Read Biete DANIELA 11 Bible Online

DANIELA 11 - Biete bible

DANIELA 11

¹“Media mi Daria inlal kum khatna khomah khan kei chu ani kha indet rang neh inrât rangin ki lei îding tâk a nit,” a ti a.

²Vân Angel khan, “Atûnah hin thudik nang ki îril rang a nit. Ringai roh, Persia ramah khan rêng ithumkah hong suak an ta, â lina chu a danghei nêkah khan richong ual ok nîng a ti. Archongna neh a thuneina arsâng lâi takah khan Grik ram idoi rangin mi murdi chok ithoi a ti.

³“Khanungchu, rêng irât tak, thuneina roinpui taka roiirêl rang kha hong suak a ta, a nuam lam lamin châng a ti.

⁴Khanniseh, a thuneina risâng lâi takin a ram chu koi a ta, mun ilika ṭhenindarin om a ti. Ama richi ata nino rênghei khan ama munah roirêl an ta; khannisela, ama tluka thuneina nei tute om no nih.

⁵“Aigupta rêng khah rât tak tak a ta. A ruaituhei lâia khatkah vâng chu rât ual ok a ta, thuneina nei a ta, ân lalna ram khom ram iliantak nîng a ti.

⁶Kum itena manih nungah chu Aigupta rêng khan Suria rêng neh rualrichanna siam a ta, a nainu khah Suria rêngpa nupui rangin pêng a ti. Khannisela, an rualrichanna kha det sôt no nia, a nainu chu a pasal neh a naihei neh â som ṭhuihei neh an rêngkan ithatin om an ti.

⁷Kha rizoiah khan khâmnu thisen rizompui lâia mi khatkah rêngin hong iṭhung a ta, Suria rêng sipaihei kha doi a ta, an kulpui kha ilûtin, anni kha inê riai a ti.

⁸An pathianhei rilim neh an tangkarua neh rângkachak bûrbêl iṭha tak tak an pathian ta ranga an isiamhei kha Aigupta ramah chôi riai a ti. Kum itena sôt manih chu Suria ram kha doi nôk khâi no nih.

⁹Khanungah khan Suria rêng khan Aigupta ram irûn tum a ta; nikhomsela, ani kha lei doi ikhîr nôk a ti.

¹⁰“Suria rêng naipahei khan Aigupta kha irûn rangin risiam an ta, sipai itam takkah bûm an ta, tuiilian angkan hong lian an ta, hong chîm zoi an ta, irâlhei kulpui kha hong doi an ti.

¹¹Aigupta rêng kha a ningthik tak tak a ta, Suria rêng khah lei ridoipui a ta, sipai itam takka râl manin man pêk a ti.

¹²Sipai itam takkah a that sik neh nêna a chang sikin risong a ta; nikhomsela, â rât ual ni mai no nih.

¹³“Suria rêng kha kîr nôk a ta, matona nêka tam ual sipai bûm a ta; khanungchu, a zoro inṭumah sipai itam takkah neh râlthluk iṭhaa rithlukin hong rithok nôk a ti.

¹⁴Kha tenan chu mi itam takkah Aigupta rêng chungah rihel an ti. Daniel, inlârna an imu lôntluk itumin ni mihei lâia mitôksolhei ngêi khom rihel an ta; khanniseh, inlîrin om an ti.

¹⁵Khanchu, Suria rêng khan khopui kulpui idet kha hual a ta, lah vang a ti. Aigupta sipaihei kha châng ngam khâi no nia, an lâia râlpa bîkhei khomin doina rang râtna zel nei khâi no nih.

¹⁶Khanchu, a hong irûntu khan a nuam lam lamin an chungah thông a ta, â khap ngam tute zel om no nih. Khante, Ram Roinpuitak khomah khan iding a ta, a thunuaiah in-om a ti.

¹⁷“Suria rêng khan a sipai ritha mangin ram dang irûn tum nôk a ti. Khanungchu, â râlhei ram â siat theina rangin rualrichanna siampui tum a ta, a nainu chu nupuiin innei tum a ta; khanniseh, a tumna chu thluantlung no nih.

¹⁸Khanungah khan tuikhanglian rikama ramhei kha doi a ta, itam takkah chu inê a ti. Khannisela, rêng khatkah khan ani chu lei inê a ta, arsongna tinrêng chu inmong pêk a ti; a nit arsongna kha ama chung ngirah kîr nôk a ti.

¹⁹Khanchu, rêng khah ama rama kulpuihei tiang ngirah khan kîr nôk a ta; nikhomsela, inên om a ta, amakhah ama ranga mongna chu nîng a ti.

²⁰“Ama munah khan rêng dang hong iṭhung a ta, kha mi khan a ram richongna inpungna rangin mihei chu siachôinaa dêrên itho rangin siadôltuhei tir suak a ti. Khannisela, sun sôt inoteah kha rêng khah ridoinaah ni loiin inrûkka that inrimangin om a ti,” a ti a.

²¹Vân Angel khan â sîr mai a, “A munah khan mi sual inthang rêng ichang rang khoma inrupna nei ino; nikhomsela, vârriletna mangin a hong înlal rang a nit.

²²Tukhom ama kaltu kangân chu Pathian Thiampu Laltak ilua khom tuiilian ifen angkan inrimang a ta, phît infâi riai a ti.

²³Ringeina thuthlung isiampuiin ram danghei kha lêmtôm a ta; ram ichîntea rêng ni man sela, hong rât tûr tûr a ti.

