Read Biete DANIELA 5 Bible Online

DANIELA 5 - Biete bible

DANIELA 5

¹Rêng Belsazara khan a milianhei sângka rang ruai roinpui tak â ṭhe a, an makungah khan uain a in a.

²Belsazara khan uain a in tenan chu a pa Nebukadnezaran Jerusalem Tempila rithoka ai lâk rângkachak neh tangkarua kilâthei neh bûrhei khah amah neh a milianhei neh a nupuihei neh a thâikêmhei khan uain an inna ranga hong ilah rangin thu a pêk a.

³Khanchu, Jerusalema Pathian Tempila rithoka ilah suak rângkachak kilâthei neh bûrhei khah an hong chôi a. Rêng neh a milianhei, a nupuihei neh a thâikêmhei khan uain in nan a mang tâk a.

⁴Uain khah an in a; khanchu, rângkachak hei, tangkarua hei, sumsen hei, thîr hei, thing hei, lung hei a siam pathianhei khah an inpâk tâk a.

⁵Kha lâi takah khan miriam kut hih a zuang ilang a, rêng in bang nâlinvâr, meiser siana dep tiangah khan a zuang riziak tâk a; rêng khan kut bong khah a en ṭian a.

⁶Rêng khah a mêl a hong danglam a, a lungrilhei khah a buai zoi tâk a, a rurbun richinnahei khom a zeng zoi a, arkhûkhei khom artôk nat nat tâk a.

⁷Dôithiamhei, Kaldai mîthiamhei neh vân entuhei khah hong iṭhui rangin rêng khah iring takkan â khêk a. Rêng khan Babilon mîthiamhei ziangah khan, “Tukhom hi riziak hih itep a, a rilfiana ne sîr pêk kangân chu puan senduk insil nîng a ta, a ringah rângkachak rithei inli nîng a ta, ram sunga roirêltu â thumna nîng a ti,” a ti a.

⁸Khanchu, rêng mi vârhei murdi khah an hong lût a; khannisela, riziak khah tep thei mak a.

⁹Rêng Belsazara kha â lung a dong tak tak a, a mêl a hong danglam ual ual a. A milianhei khom an ilung a dong tâk a.

¹⁰Rêng neh a milianhei ṭong rihu sikah khan rêngnu khah ruaiṭhena inah khan a hong lût a; rêngnu khan, “O rêng inthang, kumkhuakan dam mai roh; ni lungril chu buai no sela, ni mêl khom danglam no riseh.

¹¹Ni ramah hin mi khatkah Pathian Rithiang rithla omna khah a om a; ni pa hun lâihei khomah khan riatna, vârna neh thiamna kha pathianhei angkah dôra vârna nei a om iti ki riat ngai tâk a. O rêng inthang, ni pa rêng Nebukadnezara ngêi khan dôithiamhei, thlasân ithiam, Kaldai mîthiamhei, vân enthiamhei ruaituah a siam a.

¹²Rimang rilfiahei, thu khir riat theinahei, thu inril sût theinahei khah a thiam bîk a, mi vâr tak a nit sikin arming Daniela ni khom sela, rêng khan Beltesazara ai be a nit. Khasikin, Daniela chu hin ikoi ni sela, a rilfiana chu nang isîr pêk zel a ti,” a ti a.

¹³Khanchu, Daniela kha rêng makungah khan an ṭhui a. Rêng khan Daniela ziangah, “Daniel, suaka tâng Juda naihei lâia mi, ki pa rêng inthangin Judai ram ata a zuang iṭhuia khah ni nit im?

¹⁴Nangmaah khan pathianhei rithla a om a, thiamna, riatna neh vârna ṭha bîkhei nangmaah khan a om iti ni thurchi ki lei riat a.

¹⁵Atûnah hin hi thu riziak hih itep a, a rilfiana nen reh rangin mi vârhei, dôithiamhei ki makungah an hong ṭhui tâk a; khanniseh, tutên ne rilfia pêk thei mak a.

¹⁶Nikhomsela, nangman chu rilfia thei ni ti, thu khirhei ni sût thiam iti ki lei riat a; atûnah hin hi thu riziak hih ni tep thei a, a omzia ni ne ril theiin chu, puan senduk insil nîng ni ta, ni ringah rângkachak rithei inli nîng ni ta, hi ram sunga roirêltu â thumna nîng ni ti,” a ti a.

¹⁷Daniela khan a sâm a, “Ni thupêk chu nangman dong ṭian roh, a nit nole mi danghei peh roh. Khanniseh, thu riziak hi chu nang tep pêk ki ta, a rilfiana khom nang isîr pêk ki ti

¹⁸O Rêng inthang, Pathian Chungnungtakah khan ni pa Nebukadnezara kha rêngram hei, inthangna hei, roinpuina hei, inlalna hei a pêk a.

¹⁹Roinpuina a pêk sikah khan ram tin, nam tin, ṭong tinhei khan an ṭi a, a makungah khan an inthing ngai a; ai nuamkah a that a, ai nuamkah ân ring a; ai nuamkah a chôiinrisânga, ai nuamkah ân tlôm ngai a.

²⁰Khannisela, a lungril a hong ripâk a, a tuklul ân lian a, a nun a hong ter a; khanchu, a rêngṭhungmun ata intlôm a nit a, a roinpuina khah ilah pêk a nit tâk a.

²¹Miriamhei lâi ata ûm isuan a om a, a lungril khah ramsa lungril angkan a om a, ram sakuartunghei lâiah a lêng a, sechal angkan loisûl a fâk a, ram vatuala riakin, rido ata arli rang om viat loiin a om a. A nungkhônah chu Pathian Chungnungtakah khan miriamhei lalna ram chungah thu a nei a, ai ditsak kangân chu a inlua ngai a nit iti a hong riat tâk a.

²²“Nikhomsela, nangmah a naipa hin hi hei murdi ni riat nung khomin ni lungril inriniam mak che a.

²³Rivân Rêngpa nêka inchungin ner be a; a ina bûr neh kilâthei khah ni ziangah an hong chôi a, nangmah neh ni milianhei, ni nupuihei neh ni thâikêmhei khan uain in nan nin mang a; tangkarua hei, rângkachak hei, dâr hei, thîr hei, thing hei, lung heia siam pathian, îte mu thei ino, ringai thei ino neh reh thei inohei khah ni chôiinrisâng a. Pathian ni ringna neh ni lam tinrêng a kuta koltu khah chôiinrisâng mak che a.

²⁴Khasikah khan Pathianin kut bong khah hi thuhei riziak rangin ni ziangah ai tir a nit.

²⁵“Riziak chu hih a nit: ‘MENE, MENE, TEKEL, UPARSIN,’ iti a nit.

²⁶A rilfiana chu hih a nit: MENE iti chu Pathianin ni ram chu a sût zoi tâk a, a mong a tlung tâk tina a nit.

²⁷TEKEL iti chu ivarin ni om a, tluk khâi mak che tina a nit.

²⁸PARSIN iti chu ni ram kha iṭhenin a om a, Media neh Persia ziangah ipe a nit tâk tina a nit,” a ti a.

²⁹Khanchu, Belsazara khan â somhei khah thu a pêk a, Daniela khah puan senduk an insil a, a ringah khan rângkachak rithei an inli a. A ramsunga roirêltu â thumna a nit tâk thu ân puang a.

³⁰Kha zân zelah khan Babilon rêng Belsazara khah ithat a nit tâk a.

³¹Khante, Media mi Daria khan ram khah a dong tâk a, ani khah kum sômirukkah neh kum inikah vêla ûnlian a nit.