Read Biete DANIELA 2 Bible Online

DANIELA 2 - Biete bible

DANIELA 2

¹Nebukadnezara khan ân lal kum iniknaah khan rimang a nei a; a lungril ân buai ok sikin in thei khâi mak a.

²Khanchu, rêng khan armang kha irilfia pêk rangin mitvaidôi ithiamhei, thlasân ithiamhei, dôithiamhei neh Kaldai mithiamhei ikoi rangin thu a pêk a. Khanchu, an hong a, rêng makungah khan an ngîr a.

³Rêng khan an ziangah, “Rimang ki nei a, kha ker mang khan ki lungril ân buai zoi tâk a, ker mang omzia kha â ria kî nuam a nit,” a ti a.

⁴Anni khan Aramaik ṭongin rêng ziangah khan, “O, rêngpa, kumkhuakan dam mai roh. Ner mang chu ni suakhei hi iril inla, a rilfiana chu nang isîr pêk kin ti,” an ti a.

⁵Rêng khan anni chu a sâm a, an ziangah, “Nangmanin rimang kha ne sîr pêk nin ta kha rizoiin a rilfiana khom nin ne sîr pêk sa rang a nit. A nit non chu richan nôi nîng nin ta, nin inhei khom in ram ai chang rang a nit.

⁶Khannisela, rimang neh a rilfiana nin ne sîr pêk theiin chu ki ziang ata loman thilpêk neh chôiinrisângna roinpui tak dong nin ti. Tho atûnah hin ker mang neh a rilfiana ne sîr pêk ta rei,” a ti a.

⁷Anni khan rêng khah an sâm nôk a, “Rêng khan kha rimang kha a suakhei hi ne ril sela, a rilfiana chu isîr pêk kin ti,” an ti a.

⁸Kha tenan chu rêng khan, “Ki tûng lam angkah tak a nit hih. Ki ṭong kha kî len ngêt rang a nit iti nin riat sikin zoro nin îpot insei a nit. Rimang kha nin ne sîr pêk thei non chu kuttum nangni kî tho ngêt rang a nit. Nakan ualah chu thil a hong danglam duai lôi im iti tûngin ki ziangah milak thu chanlamboi iril a, zoro insôt nin itum a nit hih. Khasikin, ker mang kha ne ril unla; khanchu, a rilfiana khom ne ril thei nin ti, iti riang ki ti,” a ti a.

⁹

¹⁰Kaldai mithiamhei khan rêng khah an sâm a, “Rêng thil chûn hih â ril thei rang mi khatka lua rinêng chungah hin om no nih. Rênghei, ruaituhei, roirêltuhei tute zelin hingkana thil hih an mitvaidôi ithiamhei manih, thlasân ithiamhei manih, Kaldai mithiamhei manih lar don ngai mak e.

¹¹Rêng thil chûn hih thil ikhir tak a nit a, taksaa lêng ino pathianhei ti no chu â ril thei rang tute zel om no nih, pathianhei laka miriamhei lâiah omak a,” an ti a.

¹²Khasikah khan rêng kha a ning a thik tak tak a, Babilon mithiam murdihei chu inrimang vang rang thu a pêk tâk a.

¹³Khanchu, an rêngkan ithat vang rangin thupêk â sua tâk a; Daniela neh a malhei khom ithat rangin an zong tâk a.

¹⁴Rêng vêngtu sipai ruaitu Arioka, Babilon rama mithiamhei ithat ranga thupêk fe suakpuitu kha Daniela khan ivâr tak neh ridîn takkan â sôn a;

¹⁵“Îtho tâk im hingka taka khir thupêk hi rêngin a îsua tâk?” a ti a. Khanchu, Arioka khan Daniela khah thil omziahei â ril tâk a.

¹⁶Khanchu, Daniela khah rêng ziangah a fe a, rimang kha a rilfia theina ranga zoro peh rangin a ngên a.

¹⁷Khanungchu, Daniela khan insungah a fe a, a malhei Hanania, Misaela neh Azaria hei khah thil om dân murdi â ril a.