²⁴Ram richong tak takhei kha an rining no lâiin hong rûn a ta, a pi neh puhei khomin an itho nuam ngai ino kha thông a ti. A mihei lâiah khan râllâk sumhei neh neinunhei kha sem a ta; a nit, kulpui idethei doi rang dân phan a ta; nikhomsela, ama zoro chu vun zel a ti.

²⁵“Aigupta ram rêng idoi rangin irât takkan risiam a ta, ihâi takkan sipai itam takkah ṭhui a ti; khanniseh, Aigupta rêng khan sipai itam irât tak neh khan lei doi a ta; nikhomsela, an phiarrûkna sikin Aigupta rêng khan lei ngam no nih.

²⁶A nit, ama mi, a khalai rikhîlpui ngaihei ngêi khan ani chu isiang an ta, a sipai lômhei khom rimangin om an ta, itam takkah chu ithatin om an ti.

²⁷Khanungchu, rêng inikahei kha khalai munka rikhîlin iṭhung an ta; khanniseh, an lungril chu rimun no nia, rilêm risak an ti. A zoro diktak khah a la tlung no sikin an lungdo kha mu no nih.

²⁸Khanchu, sum itam takkah neh Suria rêng kha an ramah kîr nôk a ta, a lungril chu Pathian mihei idoiin om ngit a ti. A nuam lam lamin châng a ta; khanungchu, ama ram ngêiah kîr nôk a ti.

²⁹“Nungah chu Aigupta ram rûn nôk a ta; khanniseh, a matona angkah khan chu ni khâi no nih.

³⁰Romhei kha rikuangheia hongin ani kha doi an ta, ani chu iṭi rilônthingin om a ti. “Khanungchu, ningthik pumin kîr nôk a ta, Pathian mihei sakhua kha inrimang tum a ti. Thuthlung rithiang nung isongtuhei roisak kha zôm a ti.

³¹A sipaihei khan Mun Rithiang neh a kulpui kha innim an ti. Anni khan kôlni suak ikipa ribôlna kha inringam an ta, Siatna Porinche kha inding an ti.

³²Thuthlung rithiang nung isong tâkhei kha rilêmna ṭongbâi ithlumin rêng khan a tiang rikuai a ta; khanniseh, mi an Pathian thu zômtuhei kha chu idet takkan iding an ta, lei doikîr an ti.

³³An lâia ruaitu vârhei khan mi itam takkah inrisei an ta; nikhomsela, sûn itena sôt manih chu a ṭhen râl buala that, a ṭhen meia hâl thathein om an ta; a ṭhen chu irokin manih, bôia manin manih om an ti.

³⁴Khante, that inrimangna a om mai lâiah khan Pathian mihei khan sanna ichînteka chu dong an ta; khanniseh, mi tam takkan marangṭhat izongin anni chu hong zom an ti.

³⁵An ruaitu vârhei lâia ṭhenkah chu ithat nîng an ta; khanniseh, hi sikah hin mihei kha thâr inrithiangin om an ti. Pathianin zoro inkung, mongna zoro kha a hong tlung mâkah chu khangkah khan ni mai a ti.

³⁶“Suria rêng khan a nuam lam lamin châng a ta; lârripâk a ta, pathian tin tin chunga roinpui ualin ribêng a ta, pathianhei Pathian nêk khomin inchung ualin ribêng a ti. Pathianin a thiltum angkana kuttum a tho mâkah chu khangkah khan châng mai a ti.

³⁷Kha rêng khan a chibulhei pathian khah ngaisak no nia, nupanghei irngai innat pathianhei neh pathian dang rêng rêng khom ngaisak ual no nih. Annihei nêka roinpui ualin ribêng a ti.

³⁸Khanêkah khan chu pathian, kulpuihei irung ngaitu kha chôiinrisâng a ta, pathian, a pahei khomin an iriat ngai ino kha rângkachakhei, tangkaruahei, lungiluhei neh thil ditiom tak takhei ilanin chubai ûn a ti.

³⁹A kulpui irung rangin ram dang pathian ibia mihei kha mang a ta. Tukhom amah rênga a pomhei kangân chu chôiinrisângna pêng a ta, dingmun risâng takheiah siang a ta, lomanin ramhei khom pêng a ti.

⁴⁰“A zoro mong rang a hong nâi tikin chu Aigupta rêng khan ani khah hong doi a ta; khante, Suria rêng khan tâlihei, sakor chungchuang mi neh rikuang itam takka mangin thlisim angkah dôran ani khah lei doi a ti. Tuiilian idîl angkan ram itam takkah rûn a ti.

⁴¹Ram roinpuitak khom khah rûn a ta, a sîng têlin that a ti; khanniseh, Edom neh Moab neh Amon ram izuaa omhei chu a kut ata kha zôk an ti.

⁴²Kha ram murdihei kha a hong rûn tikin Aigupta ram khom kha zua ual no nih.

⁴³Khanchu, Aigupta ram richon rithup rângkachakhei, tangkaruahei neh thil iluhei murdi khah chôi vang a ti. Libia neh Sudan khom a thunuaiah in-om vang a ti.

⁴⁴Khanungchu, sak tiang neh mâr tianga thu thang khan ani khah inṭi a ta, ningmur ritêlin doi a ta, mi itam takkah that inrimang a ti.

⁴⁵Khante, tuikhanglian neh Tempil omna tlâng rithiang roinpui tak kârah khan a rêng puan in khah dâng a ta; khanniseh, amakhan â san rang nei loiin thîng a ta, a zoro mongna chu tlung a ti,” a ti a.