Read Biete EZEKIELA 6 Bible Online

EZEKIELA 6 - Biete bible

EZEKIELA 6

¹PUMAPA thu ki ziangah a zuang tlung a,

²“Famthei miriam, Israel rama itlânghei tiang ma song inla, ki thucha iril roh.

³Israel rama tlânghei chu PUMAPA thu ringai rangin iril roh, Keimah, Pumapa PATHIAN hin mualhei, tlânghei, varuam inthûkhei neh phâihei ziangah hingka hin kî ti a nit: Ringai ta u, keimah ngêi hin nin chungah khandai ilek ki ta; nin mirmil chubai ûnna bôlkuanghei chu ki îsiat riai rang a nit.

⁴Nin mâichâmhei chu isim ki ta, nin mirmil indinghei chu ito khoi chit ki ti. Nin lâia â thihei ruak kha nin mirmilhei maah pai ki ti.

⁵Israel mihei ruak chu chubai an iûn ngai mirmilhei kôlah thekindar ki ta; an ruhei khom an mâichâm kôlah ithekindar ki ti.

⁶Israel rama khopui murdi chu isehchit ki ta, an mâichâmhei neh an mirmilhei chu tôkrinôi chitin om a ta, an namhoi mâichâmhei khom ito khoi chitin om a ta, an kutsuak murdi inuai inrimang vangin om a ti.

⁷Mun tinah mithi ruak chu idal phung a ta; khanchu, a la dam isunhei khan PUMAPA ki nit iti reh tâng an ti.

⁸“Ṭhenkah chu thina zôkin siam ki ta, nam dang lâiah, ram tinah ichekindar ki ti.

⁹Kha thina zôkhei kha bôiin itâng an ta, ram tinah richekindar an ti. Nam dang lâiah rithekindara an om nungah khan ne reh suak an ta, an inrê a, nung an ne song sikin kuttum ithon mualphoi kî sak a nit iti reh suak an ta, mirmil tiang mâi ingat a, thil porinche tak tak an lei tho ngai sikah khan an khâtin ritir tâng an ti.

¹⁰Keimah hi PUMAPA chu ki nit ngêt iti riang an ta, ‘Hi thil hih kî tho rang a nit, kî ti khah kî ti pai ni mak,’ iti khom reh tâng an ti,” a ti a.

¹¹Pumapa PATHIAN khan, “Ni kut ifûn inla, ni ke itet roh. Israelhein thil ṭhano porinche tak tak an itho ngai sikah khan ringaiinsian ihûi roh. Khandaia that nîng an ta, iṭâm neh ripui ituangin thîng an ti.

¹²Ram ilah taka omhei chu ripuiin thîng an ta; inâia omhei chu khandaiin thîng an ta; hintaka a la om isunhei chu voniṭâmin thîng an ti. Hingka takah hin ki ningthik rikhêl chu an chungah ki îṭhum rang a nit.

¹³Mirmilhei zianga namhoi an hâlna ngai, an bôlkuangheiah, itlângsîpheiah, thing dâilîmheiah, saso thingkung nuaiheiah, an mâichâm mirmil kôlheiah mithi ruak arthek chût tenan chu mi tinin PUMAPA chu ki nit iti reh tâng an ti.

¹⁴An chungah ki kut ilek ki ta, an ram chu ki îsiat chit rang a nit. Sim tianga ramchâra rithokin mâr tianga Ribla khopui idênin ramchâr nêka ramchârin siam ki ta; Israelhei omna mun rêng rêng zua viat no ning e. Khanchu, mi tinin PUMAPA chu ki nit iti reh tâng an ti,” a ti a.