Read Biete DANIELA 4 Bible Online

DANIELA 4 - Biete bible

DANIELA 4

¹Rêng Nebukadnezara khan, rammual pumpuia nam tin, chi tin, ṭong tinhei ziangah hi thucha hih a thon a; “Nin chungah ringeina om riseh.

²Chungnungtak Pathianin ki zianga risinsiana neh sinrikhêlhei a ne înrilang pêk hih lei ringai rei:

³“Pathian risinsianahei chu a roinpui vang na! A sinrikhêl thohei chu a natinsat vang na! A ram chu kumtluang ram a nit a; A roirêlna chu suanpâr om tenkah nîng a ti.

⁴“Keimah, Nebukadnezara hi, ki rêng inah ihoi takkan ki om a, tinrêngah richong vângisak takkan ki om a nit.

⁵Nikhomsela, rimang inrît tak ki phan a, ki khum lâizôlah khan inlârna inrît tak ki mu a.

⁶Khasikah khan Babilon mîthiamhei murdihei khan ker mang an ne rilfia pêk theina rangin ki makungah hong iṭhui rangin thu ki pêk a.

⁷Khanchu, mitvaidôi ithiamhei, thlasân ithiamhei, Kaldai mîthiamhei, vân entuhei kha an hong a; ker mang kha ke sîr pêk a; khanniseh, ne rilfia pêk thei mak a.

⁸A nungkhôn takah khan Daniela (Ki pathian riming angkana ripu, Beltesazara itia an ikoi kha) a hong a, amah-ah khan pathian rithianghei rithla a om a; khante, ker mang khah ke sîr pêk a.

⁹‘O Beltesazar, mîthiamhei ruaitu, nangmaah khan pathian rithianghei rithla a om iti ki riat; khasikin, thu rithup rêng rêng ni riat vang a, ker mang chu hih a nit a, a rilfiana ne sîr pêk roh.

¹⁰“‘Ki khum lâizôla ki zâl lâiin, inlârna ki mu a; rinêng inlâina takah thingkung ilianpa ding ki mu a.

¹¹Thing khah a hong thuar tûr tûr a, arsâng dân chu rivân a sun dap a, kôlkomonga rithok khomin â lang thei riai a.

¹²A nâhei chu â en a hoiin, â râhei chu a kûr tak tak a, rammual pumpui fâk khop rang a om a, ramsahei khan a dâilîm an ribêl a, chungavuang ivahei khah â ṭangheiah ribu an kâi a, ringna nei murdi khan â râ khah an ifâk a nit.

¹³“‘Ki khum lâizôla inlârna kî mu khah ki ngaitua lâiin, rivâna rithokin vântirtôn rining ṭian zuang iṭum ki mu a.

¹⁴Ani khan iring takkan, thing khah iphûr unla, â ṭanghei khah rikit unla, a nâhei khah rikhei unla, â râhei khah thekindar rei. A nuai ata ramsahei khah ro vang sela, â ṭanghei ata chungavuang ivahei khom vuang rimang riai riseh.

¹⁵Khannisela, a kungmui kha chu rama loisûl kârah khan thîr neh sumsen zingziriruia khuapin rinêngah khan mah rei. Ani khah rivân rido khan chôp sela, a dongtum rang chu ramsahei neh munkan loisûl lâiah om riseh.

¹⁶Kum sarika sung chu miriam lungril nei loiin ramsa lungril nei riseh.

¹⁷Amahih vântirtôn rining ṭianhei thurêl a nit. Chungnungtak Pathian khan miriam lalna ramhei chungah thu a nei a, ai ditsak kangân a pêk a, mi indôi takhei khom a înlua thei a nit iti mi tinrêngin an riat theina rang a nit,’ a ti a.

¹⁸“Keimah rêng Nebukadnezara hin hi rimang hih kî nei a nit. Khante, o, nangmah Beltesazar, a rilfiana ne sîr pêk roh, ki rama mithiamhei khan a rilfiana ne sîr pêk thei lak omak a; nangmaah khan pathian rithianghei rithla khah a om a, nangman chu ne rilfia pêk thei ni ti,” a ti a.

¹⁹Daniela, Beltesazara khom an iti ngai khah, arlo ân thing a, itôikah chu iṭong khom ṭong thei mak a. Rêng khan a ziangah, “Beltesazar, rimang neh a rilfiana khan nang inbuai no riseh,” a ti a. Beltesazara khan a sâm a, “Ki rêngpa rimang neh a rilfiana khah nangma ta rang ni loiin nang ineltuhei rang ni sela ki ti vang na!