¹⁸Babilon mithiam danghei lôma ithat an nit sa nona rangin hi thu rithup chungchângah hin rivân Pathian lungkhamna ngên rangin a malhei â ril a.

¹⁹Khanungchu, kha zân zelah khan kha thu rithup khah inlârnan Daniela ziangah â lang tâk a. Daniela khan rivân Pathian chu ân pâk a:

²⁰“Pathian riming chu kumkhuantluang kan inpâkin om riseh. “Vârna neh sinthotheina chu a ta a nit.

²¹Zorohei neh hunbihei a man a zêk a, Rênghei chu a pai iṭhul a, rênghei chu ân ding a; Aman mihei vârna neh riatna a pêk a;

²²Thu inril neh rithuphei ân langsuak a; Izîng inthima thil rithup khom a riat a, Ani chu vâr ri-elin ai hual vêl a nit.

²³O ki chibulhei Pathian, Ni ziangah lômthu rilin nang ki înpâk a nit, Vârna neh riatna ni ne pêk tâk a, Ni zianga kin thil ngên chu ni nen riat a, Rêngin ai riat nuam thil khah ni ne ril tâk a,” a ti a.

²⁴Khanchu, Babilon mithiamhei ithat ranga rêngin thuneina a însil Arioka ziangah khan Daniela kha a va fe a, a ziangah khan, “Babilon mithiamhei khah inrimang no roh, rêng ziangah khan ne ṭhui inla, rêng kha rimang rilfiana chu iril ki ti,” a va ti a.

²⁵Arioka khan Daniela khah rimot takkan rêng Nebukadnezara ziangah a ṭhui zel a, rêng ziangah khan, “Rêng maritomtak, ner mang omzia nang iril thei rang Judai rama rithoka bôia tânghei lâia mi khatkah ki mu tâk,” a ti a.

²⁶Rêng khan Daniela (Beltesazara khom an iti) ziangah khan, “Rimang kî phan neh a rilfiana kha ni ne îril thei rang na?” a ti a.

²⁷Daniela khan rêng khah a sâm a, a ziangah, “Thil rithup rêngin ai riat nuam khah, mi vârhei, thlasân thiamhei, mitvaidôi ithiamhei, vân enthiamhei tute zelin rêng chu iril thei no nih.

²⁸Khannisela, thil rithuphei inpuangtu chu Pathian rivâna om kha a nit, ani khan rêng Nebukadnezara ziangah sûn matona thil la hong iom ranghei kha a lei îril a nit. Ni khum lâizôla ni in kâra inlârna nî mu rimang khah atûnah hin nang isîr pêk ki ti.

²⁹“O rêng inthang, ni khum lâizôla ni in kârah khan sûn matona thil la hong itlung ranghei chu rimangin ni phan a, thil rithuphei inpuang ngaitu Pathian khan hi nunga thil la hong iom ranghei khah nang a înmu a nit.

³⁰Keimah hi mi danghei nêka vârna ki nei bîk sik ni loiin rêng khan ner mang omzia khah ni riat a, a thupêl khah ni riatthiam theina ranga hi thu rithup hi ki zianga inlang a nit.

³¹O rêng inthang, inlârnaah khan ni makungah mirmil roinpui tak ni matona ding ni mu a. Kha mirmil ilianpa khah ritle tak a nit a, â lang dân khoma iṭiom tak a nit.

³²Kha mirmil khah a lu chu rângkachak rithiang taka siam a nit a, â ṭâng neh â bânhei chu tangkarua, a pum neh a malpuihei chu dâr,

³³a kehei chu thîr, a kepha chu a ṭhen thîr, a ṭhen bêpila siam a nit.

³⁴Kha mirmil ni en mai lâiah khan, lungpui tutên kuta an îkar inlum ni no khan kha mirmil khah a kepha thîr neh bêpila siam khah a zuang del a, ân rinôi chit tâk a.

