Read Biete EZEKIELA 8 Bible Online

EZEKIELA 8 - Biete bible

EZEKIELA 8

¹Bôia kin itâng kum irukna, a thla rukna, a sûn ringanî-ah khan Juda ruaituhei neh munkan ki inah kin iṭhung a. Voikazelin Pumapa PATHIAN sinthotheina ritha kha ki chungah a zuang tlung a.

²Chungtiang ki hang tangin chu miriam mêl riput mei i-ang hih ki mu a, a kong nuaitiang chu mei angkana vâr a nit a, a kong chungtiang chu dâr ritle angkana ritle a nit.

³Kut i-ang hin ki bariksamah a ne man a. Khanungchu, inlârnaah khan Pathian rithla khan rivân tiang risâng takah a ne vuangpui a, Jerusalemah a ne ṭhui tâk a. Tempil tualzôl sung ita ual lûtna mâr tiang kotbâi, Pathian ningmur isaktu mirmil omna a khan a ne ṭhui a.

⁴Israelhei Pathian roinpuina, Kebar vadung rikama kî mu angkana ngir khah ki mu a.

⁵Pathian khan ki ziangah, “Famthei miriam, mâr tiang soh en roh,” a ne ti a. Mâr tiang kha ki en a, mâichâm omna mâr tiang kotbâi kôlah khan Pathian ningmur isaktu mirmil kha ki mu a.

⁶Pathian khan ki ziangah, “Famthei miriam, an thil tho hih ni mu na? Israel naihein thil porinche tak tak an itho hih en ta, ki Mun Rithianga rithokin an ne iûm inlat tîr tîr a nit hih. Hi nêka porinche ual hih la mu thiai mai ni ti,” a ti a.

⁷Tempil tualzôl lûtnaah khan a ne ṭhui a, bang ipep khah a nen mu a.

⁸Ki ziangah, “Famthei miriam, bang ipep hih inrizat roh,” a ne ti a. Ki hang inrizatin chu inkot hih a lei om a.

⁹Ki ziangah, “Lût inla, hin taka thil isual porinche an ithohei hih va en roh,” a ne ti a.

¹⁰Khanchu, ki va lût a, ki va en a, thil porinche tak tak, irûl rilimhei, ran rithiang ino rilimhei, Israelhein chubai an iûn ngai thil murdi rilimhei, bangah khan a lei chuang fer fur a.

¹¹Safana naipa, Jazania lômin Israel ruaituhei sômsarikah an lei om a, namhoi hâlna an chôi chit a, an thil hâl khû khah a lei zîng khap a.

¹²Pathian khan a ner don a, “Famthei miriam, Israel ruaituhein inrûkka thil an itho hih ni mu na? An rêngkan mirmila sip chontanah an mirmil chit chubai an iûn a nit hih. An thiam richangna ṭongbâi chu, ‘PUMAPA khan imu lua ne mu mak. Ram hih ai mâk tâk im ki ta?’ an ti ngai,” a ti a.

¹³Khanungchu, PUMAPA khan ki ziangah, “Thil porinche ual an itho la mu thiai mai ni ti,” a ti a.

¹⁴Khanchu, mâr tianga Tempil kotbâiah khan a ne ṭhui nôk a, amakhan nupanghei an lei ṭap a, pathiannu Tamuzi [3] an lei ṭâ a.

¹⁵Ki ziangah khan, “Famthei miriam, amahih ni mu na? Hi nêka thil porinche ual an ithohei la mu thiai mai ni ti,” a ti a.

¹⁶Khanchu, Tempil hual sung ita ual takah khan a ne ṭhui a. Mun Rithiang lûtna kôl mâichâm neh thapuk kârah khan mi sôminika ringakah vêl hi an lei om a. Mun Rithiang khah nung isongin nisua tiang mâi an ngat a, inî hong isuak khah chubai iûnin an ikhûn a.

¹⁷PUMAPA khan ki ziangah, “Famthei miriam, amahih ni mu na, Israelhei sintho hih thilte pai im ai nit hi? Ram chu ringo rikhalna an insip a, ki ning inthik ual rangin hi mun idênin hi thil porinchehei hih an itho a nit. En ta, an nâr kha sôlin an ihup [4] a nit so!

¹⁸Khasikin, kei khom an chungah ningthikin sin kî tho rang tâk a nit. Lung inkham no ning a, izua khom zua no ning e. Iring takkan ne sam khom sela, ringai pêk tlak no ning e,” a ti a.