Read Biete DANIELA 3 Bible Online

DANIELA 3 - Biete bible

DANIELA 3

¹Rêng Nebukadnezara khan rângkachak mirmil, arsâng dân mûk sômirukkah, a khang mûk irukka a siam a, Babilon biala Dura phâizôlah khan a vuak inding a.

²Rêng Nebukadnezara khan a thuaia rêng ichînhei, Ram-optuhei, roirêltuhei, sum enkoltuhei, roisaktuhei, dân mihei neh ram bial roirêltu murdihei khah mirmil a înding lannaa hong iṭang rangah khan a koi bûm a.

³Mirmil serinran nî-ah khan kha rêng ichînhei, Ram-optuhei, roirêltuhei, sum enkoltuhei, roisaktuhei, dân mihei neh ram bial roirêltu murdi kha an hong a, rêng Nebukadnezara mirmil inding maah khan an ngîr a.

⁴Tlângva khan iring takkan hingka hin a hong inpuang a, “O mi tin, nam tin neh ṭong tin hei o,

⁵bekulhei, perkhuang hei, theilehei, serandahei, rosemhei neh thil tum inrî thei chitin rêng irî nin riat tikin rêng Nebukadnezara rângkachak mirmil inding maah khan ibokin, chubai nin ûn rang a nit.

⁶Tukhom iboka chubai ûn ino chu meipuia pai lût zel rang a nit,” itin.

⁷Khasikah khan kha lâia mipui murdi khan irîhoi chi tinrêng irî an hang riatin chu mi tin, nam tin, ṭong tin hei murdi khan rêng Nebukadnezara rângkachak mirmil inding maah khan an ibok a, chubai an ûn tâk a.

⁸Babilon mi ṭhenkahein amakhah Juda mihei nôna zoron ṭumin an mang a.

⁹Rêng Nebukadnezara ziangah khan, “O Rêng inthang, kumkhuakan dam mai roh.

¹⁰Nangman, O rêng inthang, mi tukhom irîhoi chi tinrêng â ring nin riat kaneh chu rângkachak mirmil maah ibokin, chubai nin ûn rang a nit.

¹¹Tukhom iboka chubai ûn ino kangân chu meiṭhumah ipai lût nîng a ti, itin thupêk ni siam a.

¹²Juda mi ṭhenkah Babilon ram bial chunga ruaitua nî siam Sadraka, Mesaka neh Abednego hei khah an om a, hi mihei hin, o rêng inthang, ni thupêk an iôi ino a nit. Ni pathian chubai ûn nuam mak a, rângkachak mirmil inding maah khan an îkhûn nuam ino a nit,” itin an isîr pêk a.

¹³Khanchu, Nebukadnezara khan ningmur neh lung ilum rakkan Sadraka, Mesaka neh Abednegoa hei kha a makungah hong iṭhui rangin thu a pêk a.

¹⁴Nebukadnezara khan an ziangah, “Sadrak, Mesak, Abednego, ki pathian sin tho loi a, ki rângkachak mirmil inding chubai ûn nuam mak chei iti hi thu dik chu a nit im?

¹⁵Atûnah hin irîhoi chitin rêng irî nin riat kaneh iboka ki mirmil siam chubai nin ûn rang tâkin chu a ṭhat; chubai nin ûn non chu voika zelin meipuia pai lût nîng nin ti. Ki kut ata nangni san isua thei rang pathian a om nin isôn mani?” a ti a.

¹⁶Sadraka, Mesaka neh Abednego hei khan rêng khah an sâm a, a ziangah, “Rêng Nebukadnezar, hi thu-ah hin nang kin sam ual khom nang mak e.

¹⁷Kin Pathian, a sin kin itho pêk ngai khan meipui ata a ne san isua thei a, ni kut ata khom O rêng inthang, ne san isuang a ti.

¹⁸Khangkan ni no khom sela, O rêng inthang ni pathian khah chubai ûn no ning ung a, ni rângkachak mirmil inding khom khah ikhûn no ning ung e,” an ti a.

¹⁹Khanungchu, Nebukadnezara kha a ning a thik tak tak a, Sadraka, Mesaka neh Abednegoa hei chungah khan a mâi a duk zap tâk a. Khanchu, meipui khah a lum dân pial nêka lêt sarika inlum rangin thu a pêk a.

²⁰A sipai lôm lâia mi rât ṭhenkahei khah Sadraka, Mesaka neh Abednegoa hei ikhuap a, meipuia pailût rangin thu a pêk a.

²¹Khanchu, an zakorfualhei, an sunglûthei, an lukhumhei neh an silbom danghei pumah khan an khuap a, meipuiah khan an pailût tâk a.

²²Rêng thupêk khah a khir tak tak a, mei khah a lum natinsat tak tak sikin Sadraka, Mesaka neh Abednegoa hei pailûttuhei khah meiṭhum khan a liai that tâk a.

²³Khanungchu, Sadraka, Mesaka neh Abednegoa hei khah rikhuap ṭiankan meiṭhumpuiah khan an pailût tâk a.

²⁴Rêng Nebukadnezara khan rikhêl a ti a, rimot takkan a thoi a, a roisakpuituhei ziangah khan, “Mi pasal ithumkahei kha ikhuapin meiṭhumah ei ipailût ni mak im a?” itin ardon a. Anni khan, “O a nit, rêng inthang, ei pailût khate,” an ti a.

²⁵Ani khan, “A nitin teh, ithôm mi pasal ilika rikhuap viat khâi loia mei lâia rilong diai kî mu so, ina ti mêl rêng rêng khom riput mak a, â lîna vâng chu vântirtôn [1] mêl riput a nit,” a ti a.

²⁶Rêng Nebukadnezara khah meiṭhumpui kotbâiah khan a hong nâi a, “Sadrak, Mesak, Abednego, Pathian Chungnung taka somhei; hong suak unla, hin hong rei,” itin a koi a. Voikazelin anni chu mei lâi ata khah an hong suak tâk a.

²⁷Khante, rêng ichînhei, Ram-optuhei, roirêltuhei neh rêng roisaktuhei kha an hong ribûm a, hi mihei taksa chungah hin meiin sinthotheina nei mak a, an sam khom kâng in-ir viat mak a, an silbomhei khom kâng mak a, mei inam rêng rêng khom inam mak iti an hong mu a.

²⁸Rêng Nebukadnezara khan thu â sîr a, “Sadraka, Mesaka, Abednegoa hei Pathian chu inpâkin om riseh. Ani khan a vântirtôn a zuang tir a, â som ama iamtuhei kha a sansuak tâk a, kha mihei khan rêng thupêk zôm nuam loiin an ringna phalin an Pathian bang ti no chu pathian dang chubai an iûn nuam ino a nit.

²⁹Khasikin, mi tin, nam tin, ṭong tinrêngin Sadraka, Mesaka neh Abednegoa hei Pathian chunga thu ṭhano ril kangân chu richan chit nîng an ta, an inhei khom nômbuka siam nîng a ti, itin thupêk kî siam a nit. Hingka taka mi sanisua thei Pathian dang zel omak e,” a ti a.

³⁰Khanchu, rêng khan Sadraka, Mesaka neh Abednegoa hei khah Babilon ram bialah khan dingmun risâng ualah a sia tâk a.