Read Biete EZEKIELA 5 Bible Online

EZEKIELA 5 - Biete bible

EZEKIELA 5

¹PUMAPA khan, “Famthei miriam, luvoi chem angkana ngaihrin khandai lan la, ni lu neh ner khamul voi inkol vang roh. Khanungchu, ni sam neh ner khamul kha var inla, buk ithumkan ṭhen roh.

²Jerusalem ni hual sung sûn a hekin chu buk ithumka ṭhena bukkah kha khopuiah khan meiah hâl roh. Buk ithumka ṭhena bukkah dang kha khopui putiang khandaiin tan chit roh. A dang bukka la om kha phâivua insêm rithekdar chit inla, keiman khandaiin rizûl thal ki ti.

³Sam ichînkah kha ni puan môrah ifûn inla,

⁴A ṭhen kha la suak inla, meiah hâl inla, kâng riseh. Khantaka rithokah khan Israel nam pumpui lâiah mei ai chok indar rang a nit,” a ti a.

⁵Tinrêngthothei PUMAPA khan, “Jerusalem chu en ta u, rammual inlâina takah ani chu kî sia a, ram danghei arkhîlkan ken om a.

⁶Khanniseh, Jerusalem khan ki thupêkhei ikala rihelin nam danghei nêka sual ual neh arkhîlka ramhei nêka a thu zôm nozia a înlang a nit. Jerusalem khan ki thupêkhei a nôl a, ki dânhei ai zôm nuam ino a nit.

⁷Khasikin, Jerusalem, atûnah hin Keimah, Tinrêngthothei PUMAPA thu sîr hih ringai roh. Ki dânhei neh ki thupêkhei zôm nuam loiin ner khîlka om nam danghei nêka natinsat ualin thil isual ni tho a. Nam danghei balam kha ni lâk tâk a.

⁸Khasikin, Keimah, Tinrêngthothei PUMAPA hih ne râl ki nit tâk iti nang ki îril a nit. Nam danghei mu chung ngêiah kuttum nang kî tho ngêt rang a nit.

⁹Ni thil tho porinche tak takhei sikin ki lai tho ngai ino, itho nôk khom kî tum tlak khâi ino kuttum ina tak kha Jerusalem chungah ki îṭhum rang a nit.

¹⁰Kha sikah khan Jerusalema nunepahei khan an naihei sa fâng an ta, naihei khan an nunepahei sa fâng an ti. Kuttum nang kî tho rang a nit, â thi bânhei khom kil tinah nangni ki îchekindar rang a nit.

¹¹“Keimah hi Pathian iring ki nit, amahih Tinrêngthothei PUMAPA ṭongbâi suak a nit. Nin thiltho porinche tak takhei sikah khan ki Tempil chu nin borinnim tâk a. Keimah ngêiin lungkhamna boi riaikan nangni ki înuai inrimang rang a nit.

¹²Nin lâia mi, mun ithumka ṭhena munkah khah ripuiin neh iṭâmin khopui sungah thîng nin ta, mun ithumka ṭhena munkah khopui putiang khandaia insât that nîng nin ti. A dang mun ithumka ṭhena munkah chu phâivua insêm rithek ki ta, khandaiin rizûl thal ki ti.

¹³“Ki ningthik neh ningmur ritêl kha ke lungtluk mâkah nin chungah ki îṭhum rang a nit. Kha thilhei khah a tlung khai tikin chu, Keimah, PUMAPA hin ki ṭhatnemringaina sikin khahei khah kî tho a nit iti reh tâng nin ti.

¹⁴Nin rikhîlka om nam thleng rilôihei khan nangni musit an ta, nangni nâi nuam khâi no nih.

¹⁵“Ki ningthik neh ningmur ritêla kuttum nangni ki tho tenan chu nin kôlvêla namhei chu an rilo inthing a ti. Nangni musit an ta, nangni nuiso an ti.

¹⁶Nin fâknêk muna nârhei isat ki ta, iṭâmin nangni in-om ki ti. Nin thipuina ranga thal nangni lenthal angkana ṭâmpui inrik khah nangni ki întuang rang a nit.

¹⁷Nin naihei ithat rang iṭâm banah ramsahei tir ki ta, sê that an ti. Nin thina rangin ripui hei, thisen suakna hei, khandai hei ki înlêng rang a nit. Keimah, PUMAPA hin kî ti tâk a nit,” a ti a.