Read Biete DANIELA 7 Bible Online

DANIELA 7 - Biete bible

DANIELA 7

¹Babilon rêng Belsazara inlal kum khatnaah khan zânah rimang ki nei a, inlârna ki mu a. Ker mang khah ker ziak suak a,

²Kha zâna ki thil mu tlângpui chu hih a nit: Kôlkil ilika ta thlipui a hong râng a, tuikhanglian khah a hong sêm inrisok a.

³Tuikhangliana rithokah khan sarâng ilikah, ri-ang ino tak tak an hong suak a.

⁴Â khatna chu sakeibaknei angkah a nit a; khanniseh, mupui angkan rithla a nei a. Ki en mai lâiin arthlahei khah phâi inkol a nit a. Khante, sarâng khah rinêng ata kâiithoi a nit a, miriam angkan ke nika inding a nit a; khanungchu, miriam lungril a ziangah ipe a nit.

⁵Sarâng dang, â nikna khah ivom angkah a nit a, â nungtianga a ken â ding a. A bâiah khan kângru ithumkah a sê a; rôl a hong suak a, “Thoi inla, ni nuam dôrkah sa fah roh,” a ti a.

⁶Ki en ṭian mai lâiin, sarâng dang a hong ilang nôk a, keiârsi angkah hi a nit a; khanniseh, â ruangizângah khan iva rithla angkana rithla ilikah a om a, kha sarâng khan lu ilikah khom a nei sa a. A ziangah khan thuneina ipe a nit a.

⁷Khanungah khan sarâng â lina khah a hong ilang nôk a. Kha sarâng khah ṭiom neh inrît tak; ritha rât tak a nit a. Thîr ha roinpui a nei a, a fâk suat suat a, a sânphor a, a leklôihei khah a ken a sirpol a. Sarâng danghei angkan ni loiin riki sômkah a nei a.

⁸Rikîhei khah ki en mai lâiin, riki dang â chînte khatkah, riki danghei lâiah khan a hong mông suak a; riki lei om isai lâia ithumkah chu a bul rêtah â thlam pai tâk a. Kha riki khan miriam angkan mit neh bâi khom a nei a, ripâk neh risong takkan a ṭong suak a.

⁹Ki en mai lâiah khan rêngṭhungmunhei rido thlâm a hong om a. Rêngṭhungmun khatka chungah khan kumkhuantluanga om maiah khah a hong iṭhung a. A silbomhei chu vur angkana vâr a nit a, a sam chu beramul rithiang tak angkana ṭek a nit. A rêngṭhungmun chu meiṭhum ṭiom tak a nit a, a kekûihei chu meichok a nit.

¹⁰Khan tak ata khan tuinâr angkan mei a zuang luang suak a. Ani kha mi sâng têlin a sin an tho pêk a, a makungah khan a sînga sîng têlin an ngîr a. Roirêlna khah iphut a nit a, lekhabuhei kha iongin a om tâk a.

¹¹Khante, ki en mai lâiah khan riki chînte kha risong takka a ṭong irî khah ki riat sa a. Ki en mai lâi takah khan sarâng â lina khah ithatin a om a, a takpum khah meichokah khan ipaiin a om a, isehchit a nit tâk a.

¹²Khante, sarâng danghei kha chu an inlalna ilah pêk paiin an om a; nikhomseh, an ringna kha chu hunbi khatka neh zoro khatka sungkah chu la zua pêk a nit.

¹³Zâna inlârna ki mu lâiah khan hi khom hi ki mu sa a; mi khatkah, miriam naipa ang hi rivân sûmhei kâra zuang ki mu a. Kumkhuantluanga om ziangah khan a fe a, a makungah khan an ṭhui a.

¹⁴A ziangah khan thuneina hei, roinpuina hei, inlalna hei chu ipe a nit a; khanchu, nam tin, chi tin neh ṭong tinhei khan a sin tho pêk an ti. A thuneina chu kumtluangin om mai a ta, a ramin mong nî nei no nih.

¹⁵Khante, inlârna kî muhei khan a ne ṭhông a, ki lungril ân buai tâk a.

¹⁶Ki kôla ngîrhei lâia khatkah kha ki hang nâi a, kha thilhei murdi omzia ne rilfia pêk rangin ani khah ker don a. Khanchu, ani khan thil omzia kha a ne rilfia pêk tâk a.

¹⁷Ani khan, “Hi sarâng roinpui tak tak ilikahei hi, rêng ilikah, rinêng chunga la hong isuak ranghei chu an nit.

¹⁸Khannisela, Pathian Chungnungtaka mi rithianghei khan ram chu dong an ta, kumkhuakan nei mai an ti,” a ti a.

¹⁹Khanungchu, sarâng â lina chungchâng riat infel nôk ual ki nuam a, sarâng danghei ang ino danglam bîk tak, a hâhei thîr inia, a tinhei dâr inia, iṭiom tak a nit. Ai manhei chu a sê inrinôi a, a sânphor a, a leklôihei a ken a sirpol ngai a.

²⁰Khabanah, a lu-ah riki sômka om chungchâng hei, riki dang khatkah â chînte hong imong suak a, riki danghei nêk khoma iṭiom, mit inei a, bâi khom inei, ripâk taka ṭong ngai riki dang lei om isai â thlamtu chungchânghei kha â ria kî nuam a nit.

²¹Khante, ki en mai lâiah khan, kha riki ngêi khan Pathian mihei a doi a, â nê riai tâk a.

²²Khanungchu, kumkhuantluanga om maiah kha a zuang a, roirêlna chu Chungnungtaka mi rithianghei kha thiam a zuang inchang a, Pathian mihei inlal hun chu a hong itlung tâk a nit.

²³Hingka hin a ne sîr pêk a, “Sarâng â lina chu rinêng chunga rêngram â lina hong iom rang chu a nit, rêngram dang murdi ata danglam bîk, rammual pumpui ilem zoi a, chîlpol a, sânphor rang chu a nit.

²⁴Riki sômkahei kha chu hi ram ata rêng sômkah la hong isuak rang chu an nit. Khanungah khan rêng khatkah hong suak nôk a ta, a matona rênghei ata danglam bîk nîng a ta, rêng ithumkahei chu inlîr a ti.

²⁵Chungnungtaka doiin thu isîr a ta, Pathian mihei khah sirdêng a ti. An hunbihei neh dânhei chu indanglam pêk tum a ta, a thunuaiah khan Pathian mihei chu kum ithumkah neh kum rilangkah chu om an ti.

²⁶Khanungchu, roirêlna hong om a ta, a mong idêna isehchit a, inrimang thal rangin a thuneina kha ilah pêk nîng a ti.

²⁷Khante, vânkhup nuaia ramhei roinpuina neh sinthotheina chu Chungnungtaka mi rithianghei ziangah khan ipe nîng a ti. An ram chu ram rilun nîng a ta, ram tin tinin an sin tho pêk an ta, an thu zôm an ti.” itin.

²⁸Amahih thu mongna chu a nit. Kei chu a ne hong ṭhông tak tak a, ki mâi a hong duk zap a; nikhomsela, thu kha ki lungrilin kî vong ngit a nit.