³⁵Khanchu, thîrhei, bepilhei, dârhei, tangkaruahei, rângkachakhei kha a rualin arnoi chit a, fûr lâia rîzôla farsi angkan a hong om tâk a; phâivuan khahei khah a sêm inrimang a, an omna mun rêng rêng iria ni khâi mak a. Mirmil ideltu lungpui kha chu a hong lian tûr tûr a, tlâng ilian tak a hong chang a, rinêng pumpui hi a sip tâk a.

³⁶“Amakhah ner mang chu a nit. A rilfiana chu rêng makungah hin hang isîr ki ti.

³⁷O rêng inthang, nangmah hi rênghei chunga rêng inthang tak ni nit. Rivân Pathianin ramhei, sinthotheinahei, râtnahei, roinpuinahei chu nang ai pêk ni nit.

³⁸Rinênga manmasi naihei chunga roirêltun nang a siam a, ramsahei, chungavuang ivahei, chungah khom thu nang a înnei a nit. Rângkachaka siam lu chu nangmah hi ni nit.

³⁹Nangma nungah hin ram dang nangma nêka chîn ual la hong iding suak a ta, kha rizoiin, ram a thumna dârsen angkana rêngram kha la hong iding nôk a ta, ani khan rammual pumpui roirêl a ti.

⁴⁰Khante, ram â lîna kha thil tinrêng ikhoi inrinôi ngai thîr angkana khir hong inlal nôk a ti. Thîrin thil tinrêng a îkhoi inrinôi ngai angkah hin rêng ram masahei kha hong ikhoiin, inrinôi chit a ti.

⁴¹A kepha neh a keṭimhei a ṭhen bêpil, a ṭhen thîr inia nî mu angkah khan, kha ram kha inrual ino rang entîrna a nit. Thîr neh bêpil a nit a, thîr angkan râtna munhei nei a ti.

⁴²A keṭimhei a ṭhen thîr, a ṭhen bêpil ai nit angkah khan ram khah a ṭhenah khan rât a ta, a ṭhenah khan rizal takkan om a ti.

⁴³Thîr neh bêpil ripol nî mu angkah ngêiah khan anni chu miriam chi ripol nîng an ta; nikhomsela, thîr neh bêpil a irpol tak tak thei ino angkah hin rizom tak tak thei no nih.

⁴⁴Kha rênghei zoroah khan rivân Pathianin ram zuang inding a ta, kha ram kha chu ram rilun nîng a ti. Kha lal ram kha chu tutên inê no nia; rêng ram danghei murdi kha inrimang vang a ta, ani chu kumkhuakan iding mai a ti.

⁴⁵Itlâng ata lungpui kuta kar ni loia zuang iluma thîrhei, dârhei, bêpilhei, tangkaruahei, rângkachakhei del inrinôi chit khah nî mu a nit. Pathian roinpui tak khan rêng inthang ni ziangah hin hi nunga thil la hong iom rang a inpuang a nit. Ner mang diktak kha nang ki îrilin, a rilfiana diktak khom nang ki îsîr pêk a nit,” a ti a.

⁴⁶Khanchu, rêng Nebukadnezara kha rinêngah â bok a, Daniela kha chibai a ûn a, thillan neh namhoi Daniela hong ilan rangin thu a pêk a.

⁴⁷Rêng khan Daniela ziangah, “Hi thu rithup nen puang thei dânah hin ni Pathian chu Pathian roinpui tak, rênghei Rêng, thu inril inpuangtu a nit ngêt iti ki riat tâk,” a ti a.

⁴⁸Khanchu, rêng khan Daniela khah a siam inlian a, thilpêk iṭha tak tak itam takkah a pêk a, Babilon ram bial ân enkol a, Babilon mithiamhei murdi chunga ruaitu takin a siam a.

⁴⁹Daniela ngên lam angkan rêng khan Sadraka, Mesaka neh Abednego hei chu Babilon bial a ṭhen chungah ruaitun a sia tâk a, Daniela chu rêng inthang roirêlna munah khan a om mai a.