Read Biete DANIELA 1 Bible Online

DANIELA 1 - Biete bible

DANIELA 1

¹Juda rêng Jehoiakima inlal kum ithumnaah khan Babilon rêng Nebukadnezara khah Jerusalemah a hong a, a hong rûn a.

²PUMAPA khan rêng Jehoiakima kha ân man a, Pathian ina bûrbêl ṭhenkah khom a kutah a pêk a. Ani khan Babilona pathian inah a fepui a, a râllâk neinunhei chu a pathian sum inah a sia a.

³Rêng khan ruaitu lian Aspenaza khah a râlman Israel naihei lâia mi rêng richi, milian naihei tlangvâl ṭhenkah demnaboi, mêl iṭha, beng ivâr, thil ithiam thei, riatna nei mi, rêng ina châng ithiam rang mi hong rithlang rangin thu a pêk a. Khahei khah Aspenaza khan Babilonhei ṭong itep neh riziak ân risei rang a nit.

⁵Khabanah khan rêng khan anni kha rêng insungkua ifâk ngai fâk itui tak neh uain kha ipeh sa rangin thu a pêk a. Khangkan kum ithumka sung enkol an ta, kha rizoiin chu rêng makungah an îding rang a nit.

⁶Khante, rithlanghei lâiah khan Juda mi Daniela, Hanania, Misaela, neh Azaria hei an ṭang a.

⁷Ruaitu lian khan riming ithar ân riput chit a, Daniela kha Beltesazara a sak a. Hanania kha Sadraka, Misaela kha Mesaka, Azaria kha Abednego ai sak a nit.

⁸Daniela khan a lungrilin rêng fâk neh uainah khan amah innim loi rangin a tum ngit a; khanchu, Aspenaza khah a ngên a,

⁹Pathianin Daniela chu Aspenaza lungkhamna ân dong a.

¹⁰Aspenaza khan Daniela ziangah, “Nin fâk rang neh nin in rang inkungtu rêng inthang kha kî ṭi a nit; nin mêl hi nin rual tlangvâl danghei nêka seh ualin a mu duaiin chu rêng khan a ne ithat rang kêng,” a ti a.

¹¹Khanchu, Daniela khan amah neh a mal ithumkahei enkoltu ranga Aspenazan ai phun pêktu ziangah khan a fe a.

¹²A ziangah, “Nang kî ngên a nit, ni suakhei hi sûn sômkah ne fia roh, ifah rang thlâi iring neh iin rang tuifim ringot ne peh riseh.

¹³Ni makungah kin ilang dânhei neh rêng fâk itui tak tak ifa tlangvâlhei ilang dân khah inrichak ni sela, ni mu dân angkah takin ni suakhei chungah hin la tho roh,” a ti a.

¹⁴Khanchu, hi thu hih ṭhat a ti pui a, sûn sômka sung a fia tâk a.

¹⁵Sûn sômka nungah khan rêng fâk itui tak tak ifatu tlangvâlhei murdi nêkah khan an mêl â lang ṭhat ualin an taksa khom a ṭhat ual tâk a.

¹⁶Khanchu, enkoltu khan an fâk rang rêngin ai pêk bu neh uain khah a khâi paih a, thlâi iring ringot a pêk tâk a.

¹⁷Hi tlangvâl ilikahei hi thiamna, vârna, riatna, bengvârna tinrêng Pathianin a pêk a. Khabanah khan Daniela chu inlârna neh rimang rilfia theina a pêk sa tâk a.

¹⁸Rêngin anmani hong ṭhui lûtna ranga sûn ten kum ithumkah kha a hek tenan chu Aspenaza khan tlangvâlhei chu Nebukadnezara makungah khan a ṭhui a.

¹⁹Rêng khan a lei isôn chit a, annihei lâiah khan Daniela, Hanania, Misaela neh Azaria hei angkana rêng rêng tute omak a. Khanchu, rêng insungah khan an om tâk a.

²⁰Thuvârhei neh thil ireh rang rua murdi rêngin a irdon kangân chu a ram pumpuia thlasân ithiamhei neh mitvaidôi ithiamhei murdi riat nêkan a bâk sômkan an riat a.

²¹Daniela chu Persia rêng Kura khan Babilon a hong rûn idênah khan rêng inah khan a om tâk a.