Read Biete DANIELA 8 Bible Online

DANIELA 8 - Biete bible

DANIELA 8

¹Rêng Belsazara inlal kum ithumnaah khan a voinikna inlârna ki mu nôk a.

²Inlârnaah khan Elam biala om rêng khopui Sosaah khan ki lei om a, Ulai vadung rikamah ki lei iding a.

³Khanchu, ki mit ki hang inlêng a, vadung kôlah khan berachal, riki inika nei hi â ding a. Khante, riki inikahei kha an sei seng seng a; nikhomsela, khatka chu a dang nêkah khan a sei ual a, â sei ual kha mông nung ita chu a nit a.

⁴Berachal khan thlang tiang hei, mâr tiang hei, sim tiang hei a tâi iphirin ki mu a; a matonah khan sa dang rêng rêng â ding ngam thei omak a; ama ata â zôk thei khom omak e. Kha angkan a nuam lam lamin a châng a, amah neh amah arsong a.

⁵Im ai nit ki ngaitua mai lâiin, thlang tianga rithokin kêlchal irât tak a hong itlân a, a rât rai sikin a ke khan rinêng khom chuang phâk mak a. Kêlchal khan a mit neh a mit kârah khan riki tôtvût tak hi a nei a.

⁶Berachal riki inika nei, vadung kôla ding kî mu kha a hong pan a, a rât theidôra râtin a pun tlit tlit a.

⁷Berachal khah a hang sik ki mu a, a chunga a ningthik rai sikin berachal khah a dêng a, arki inikah kha â khiak pêk a. Ama doi rangin berachal khan râtna rêng rêng nei mak a. Khanchu, berachal khah rinêngah ân lîr a, a chîlpol tâk a, a kut ata san isua thei rêng rêng omak e.

⁸Kêlchal kha natinsat takka ripâkin arsong tâk a; khannisela, artha rât lâi takah khan arki roinpui kha a kiak tâk a; a munah khan riki rikhêl tak tak ilikah, kôlkil ilika song chit an hong mông suak a.

⁹An lâia riki khatka tah khan riki chînte a hong cher suak a, sim tiang hei, sak tiang hei a hong thuar a, ram inkung tiang hei a hong thuar a.

¹⁰Vân mipuihei idoi rang khopin a hong thuar a, kha vân mipui ṭhenkahei neh ârsi ṭhenkahei kha rinêngah a paiiṭhul a, a sirpol tâk a.

¹¹A nit, vân mipuihei rêng itluka roinpuin arbe a, kôlni suak ikipa ribôlna an ilan mai ngai kha ân ringam pêk a, Mun Rithiang kha â siat pêk a.

¹²Kha munah khan ribôlna dik, kôlni suak ikipa lan nêkan mipuihei khan thil an thonsual tâk a, sakhua dik khah rinêngah an pai tâk a. Kha angkan riki khan lam tinrêngah lo ai tluk a nit.

¹³Khanungchu, vântirtôn khatkan vântirtôn dang ziangah khan, “Kôlni suak ikipa ribôlna thillanhei inboia siatna rikhêl tak iomhei, Mun Rithiang neh vân mipuihei sirdea omna chungchâng inlârnaa mu hi itena sôt im ai nit rang tâk?” itin ardon ki riat a.

¹⁴Vântirtôn dang khan a ziangah, “Zîng neh kholoi tina thillan an ilan ngai chu ṭum sânginika rizathumka tenah nîng a ta; khanungah khan Mun Rithiang chu thâr infâi nîng a ti,” a ti a.

¹⁵Inlârna kî mu khah a omzia iria ki tum a, kha lâi takah khan ki matonah khan miriam mêl riput hi a hong ngîr a.

¹⁶Khante, Ulai vadung rikamah miriam rôl ki riat a, kha rôl khan, “Gabriel, hi mi hih inlârnaa a thil mu kha rilfia pêk roh,” a ti a.

¹⁷Gabriela kha a hong nâi a, ki kôlah a hong ngîr a. Khanchu, ki ṭi tak tak a, nuaiah ke bok rak tâk a. Nikhomsela, ani khan ki ziangah, “O miriam naipa, a omzia rethiam roh, inlârna chu zoro nungkhôna rang a nit,” a ti a.

¹⁸A ne sôn mai lâiin rinêngah rammual tuilôn reh loiin ker phek rak a; nikhomsela, a ne zuk kâi a, a nen ding a.

¹⁹Ani khan, “Ringai roh, Pathian ningthikna zoro nungkhôn tianga thil hong iom rang kha nang inriang ki ti. Inlârnaa ni thil mu khah zoro nungkhôn chungchâng thil a nit.

²⁰Berachal riki inika nei nî mu khah Media neh Persia rêng an nit a.

²¹Kêlchal khah Grik rêng a nit a, a mit neh a mit kâra riki tôtvût khah rêng masa tak a nit.

²²Khante, kha riki kiak tâk muna riki ilika hong imông suak kha chu, kha rama rithokah khan ram ilikah a hong îding suak rang tina a nit, an sinthotheina chu rêng masa dôrkah chu nino nih.

²³“Kha rênghei inlalna a mong rang a hong nâi tena, an siat sinhein a mongrêt an tlung tenan chu rêng mêl inrît tak, thu khir tak tak ireh thei, tuklulilian mi la hong suak a ti.

²⁴A sinthotheina chu irât tak nîng a ta; khanniseh, ama khât sinthotheina bang chu ni no nih. Ani khan siatna rikhêl tak ithlun a ta, lam tinrêngah lôtluk a ti. Pathian mihei neh mi râthei chungah khan siatna ithlun a ti.

²⁵A vâr rilet sikin a milak lampuiheiah lôtluk a ta, a lungrilin risong khap a ta, ningbei takka om mi itam takkah isiang a ta, rênghei Rêng ilua khom doi a ta; khannisela, miriam ritha mang viat loiin ani khah ikhiakin om a ti.

²⁶Zîng tiang neh kholoi tiang tina ribôlna an ilan ngai chungchâng inlârnaa nî mu khah a hong itlung ngêt rang a nit; khanniseh, ni thil mu khah la dâirekpui hi roh, sûn itam takka nunga la tlung rang a nit a,” a ti a.

²⁷Khante, kei chu ke lung a zîngin, sûn izâka manih chu dam loiin ki om a. Khanungchu, ki thoi a, rêng sin kha ki tho nôk tâk a; khanniseh, inlârnaa ki thil mu khah rikhêl ki ti ok a, kî riatthiam thei ino a nit.