Read Biete DANIELA 10 Bible Online

DANIELA 10 - Biete bible

DANIELA 10

¹Persia rêng Kura inlal kum ithumnaah khan Daniela, arming Beltesazara an isak ziangah khan thu a zuang tlung a. Kha thu khah â dik a nit; nikhomsela, â rethiam intak tak a nit. Khanchu, thucha kha inlârnaah irilfia pêk a nit.

²Kha zoro lâiah khan hapta thumka sung chu lusûn angkan beidongin ki om a.

³Fâknêk itui rêng rêng fah mang a, sa manih, uain manih khom ki bâiah lût mak a, hapta thumka sung chu riak khom rithu mang e.

⁴Thla masatak, a sûn sôminika ilika nî-ah khan vadung roinpui tak Taigris rikamah khan ke ding a.

⁵Ki mit ki hang inlêng a; puan zâi rimi sila rivo mi khatkah ki mu a. Ufaz rângkachak rithiang kongkhit a vong a.

⁶A takpum chu beril lungilu angkah a nit a, a mêl chu khothlâr angkah a nit. A mit chu meichok vâr angkah a nit a, â bânhei neh a kehei chu sumsen ritle angkah a nit a, a ṭong irî chu mipui rihu angkah a nit.

⁷Kha inlârna kha keimah bangin ki mu a; ki kôla omhei khan chu inlârna kha mu mak a; khanniseh, iṭha takkan an rilo ân thing a, lâizâm an tho a; an ribîk riai tâk a.

⁸Khanchu, ki khât bangin ki om tâk a, kha inlârna roinpui tak kha ki en mai a. Keimaah khan ritha rêng rêng om khâi mak a, ki mêlhei chu tute riat theino rang dôrkan a hong danglam tâk a.

⁹Khante, a rôl irî ki hang riatin chu nuaiah ker phek rak a, rammual tuilôn reh loiin ke bok khap tâk a.

¹⁰Khanungchu, kut hin a ne zuk tôn a, bokrivâk rang angkan a ne sia a; ki lan thing mai a.

¹¹Vân Angel khan ki ziangah, “Daniel, Pathianin lung nang ai thlung a nit. Iding inla ni zianga thu ke sîr rang hi iṭha takkan ringai roh. Atûnah hin ni ziangah zuang itir ki nit,” a ti a. Thu khah ki ziangah â sîr zoiin chu inthing pumin ke ding tâk a.

¹²Khanchu, ani khan ki ziangah, “Daniel, ṭi no roh, riatthiamna ni nei theina ranga ringaiitlôm takka ni om nî-a rithokah khan ni ṭongṭaina chu Pathianin nang a irngai pêk tâk a nit. Ni ṭongṭaina sâm rangin kî zuang a nit.

¹³Persia ram ilal khan sûn sôminikah sûnkah a ne doi a. Khanungchu, Persia ramah ki khât banga imaraka om ki nit sikin vântirtônhei ruaitu Mikaela kha ne san rangin a zuang a.

¹⁴Sûn matona ni mihei chunga thil la tlung ranghei nang inrethiam rangin ni ziangah kî zuang a nit. Hi inlârna hi sûn matona thil la hong iom rang a nit,” a ti a.

¹⁵Kha thuhei khah ki ziangah â sîr mai lâiah khan kei chu ke khûn ṭian a, ṭong thei loiin ki om a.

¹⁶Khanungchu, vân Angel miriam angkah taka lang khan ki mûr a ne tôn pêk a; khanchu, ki ṭong thei tâk a. A ziangah khan, “O Epu, hi inlârna hin a nen rizal tak tak a, ker lo khom ai ngîr thei khâi ino a nit.

¹⁷Kei chu suak a pu makunga ding angkah ki nit a, ingkan im ni ziangah ki ṭong thei rang a? Ritha lak nei khâi mang a, rithuak khom ki irthuak thei khâi ino a nit,” ki ti a.

¹⁸Ani khan a ne tôn nôk a, ritha thar a ne pêk tâk a.

¹⁹Ani khan ki ziangah, “Pathianin lung nang ai thlung a nit; khasikin, ṭi no roh; thlangamna ni ziangah om sela, irât neh ihâi takkan om roh,” a ti a. Kha thu khah â sîr zoiin chu ki hong rât nôk ual tâk a, a ziangah, “Epu, nangman ni nen rât tâk a, ki zianga thusîr rang ni ti khah isîr roh,” ki ti a.

²⁰Khanchu ani khan, “Ni zianga ki zuangna bi ni riat im? Atûnah hin Persia ram ilal idoi rangin kî fe rang a nit. Ani khah kên tlôm tenan chu Grik ram ilal kha zuang rithoi a ti.

²¹Khanniseh, Thutak Lekhabua riziak kha nang rilfia pêk ki ti: Hi mihei ki doinaa ne san chu nin ruaitu Mikaela banah chu tute omak e.