Read Biete EZEKIELA 7 Bible Online

EZEKIELA 7 - Biete bible

EZEKIELA 7

¹PUMAPA thu chu ki ziangah a zuang tlung nôk a.

²“Famthei miriam, Israel ram chungchâng thu keimah, Pumapa PATHIAN hin ki îsîr chu amahih a nit. Ram pumpui mongna chu a tlung tâk.

³“Israel, mongna chu a hong itlung a nit tâk. Ki ningthik ni chungah iṭhum ki ta, ni thil tho lam angkah takin nang kî rêl rang a nit. Ni om dân porinche tak takhei sikah khan kuttum nang kî tho rang a nit.

⁴Lung nang inkham no ning a, nang zua no ning e. Ni thil porinche thohei sikah khan kuttum nang kî tho ngêt rang a nit; khanchu, PUMAPA ki nit iti reh tâng ni ti,” a ti a.

⁵Pumapa PATHIAN khan hingka hin a ti, “Siatripna chungah siatripna dang nin chungah a hong tlung thiai tâk.

⁶Zoro mong, mongna tak tak, ni mongna chu a hong itlung tâk a nit.

⁷Nangmani, ram sunga omhei, rangin mongna a hong itlung tâk a nit. Itlânga bôlkuangheia râiifân takka nin izâi ngai kha buaina rihûn a thûl rang zoro a hong itlung thiai tâk a nit.

⁸“Atûn zoro sôt inote sungin ki ningthikna chu nin chungah ki îṭhum rang a nit. Nin thil tho lam angkah takin nin chungah roi rêl ki ta, nin om dân porinchehei khah nangni thung ki ti.

⁹Lung nangni inkham no ning a, izua khom nangni zua no ning e. Nin thil porinche thohei sikah khan kuttum nangni kî tho rang a nit. Khanchu, keimah, PUMAPA ngêi hin kuttum nangni kî tho a nit iti reh thei tâng nin ti,” a ti a.

¹⁰Ringai rei, siatripna nikhua chu a hong tlung thiai tâk e, a hong itlung tâk a nit. Ritûrna a hong pung a, risongna khomin a tentîr ai phâk tâk a nit.

¹¹Ringo rikhalna khan thil ṭhano ual â sua intam a. An thil nei murdi, an richonhei, an inthangnahei, an roinpuinahei a rêngkan îte izuan om no nih.

¹²A zoro chu a hong itlung thiai a nit. Pathian kuttum kha mi tin chungah a ṭum rang sikin thil izuar neh richo khan rifena îte a nei no rang nikhua a hong inâi thiai tâk a nit.

¹³Rivai mihei khan an îchân tâk imu nôk rangin an ringna khan huam khâi no nih. Pathian ningthikna chu mi tin chungah ai ṭum rang tâk a nit. Mi sualhei chu tute â dam suak om tlak no nih.

¹⁴Bekul a hong iring a, mi tin an risiam diam tâk a. Khanniseh, ridoina muna fe rang tute om khâi no nih. Pathian ningthikna chu mi tin chungah ri-angnat kan ai tlung rang tâk a nit.

¹⁵Putiang kotsuaheiah khandaiin a lei iruang chak a, insungheiah iṭâm neh ripui a lêng a. Ram pupêt chu khandaiin thîng an ta, khopui sunga omhei chu ripui neh iṭâmin thîng an ti.

¹⁶Kha intakna zôkhei chu itlânga, ichulram vaṭhu angkan irung an ta, an sualnahei sikin an rêngkan iṭapin irung an ti.

¹⁷Mi tin bân ritha rizal a ta, an rikhûkhei inthing a ti.

¹⁸Borapuan sil an ta, iṭi rilônthingin om an ti. An luhei voi inkol an ta, an rêngkan mualinphoi tak tak an ti.

¹⁹An rângkachakhei neh an tangkaruahei chu tolâiheiah nimnok angkan pai an ti. PUMAPA khan a ningthik â ṭhum nikhuan chu an rângkachak neh tangkarua khan inzôk thei no nia, anmani suala inlîrtu a nit sikin fâknêk richona rang khomin mang thei khâi no nih.

²⁰An thil ilu tak tak, an lei risongpuina ngai kha mirmil porinche isiamnan an lei mang ngai a; khasikin, PUMAPA khan an ta rangin thil porinche a închang pêk tâk a nit.

²¹PUMAPA khan, “Anni chu ram dang mihei inrok ki ta, mi sualhei khan an richonhei chu dong pêk riai an ta, porinche takka siamin inbor pêk an ti.

²²Inruhein ki Tempila lûtin an iroka porinchea an siam tikin nung song ki ta, châng viat no ning e.

²³“Thiltinrêng a buai zoi tâk a, ram pumpui chu thisen isuanan a sip tâk a, khopui sungheiah ritôk rihêmna a sip zoi tâk.

²⁴Khasikin, nam lâia nam isualtak hong ṭhui ki ta, nin inhei chu nangni dong pêk an ti. Nin mun rithianghei chu namhei khan borinnim an ta, nin mi râthei chu rizal rizualin om an ti.

²⁵Thil inrît tak chu a hong itlung thiai mai tâk a nit. Thlangamna zong nin ta; khanniseh, mu tlak no tin u.

²⁶Siatripna chu siatripna dangin zui a ta, thuthang ṭha no khom tui iluang angkan ai tlung rizom mai rang a nit. Zânthlahei ziangah thil omzia ridon nin ta, Thiampuhei khomin mipui inrisei rang îte nei khâi no nia, upahei khomin roisak rang dân îte reh khâi no nih.

²⁷Rêng chu â lung kâng a ta, milianhei chu indôpnan tuam a ta, ram sunga mipuihei chu rilônthingin om riai an ti. Nin sintho angkah takin kuttum nangni thông ki ta, mi danghei nin rêl ngai lam angkah takin nangni kî rêl rang a nit. Khanchu, PUMAPA ki nit iti reh tâng nin ti,” a ti a.