Read Biete EZEKIELA 48 Bible Online

EZEKIELA 48 - Biete bible

EZEKIELA 48

¹Mâr tiang ramrî chu thlang tiang Mediteranean Tuipuia rithokin sak tiang Hethlon khua panin Hamath khuaa fen Enon khua a tlung a, Damaska neh Hamath rî richôina ten idênin a fe a. Mâr tiang ramripuia rithokah hin thlang tiang panga tuipuia rithoka sak tiang ramrîpui idênin ardotin an risem rang a nit; mâr tianga rithokin sim tiang ipanin an risem rang a nit: Mâr tiang takah Dana om a ta, khanung Asera, Naftalia, Manasea, Efraima, Reubena, Juda ân dotin an iom rang a nit.

⁸Juda ramrî dep, sim tiangah khan mi dang dongtum dôrka lian, ram iser, Tuipuia rithoka sak tiang ramrîpui idênin a ranin nin sia rang a nit. Mâr tiang ata sim tiang mûk sînginikah sângringakah rizat nîng a ta, sak tiang ata thlang tiang khom mûk sînginikah sângringakah a nit rang a nit. Hi ram iser sungah hin Tempil a om rang a nit.

⁹Hi ram hual inran sungah hin PUMAPA ta rang bîk, ram a dung mûk sînginikah sângringakah, a khang mûk sînginikah nin zua rang a nit. Hi ram sungah hin Tempil a om rang a nit.

¹⁰Thiampuhei khan hi mun rithiang hual sungah hin ram, sak tiang ata thlang tiang mûk sînginikah sângringakah, sim tiang ata mâr tiang mûk sîngkah an dong rang a nit. Hi ram hual sung inlâina takah hin PUMAPA Tempil chu a om rang a nit.

¹¹Ama ram rithiang hual sung hih Zadoka richia thiampuhei omna rang a nit. Levia richi thiampu danghei khan Israelhei thil thonsuala an rimang lâiah khan an zui sa a; khanniseh, anni hin chu iamom takkan ki sin an itho a nit.

¹²Khasikin, Levia richihei omna kôl, mun rithiang takah an om rang a nit.

¹³Thiampuhei ram sim tiang pangah khan Levia chihei khomin ram bîk an nei sa rang a nit. Hi ram khom hih sak tiang ata thlang tiang mûk sînginikah sângringakah, mâr tiang ata sim tiang mûk sîngkah a nit rang a nit.

¹⁴PUMAPA ranga serinran ram hual hih hi ram pumpuia mun ṭhatna tak a nit a; hi ram hih zuar thei no nia, ram dang neh inrithleng thei ni no nia, mi dang khom peh thei no nih. Ram rithiang a nit a, PUMAPA ta ranga serinran a nit.

¹⁵Hi mun bîk sunga ram la tlong, mûk sînginikah sângringakah hi chu serinran ni sa mak a, â nuamka om theina a nit a, ram nei thei an ta, idong khom dong thei an ti. Khopui chu ân lâina takah om a ta,

¹⁶Kil ilika nei, mûk sângilikah rizarngakah ri-el bang, kil tinah nîng a ti.

¹⁷Khopui ivêlkan ram itlong mûk rizanikah sômringaka rizat izua rang a nit.

¹⁸Khopui ivêlka ram izua a nit nunga ram a bân la om, sak tiang mûk sîngkah, thlang tiang mûk sîngkah hi chu khopui sunga omhein rikula an nei rang a nit.

¹⁹Tu nam khom, khopui sunga om kangânin chu ram khah rikulin tho thei an ti.

²⁰Khaangkan ram hual inlâina taka mun izua bîk kha kil ilika ri-el bang, a dung neh a khang mûk sînginikah sângringakah a nit rang a nit. Hi hual sungah hin khopui kha ai om sa rang a nit.

²¹Tempil omna hei, thiampuhei omna hei, Levia chihei omna hei neh khopui omna, hi ram hual sak tiang neh thlang tianga ram a bân la om kha rêng ta rang a nit. Thlang tiang pangah Mediteranean Tuipui, sak tiang pangah khosak ramrîpui idênin a ta a nit a, mâr tiang pangah Judai ram rî archôipui a, sim tiang pangah Benjamin ramrî ai dên a nit.

²³Hi ram ikhâi bîk sim tiang pang hi, Mediteranean tuipui ata khosak ramrîpui idênin Israel nam la omhei khan ardotin an risem rang a nit. Hingkan ardotin mâr tianga rithoka sim tiang dong an ti: Benjamina namin mun iser sim tiang pang dong an ta, khanung Simeona, Isakara, Zebuluna, sim mong takah Gada namhei om an ti.

²⁸Gada richihei dongtum ram sim tiang panga ramrî chu ram pumpui sim tiang pang ramrîpui ni zel a ta, Tamar ata simthlang tiang isongin Kades tui omna mun tenah a fe a, khantak ata mârthlang tiang panga Aigupta ramrî zuiin Mediteranean Tuipui tenah ai dên a nit.

²⁹Pumapa PATHIAN khan, “Israel namhein an ram dongtum rang an risem rang dân chu khangkah khan a nit,” a ti a.

³⁰Jerusalem khopui lûtna kotbâi sômleiinikah a om a, khopui hi kil ilika nei a nit a, kil tin kha mûk sângilikah rizarngakah chit a nit. Israel richihei nam riming riputin kotbâi riming an be a, kil tinah kulpui kotbâi ithumkah chit ai om a nit. Mâr tianga kotbâi ithumka riming chu Reubena, Juda neh Levia a nit a; sak tianga kotbâi ithumka riming chu Josefa, Benjamina neh Dana a nit a; sim tianga kotbâi ithumka riming chu Simeona, Isakara neh Zebuluna a nit a; thlang tianga kotbâi ithumka riming chu Gada, Asera neh Naftali a nit.

³⁵Kil ilika khopui kulbang pumpui sei dôr chu mûk sînglei sângiriatkah a nit. Atûna rithokin chu hi Khopui riming hih, “PUMAPA OMNA,” iti ni tâng a ti.