Read Biete DANIELA 12 Bible Online

DANIELA 12 - Biete bible

DANIELA 12

¹Vân Angel risompuan isil khan, “Kha zoro tikin chu ni mipuihei ithlop ngaitu vântirtôn inthang Mikaela kha zuang ilang a ta. Khanungchu, nam om phut ata kha zoro dên khoma la om ngai ino buaina zoro khah hong om a ti. Kha zoro a hong tlungin chu, ni mihei murdi Pathian lekhabua an riming ichuanghei kangân chu inzôkin om an ti.

²An lâia mi itam takkah lei ithi tâkhei khom kha hong thoi nôk an ta; ṭhenkah chu kumtluang ringna changin hong thoi an ta, ṭhenkah chu kumtluanga mualphoina neh izakna changin om an ti.

³Ruaitu vârhei chu rivân vâr angkan vâr suak an ta, mi itam takka felna lampui inriseituhei chu vân ârsi angkan kumkhuantluangin vâr an ti,” a ti a.

⁴Ani khan ki ziangah, “Atûnah hin, O nangmah Daniel, lekhabu khah inrikhap inla zoro mong idêna rangin ipip khap roh. Khangkan mi itam takkah chu thil itlunghei iria tumin chanlamboiin ritha an isêng rang a nit,” a ti a.

⁵Khanungchu, mi pasal inikah vadung kôla ding, khatkah kiangtiang vapanga ding, khatkah kiangtiang vapanga ding ki mu a.

⁶An lâia khatkah khan vântirtôn vadungtui chunga ding ziangah khan, “Hi thil rikhêlhei mongna hi tikin im ai nit rang tâk?” a ti a.

⁷Vântirtôn khan a kut kâng ruaikan rivân tiang a phar a, kumtluang Pathian rimingin ṭonginkung idet a nei a. Ani khan, “Kum ithumkah neh kum rilangkah nîng a ti. Pathian mihei nuamlona a mong tenan, hi thilhei murdi hih hong tlung zoi tâng a ti,” ai ti ki riat a.

⁸A thu ti khah ki riat a, khan a omzia chu rethiam mang a. Khanchu, keiman, “Khanniseh, Epu, hi thilhei mongna hi ingkam ai nit rang tâk?” ki ti a.

⁹Ani khan, “Daniel, atûn chu fe ta roh, thuhei khah zoro mong idêna rangin ithup neh ipip khap a nit tâk.

¹⁰Mi itam takkah thâr inrithiang nîng an ta; mi sualhei khan chu rethiam no nia, isual takkan an iom mai rang a nit; mi vârhei bang khan rethiam an ti.

¹¹“Kôlnisua kipa hâlrivâm thillan ribôlna kha inringam a nit a, Siatna Porinche inding a nit tena rithokah khan, sûn sânglei rizanikah sômikuakkah nîng a ti.

¹²Sûn sânglei rizathumkah neh sômithumka ringaka sung iamom takka tuangdiarhei chu an ham a ṭhat e.

¹³“Atûnah hin nangmah Daniela, mongna dênin iamomin om roh. Khanungchu, thing ni ta; khannisela, mongna zoroah khan chu ni loman idong rangin thoi nôk ni ti,” a ti a.