁹Hi vadung hih a luangna kipah mîring chi tinrêng pung an ta, inga chi tinrêng pung an ti. Tuipui Ithi tui chu hi vadung hin inrithiang a ta, a luangna tinah ringna a îsua rang a nit.

¹⁰Engedi vadunga rithokin thlang tiang Eneglaim vadung idênin inga mantuhei tuipui rikamah om an ta, amakhan an lênhei phoi inhûl an ti. Mediteranean tuipuia inga chi dang dang tam dôrkah kha vadung khomah khan tam a ti.

¹¹Nikhomsela, tuipui rikama tuichirhei neh dîlhei kha chu inrithiang ni no nih. Ichi lâk suakna munin an iom mai rang a nit.

¹²Vadung pang kiangruaikah khan thing chi tinrêng chu ifah rua sua rangin mông a ti. An nâhei chu tiklâi khomin thêm ngai no nia, irâ sua bâng ngai no nih. Thla tin irâ mai an ta, Tempila rithoka tui zuang isuak khan â fa mai a, â râhei chu ifah rang nîng a ta, a nâhei chu damna nîng a ti,” a ti a.

¹³Pumapa PATHIAN khan hingka hin a ti: “Israel nam sômleiinikahei ram risem rang dân chu hingka hin nîng a ti: Josefa richihei khan rangtum inikah dong an ti.

¹⁴Nin chibulhei ziangah ṭongrikhâma hi ram hih ipeh rangin ki lei inkung a, atûn chu nin dongtum rangin ri-ang natkan risem ta rei.

¹⁵“Mâr tianga ramrîpui chu Mediteranean Tuipuia rithokin sak tiang Hethlon khua panin Hamath pialikota fe thalin Zedad khua dênin fêng a ta,

¹⁶Berothaah fe thal a ta, Damaska neh Hamath ramrîa om Sibraim ipâlin Hauran ramrî bula om Hazer Hatikon idênin fêng a ti.

¹⁷Khangkan mâr tiang ramrî khah Mediteranean tuipuia rithokin Damaska ramrî bula Hazar Enon idênin ai fe a nit. A mâr tiang Hamath ramrî a om a, amahih mâr tiang ramrîpui chu a nit.

¹⁸“Sak tianga ramrî chu Damaska neh Hauran ramrîa rithokin sim tiang ipanin fêng a ta, Jordan dung zui a ti. Thlang tiang kha Israel ram a nit a, khosak tiang kha Gilead ram a nit. Ramrî chu Tuipui Ithia Tamar idênin fêng a ti.

¹⁹Sim tiang ramrî chu Tamara rithokin simthlang isongin a fe a, Kades tui omna dênin. Khantaka rithokin mârthlang tiang Aigupta ramrî zuiin Mediteranean a tlung a.

²⁰Thlang tiang ramrî chu Mediteranean tuipui a nit a, mâr tiang Hamath khua a tlung a.

²¹“Hi ram hih a nam namin risem rei.

²²Thlasân nin ta, nin idong khah kumkhuaka nin ram rang a nit. Nin lâia nam dang nin saphun iom, hi rama nai ineihei khomin nin risem tikah dongtum an nei sa rang a nit, mi danghei angkah ngirin thlasânna khomah ipot thei an ti.

²³Khangkana nam dang nin saphun â om sahei khan an omna nam ram dongtum an risem tikin an lâiah ṭang sâng an ti. Keimah, Pumapa PATHIAN hin kî ti a nit.”