Read Biete DANIELA 9 Bible Online

DANIELA 9 - Biete bible

DANIELA 9

¹Media richia mi Daria, Ahasuera naipa kha Babilon ramah rêngin ân lal a.

²Ân lal kum khatnaah khan, keimah Daniela hin, lekhabu rithianghei kha iṭha takkan ki tep a; kum sômsarika sung Jerusalem khua siat inrama a om rang thu PUMAPA khan zânthla Jeremia zianga thu a zuang îthlun chungchâng kha ki ngaitua a.

³Bu ngeia borapuan isil puma rivut kâra ṭhungin PUMAPA Pathian ziangah ki ṭongṭai a.

⁴PUMAPA ki Pathian ziangah khan ki ṭongṭai a, ki mihei thil thonsual sikin thupha ki chôi a. A ziangah, “O PUMAPA Pathian, ni roinpui a, nang kin ichôiinrisâng a nit. Ni thuthlungah ni iamom a, nangmah lung nang ithlung a, ni thupêk izômtuhei chungah lungkhamna ni nei mai ngai a.

⁵“Ni thupêkhei neh ni dânhei ata pêtin kin isual tâk a, dik ino takkan kin om a, pualoi takkan kin châng a, kin lei rihel tâk a.

⁶Ni suak kin rênghei, kin ruaituhei, kin pahei neh hi ram mipui murdihei zianga ni zânthlahein ner minga thu an îsîr kha ngaisak khâi mang ung a.

⁷O PUMAPA, felna chu nangma ta a nit a, keini rêkin chu atûnah hin kin chungah mâimôkna bang kin îthlun tâk a nit. Judai rama la omhei, Jerusalema omhei, an siatna ni chunga an iamomnona sika ram ila neh ram inâia ni îchek indar Israel mi murdi khom thumun korong kin nit.

⁸O PUMAPA, ni chungah kin isual tâk sikin kin rênghei, kin ruaituhei, kin pahei neh kin rêngka dongtum chu mâimôkna ringot a nit.

⁹PUMAPA kin Pathian, nang chu lungkhamna ni nei a, ni chungah rihel ngai khom unlang ni ne zâ ngai a.

¹⁰PUMAPA, kin Pathian ni thu lak ôi nuam mang ung a, ni suak zânthlahei imanga kin ranga dân ni ne ipêkhei khom zôm nuam mang ung a.

¹¹A nit, Israelhei murdi khan ni rôl khah ringai loiin, ni dânhei an îsiat tâk a nit. Ni chungah kin isual tâk a, khasikah khan ni suak Mosia dân bu-a riziaka om vânisâmnahei kha kin chungah ni îthlun tâk a nit.

¹²Keimani neh kin ruaituhei chunga thil ṭhano ithlun ranga nî tihei kha ni îthlun tâk a nit. Vân nuai pumpuia lâ om ngai ino kuttum inrik kha Jerusalem chungah nî tho tâk a nit.

¹³Mosia dâna riziak angkan hi thil ṭhano murdihei hi kin chungah a zuang itlung a nit; khanniseh, khaten khomah khan kin siatnahei kha nung isong a, ni thudik riat thiamnahei kin neina rangin PUMAPA kin Pathian lungtlukna kha zong ual mang ung a.

¹⁴O PUMAPA, kin Pathian ni sintho tinrêngah ni fel a, amakhah kin lei zôm khâi no sikin kuttum nê tho rangin ner siam ṭian mai a, kin chungah ni zuang îthlun tâk a nit.

¹⁵“O PUMAPA kin Pathian Aigupta ram ata kut irât taka ni mihei ṭhui suaktu, vuansûn tena riming inthangna changtu, kin isual tâk a, pualoi takkan kin iom tâk a nit.

¹⁶O PUMAPA, nang kî ngên a nit, ni felna sikin ni ningmurna neh ni ningthikna kha Jerusalem ata khah rikiang riseh. Ni khopui neh ne tlâng rithiang a nit a, kin sualhei sik neh kin pahei sualna sikah khan Jerusalem neh ni mihei chu kin vêla mi murdihei lâiah sîrinsian a om tâk a.

¹⁷Khasikin, O kin Pathian atûnah hin ni bôi ṭongṭaina neh ngênnahei hi ringai inla, ni Mun Rithiang inrama om tâk kha inding nôk roh. A nit, mi tinin Pathian ni nit iti an riattheina rangin inding nôk roh.

¹⁸O ki Pathian, ne kuar sung inla, ner ngai pêk ta; ne en inla, kin rizal tâk dânhei neh ner ming ichôi khopui ram tâk zia hih en ta. Kin felnahei sikin ni makungah hin ngênna kin îthlun ni mak a, ni lungkhamna roinpui tak sika ngên kin nit ual.

¹⁹O PUMAPA, ringai inla, O PUMAPA, ne zâ roh. O PUMAPA, lei ringai inla, zuang sin zel roh; O ki Pathian, mi tinin Pathian ni nit iti an riattheina rangin rivuak no roh. Hi khopui neh hi mihei hih nangma ta an nit,” itin.

²⁰Ṭongṭaiin ki sual neh ki mi Israelhei sual thupha chôiin ki ngên a, PUMAPA ki Pathian ziangah a Tlâng Rithiang inding thar nôk rangin ki ngên a.

²¹Khangkana ki ṭongṭai mai lâiah khan, inlârna masaa kî mu tâk, Gabriela kha kholoi tiang ribôlna lan ngai zoro vêlah hin, irât takka vuangin a ne zuang pun a.

²²A ne sôn a, ki ziangah, “O Daniel, riatthiamna vâr tak nang innei rangin kî zuang a nit.

²³Pathian ziangah ni ṭongṭai phuta rithokin nang ai sâm tâk a nit. Ani khan lung nang a thlung sikin sâmna kha nang iril rangin kî zuang a nit. Khasikah khan inlârna nang kî rilfia pêk hi iṭha takkan ringai roh.

²⁴“Sual neh siatna ata ni mihei neh nin khopui rithiang san isuana rangin hapta sômsarikah Pathianin a înkung a nit; sual ngaidam nîng a ta, kumkhuan idik taka sin itho ni tâng a ti. Inlârna neh rillôkna chu hong tlung rikip tâng a ta, Mun Rithiang chu thâr inrithiang ni tâng a ti.

²⁵Amahih richik inla, rianfel roh: Jerusalem inding neh siaminṭha ranga thupêk a suaka rithoka Pathian Riakinrithuah a hong ilang idênin chu hapta sarikah nîng a ta, a kotsuahei neh a kulbanghei isiam nîng a ti. Amakhah hapta sômirukkah inika sung iding a ta; khanniseh, kha sung khah buaina zoro tak nîng a ti.

²⁶Khante, hapta sômirukah inika nungah khan Pathian Riakinrithuah kha dik ino takka that nîng a ti. Khante, rêng thu nei tak hong iṭhung nôk rang sipaihei khan Jerusalem neh Mun Rithiang tak kha isehchit an ta; mongna chu tui ilian angkah nîng a ta; Pathianin a lei înkung thlâm ridoina neh inramna kha a hong itlung rang a nit.

²⁷Kha rêng khan mi itam takkah neh hapta khatka sung rang thuthlung siam a ta, hapta ritenkah a hek tenan chu ribôlna neh thillan an ilan ngai khah inmong a ti. Khante, Siat porinchetak kha Tempil sîp rizumah khan siang a ta; kha muna â sehtu kha Pathianin a mongna rang a înkung angkana inram a nit mâkah chu kha munah khan om mai a ti,” a ti a.