Read Biete EZEKIELA 9 Bible Online

EZEKIELA 9 - Biete bible

EZEKIELA 9

¹Khanungchu, iring takka Pathian ikhêk ki riat a, “Nangmani khopui kuttum itho ranghei, hin hong unla, nin râlthlukhei khom hong chôi rei,” a ti a.

²Mâr tianga om Tempil kotbâi sak ita uala rithokin voikazelin mi irukkah an hong zel a, an sikah râlthluk an chôi chit a. An lâia khatkah khan puan rivuai riphân a sil a, pen neh a tui a chôi a. An rêngkan dâr mâichâm bulah khan an iding a.

³Khanungchu, Israelhei Pathian ompuina vâr ri-el kha a omna ngai Cherubhei chunga rithoka rikiangin Tempil lûtna kotbâi kôl tiang arthon a. PUMAPA khan puan rivuai riphân isiltu khah a koi a,

⁴a ziangah khan, “Jerusalem khopui hih rifang suak inla, kho sunga thil porinche an ithohei ân khôk itia ngaiinseh ngaihei chu an ichalah risin seh roh,” a ti a.

⁵Keima riatah, mi danghei ziangah khan, “Ani khah zui unla, khopui rifang suak riai unla, kut tlâk ta rei. Tute lunginkham no unla, tute zua no rei.

⁶Itarhei, tlangvâlhei, nungâkhei, pahei, nuhei neh naipanghei that riai rei. Khanniseh, an ichala risin ineihei chu tôn viat no rei. Hi ki Tempila rithokah hin ithat phut rei,” a ti a. Khanchu, Tempil sunga ruaitu omhei kha an hang that masa tâk a.

⁷Pathian khan an ziangah, “Tempil chu borinnim unla, a tualzôlhei mithi ruakin insip rei. Sin itho phut ta rei,” a ti a. Khanchu, khopuia mihei ithat kha an phut tâk a.

⁸Mi an that lâi khah ki khât bangin ki en a, ke bok a, ke khêk a, “Pumapa PATHIAN, Jerusalem chunga ni ningthik sikin Israel rama mi la om isunhei hih nî that vang rang mani?” ki ti a.

⁹Pathian khan a ne sâm a, “Israelhei neh Judahei sualna hi a natinsat tak tak a; ram chu thisen isuanan an insip a, khopui khom ringo rikhalnan ai sip a nit. An bâi rihângna chu, ‘PUMAPA khan ram chu a mâkrak tâk a, ani khan îte mu khâi mak e,’ an ti a.

¹⁰Khasikin, kei khomin anni chu lunginkham no ning a; mi danghei an tho lam angkah takin an chungah kî tho rang a nit,” a ti a.

¹¹Puan rivuai riphân isiltu khah a hong a, PUMAPA ziangah, “Ni thupêkhei chu ki len zoi tâk,” a ti a.