Read Biete DANIELA 6 Bible Online

DANIELA 6 - Biete bible

DANIELA 6

¹Daria khan ram pumpui sungah khan bial optu rizalei sôminikah iphun chu ṭha a ti a.

²Khahei sintho enzuia rêng ranga thil iṭha rang ithlîr mai rangin Daniela neh mi dang inikah a phun sa a.

³Daniela hi lungril iṭha bîk riput a nit sikin ruaitu danghei neh bial optuhei nêkan ân lâr ual a. Khangkana a fel ual bîk sikah khan rêng khomin ram pumpui chunga ruaitua phun a lungrilin a ngaitua a.

⁴Khanungchu, ruaituhei neh bial optuhei khan ram enkol thu-ah khan Daniela chungah zoron ṭum an zong tâk a; khanniseh, sêlna rang zel mu mak a, diknona khom îte mu thei mak a. Daniela khan thil tinrêng iamom takkan a tho a, thonsual manih diknona manih a chungah imuh rang ai om ino a nit.

⁵Hi mihei hin, “A Pathian biak dân thu-ah a chungah sêlna ei mu noa a nitin chu hi Daniela chungah hin zoronṭum mu viat thei no min e,” an ti a.

⁶Khanchu, ruaituhei neh bial optuhei khah rêng ziangah an fe a, a ziangah, “Rêng Daria, kumkhuakan dam mai roh.

⁷Keini ni ram enkoltu, ruaituhei, bial optuhei, ulianhei neh roirêltuhei murdi hin, O, Rêngpa sûn sômithumka sung chu nangma ziang bangah ti no chu mi tukhomin pathian manih miriam manih ziangah ngênna an siam viat rang ni mak. Mi tukhomin kha thupêk khah â siatin chu sakeibaknei ipûka paih rang a nit itin rêng hin dân idet tak siam sela, iti hih ṭha kin iti a nit.

⁸Atûnah hin O Rêngpa, kha dân khah isuan la, ner ming riziakin indet inla, imang rang zel a nit; Media neh Persia dân indanglam thei ngai ino chu a hong init rang tâk a nit,” an ti a.

⁹Kha angkan, rêng Daria khan thupêkah khan riming arziak tâk a.

¹⁰Daniela khan thupêk khah riming riziak tâk a nit iti a riat kaneh chu a inah a fe a. A insunga chuanchung chontanah khan Jerusalem isonga tukver ri-onghei a om a. Nîn tin sûnkatah voi thumkah arkhûk idila a lei ṭongṭai ngai lam angkah takin, a ṭongṭai a, a Pathian ziangah lômthu â sîr a.

¹¹Khanchu, â narsatuhei khan an ridîp a, Daniela khan a Pathian ziangah a ṭongṭai ngai iti an mu a.

¹²Khanungchu, an rêngkan a lômin Daniela nô rangin rêng ziangah an fe tâk a. Anni khan, “O rêng inthang, sûn sômithumka sungah chu nangma ziang bangah ti no chu pathian manih, miriam manih zianga ngênna zong kangân chu sakeibaknei ipûkah paih iṭhul nîng an ti iti a thupêkah khan riming ni irziak ni mak im kha,” an ti a. Rêng khan a sâm a, “Media neh Persia dân indanglam thei ngai ino angkah takin kha thupêk khah ai det a nit,” a ti a.

¹³Khanungchu, anni khan rêng ziangah khan, “Bôia tâng Judahei lâia mi Daniela khan, O rêng inthang nang marit mak a, ni thupêk isua khom kha zôm mak a. Nîn tin voi thumkah ai ṭongṭai mai a nit,” an ti a.

¹⁴Khante, rêng khan kha thu khah a riatin chu ân khôk a ti tak tak a, Daniela san isua rang dân lampui khah a lungrilin a zong ngit a, san isua rangin ni tlâk idênin a ngaitua a.

¹⁵Khanniseh, kha mihei khah rêng ziangah khan an hong ribûm nôk a, rêng ziangah khan, “O rêng inthang, Media neh Persia dânin, thupêk manih, dân manih rêng inthangin a indet tâk chu indanglam thei ni mak iti ni riat,” an ti a.

¹⁶Khanchu, rêng khan thu a pêk tâk a, Daniela khah an hong ṭhui a, sakeibaknei ipûkah khan an pai iṭhul tâk a. Rêng khan Daniela ziangah, “Ni Pathian, a sin nî tho mai ngai khan nang inzôk riseh,” a ti a.

¹⁷Ipûk kotbâi khah lungin an sîng tâk a. Rêng khan Daniela khah tutên an isua thei khâi nona rangin ama risinsiana kutsabit neh a mi lianhei risinsiana kutsabit inamin lung khah risin a sia tâk a.

¹⁸Rêng khah a inah a fe a, kha zânah khan chu bu a ngei a, râifân risakna ranga thil irîhoihei ringai nuam mak a, zân khovârin a mit isîng thei loiin a om tâk a.

¹⁹Khanchu, a tûk zîng kôlrisam kaneh chu rêng khah a thoi a, rimot takkan sakeibaknei ipûk tiangah khan a va fe a.

²⁰Daniela omna pûk a hong nâiin chu, ṭap rôlin Daniela kha â sam a, “Daniel, Pathian iring isom, ni Pathian a sin nî tho mai ngai khan sakeibaknei bâi ata nang a san suak thei im?” a ti a.

²¹Daniela khan, “O rêng inthang, kumkhuakan dam mai roh;

²²Ki Pathian khan a vântirtôn a zuk tir a, sakeibaknei bâihei ân richîp a, îte nen nah viat mak e. Amakhah a mitmuah khan sêlna boiin ki om iti a riat sik neh ni chungah khom o rêng inthang, îte ki thonsual no sika a nit,” a ti a.

²³Khanchu, rêng khah a lôm tak tak a, Daniela khah ipûk ata lah suak rangin thu a pêk tâk a. Khanchu, Daniela kha ipûk ata an lâk suak a, a Pathian a iam ngit sikin popliam rêng rêng ai tong ino a nit.

²⁴Khanungchu, rêng khan Daniela sêltuhei khah iman rangin thu a pêk a, an nupuihei, an naihei neh an rêngkan sakeibaknei omna pûkah khan an paiiṭhul tâk a. Ipûk mong an tlung ma zelin sakeibakneihei khan an lei ibô a, an rûhei khom an ikhiak pêk chit tâk a.

²⁵Khanungchu, rêng Daria khan rinêng chunga lêng mi tinhei, nam tinhei, ṭong tinhei ziangah khan lekha arziak a. “Ringeina nin ziangah om riseh.

²⁶Thupêk kî siam a nit, ki ram sunga mi tin tinin Daniela Pathian hi an ṭi rang a nit a, marit an tho rang a nit. “Ani chu Pathian iring a nit a, Kumtluangin roirêl a ti. A ram chu seh ngai no nia, Ân lalna chu kumtluangin om mai a ti.

²⁷Ani khan a san isua a, a saninzôk a, Rinêngah neh rivânah risinsiana hei, Thil rikhêl tak takhei a tho a, Sakeibaknei bâi ata Daniela saninzôktu chu a nit,” itin.

²⁸Daria inlal lâi neh Persia mi Kura inlal lâi sungkah chu Daniela kha vângsak inṭumin a om mai tâk a.