²⁰Thing nî mu, hong ithuar tûr tûr a, rivân isun dap a, kôlkomonga rithoka lang thei riai,

²¹a nâhei en ihoi a, â râ kûr ngut a, ringna nei murdi ranga ifah rang iom neh a nuaia ramsahei ilêng a, â ṭanghei chungavuang ivahei omna hong ini khah,

²²O rêng inthang, nangmah ni nit a, ni thuar a, ni rât a, ni roinpuina chu a thuar a, rivân a sun a, ni roirêlnahei chu kôlkomong a dên a.

²³Ki rêngpa, rivâna rithoka vântirtôn rining ṭian zuang iṭum ni mu a; rôl iring takkan, ‘Thing khah iphûr unla, inrimang rei; khannisela, a kungmui khah chu rama loisûl kârah khan thîr neh sumsen zingziriruia khuapin rinêngah marak rei, ani chu rivân rido khan chôp sela, ramsahei lâiah kum sarika sung lêng riseh,’ a zuang ti a.

²⁴O rêng inthang, amahi a rilfiana chu a nit; ki rêngpa ni chunga thil zuang itlung rang Chungnungtaka thupêk chu a nit.

²⁵Miriam lâi ata ûm isua nîng ni ta, ni lêngna chu ramsahei lâiah nîng a ta, kum sarika sung chu sechalhei angkan loisûl fâng ni ta, ram vatuala riakin rivân rido khan nang chôp a ti. Chungnungtaka khan miriam lal ram chungah thu a nei a, ai ditsak kangân a pêk ngai a nit iti reh tâng ni ti.

²⁶Khante, a kungmui izua ranga thupêk rilfiana chu hih a nit: Chungnungtak Pathianin rammual pumpui chungah thu a nei iti ni riat tikin chu rêngin la ṭhung nôk ni ti.

²⁷Khasikah khan, O rêng inthang, ki thu richa hih ipom inrupin ben la; sual nung song inla, felna sin inla, mi inriang farahei lunginkham roh. Khanchu, vângsak inṭum takkan om mai ni ti,” a ti a.

²⁸Kha thilhei murdi khah rêng Nebukadnezara chungah khan a zuang itlung a nit.

²⁹Thla sômlei thla nikah a vun nungah khan, rêng Nebukadnezara chu Babilona rêng in chungah a lêng lâiin hingka hin a ti a.

³⁰“Enta u, Babilon chu a roinpui vang na! Ki roinpuina neh ken thangna, ki râtna neh ki sinthotheina inlangna rang ngêia rêng omna mun rang piala ki khopui siam chu a nit,” a ti a.

³¹Rêngin kha thu â sîr mai lâiah khan, rivân ata rôl a zuang suak a, “Rêng Nebukadnezar, ki ṭong hih ringai roh. Ni lal ram chu ni ziang ata ilah pai a nit tâk.

³²Miriam lâi ata ûmisua nîng ni ta, ramsahei lâiah lêng tâng ni ta, kum sarika sung chu sechal angkan loisûl nî fâk rang tâk a nit. Khanchu, Chungnungtakah khan miriam lal ramhei chungah thu a nei a, ai ditsak kangân ziangah ai pêk ngai a nit iti reh tâng ni ti,” a ti a.

³³Kha lâi zelah khan kha thu khah a zuang tlung idik zel tâk a. Nebukadnezara chu miriam lâi ata ûmisua a nit a, sechal angkan loisûl a fâk tâk a. A taksa chu rivân rido închôpin a om a, a samhei chu mupui mul angkan a sei a, a tinhei chu iva ketin dôran a sei tâk a.

³⁴Khante, rêng khan, “Kum sarikah a hek zoiin chu rivân tiang ki mit ki hang inlêng a, ki riatna khah ki ziangah a zuang kîr nôk tâk a. Chungnungtak Pathian, kumtluanga ring maiah chu ken pâk a, a ziangah roinpuina neh chôiinrisângna ki pêk a. “Ani khan kumtluangin roi rêl a ta, A lal ram chu suanpâr om tenah om mai a ti.

³⁵Ani khan rinêng chunga mi tinrêng hih a mitmuah chu îte ni mak a; Rivâna angelhei neh rinênga ring mihei murdi a thunuaia om an nit. Tute zelin a lungdo nial thei mak a, A sintho khom ridon ngam thei mak e.

³⁶“Ki riatna a zuang kîr lâiah khan ki roinpuina, ken thangna neh ki roinpuina rêng ram khah ki ziangah ipeh nôk ki nit a. Ki roisakpuituhei neh ki milianhei khan an ne lei lôm a, matona nêka roinpuina natinsat ual neh khan ken lalna chu ipeh nôk ki nit tâk a.

³⁷“Atûn chu, keimah Nebukadnezara hin Rivân Rêng khah ken pâk a, ki chôiinrisânga, kî marit a nit. A sintho murdi khah â dikin a lampuihei chu a fel a, lârripâk takka lênghei chu inthuai takkan ai siam thei a nit,” a ti a.