Read Biete HOSEA 1 Bible Online

HOSEA 1 - Biete bible

HOSEA 1

¹Judahei ramah Uzia hei, Jothama hei, Ahaza hei, Hezekia hei inlal lâi neh Israel ramah Joasa naipa Jeroboama inlal lâiin Beria naipa Hosea ziangah PUMAPA thu a zuang tlung a.

²PUMAPA khan Hosea manga Israelhei zianga thu â sîr phut lâiah khan hingka hin Hosea ziangah, “Fen la, nochizuar ngai richi lâia mi nupuiin nei inla; ani khan ama angkana ngir nai nang nei pêk a ti. Khangkah khan ki mihei khan an ne mâk a, an înrê tâk a nit,” a ti a.

³Khanchu, Hosea khah a fe a, Diblaima nainu, Gomeri khah nupuiin a nei tâk a. Ani khan nai a vong a, naiipa a nei pêk a.

⁴PUMAPA khan Hosea ziangah, “Arming khah Jezreela [1] sak roh; Jezreel muna Jehuan thisen a lei îsua phuba khah sôt ngâk loiin Israel rêng chungah khan kî lâk rang a nit. Israelhei inlalna ram kha ki înmong rang a nit.

⁵Khante, kha nî-ah khan Israelhei thal ngul khah Jezreel phâiah ikhiak ki ti,” a ti a.

⁶Khante, Gomeri khan nai a vong nôk a, nai nupang a nei a. PUMAPA khan Hosea ziangah, “Arming khah Lungthlungloii sak roh. Israel mihei kha lunginkham khâi no ning a, izâ khom izâ zel khâi no ning e.

⁷Nikhomsela, Juda mihei kha lunginkham ki ta, thal ngulhei, khandaihei, sakorhei, sakor chungchuang mihei ritha mangin anmani inzôk no ning a, keimah PUMAPA an Pathian ngêiin ki înzôk rang a nit,” a ti a.

⁸Gomeri khan Lungthlungloii kha rinu ne ân mâkin chu nai a vong nôk a, naiipa a nei nôk a.

⁹PUMAPA khan Hosea ziangah, “Arming khah Kimininoa sak roh. Israel mihei chu ki mihei ni khâi mak chei a, kei khom nin Pathian ni khâi no ning e,” a ti a.

¹⁰“Israel richihei chu tuikhangliana ṭiai angkana tam, tep zoi loi dôr la hong nîng an ti. PUMAPA khan an zianga, ‘Ki mihei ni mak chei u,’ a tina mun ngêiah khan, ‘Pathian iring naihei nin nit,’ tîng a ti.

¹¹Khante, Juda richihei neh Israel richihei kha lar chinbûm an ta, an ta rangin ruaitu khatkah lar thlang an ta; an ramah khan mafônin, vângisak takkan om an ti. A nit, Pathianin Jezreel ân ding inthar nikhua chu nikhua roinpui tak nîng a ti.”