Read Biete HOSEA 10 Bible Online

HOSEA 10 - Biete bible

HOSEA 10

¹Israel mihei chu grep rui rizâm dût, â râ kûr ngut angkah hi an nit ngai a. An irâ tam tlia angkah takin mâichâmhei an inpung a. An hong richong lam angkah takin an ibiak lungphun kha enihoi takkan an siam a.

²An lungril chu milakin a sip a, an sual man chu mu ngêt an ti. An mâichâmhei chu PUMAPA khan ito sim a ta, an ibiak lungphunhei chu isiang a ti.

³“PUMAPA ṭina nei mang me a, rêng ei inei khâi ino a nit. Khannisela, rêng khom nei ei la im a ne tho pêk thei ual rang a?” la tîng an ti.

⁴Thu chanlamboi an ril a, milaka ṭongrikhâmin thuthlung an siam a. Rinêng tuk isaia loisûl tûr inei a hong iṭoi bit khap ngai angkah hin roirêl dikna chu ai dîp inrimang tâk a nit.

⁵Samari rama omhei chu Beth-Avena rângkachak serâtchaltuai rilim kha armang tak sikin thlavâiin neh ringaiinsian om an ta, anni neh mirmil thiampuhei chu ṭap an ti. Mirmil roinpui rivona khah ilîppai a nit tenan chu irung tâng an ti.

⁶Asuria rêng roinpui Jereba zianga peh rangin mirmil kha fepui an ti. Israel chu mâimôkin om a ta, ama roisak ngêiah khan izak rimûng a ti.

⁷Tuiin thingbongbâi ai fen ngai angkah hin Samari rêng kha ṭhui inrimang nîng a ti.

⁸Aven tlângsîp, Israelhein mirmil chubai an ûnna ngai khom kha isehchit nîng a ta, an mâichâmheiah khan loisûl neh rilingkung ṭoi a ti. Mihei khan itlânghei ziangah khan, “Ner khû rei,” tîng an ta, mualhei ziangah khan, “Ne del rei,” tîng an ti.

⁹PUMAPA khan, “Israel mihei kha Gibea an isual nî âta khah ki chungah an la isual mai a nit. Khasikah khan Gibea khuaah ridoinan môk a ti.

¹⁰Hi mi sual takhei hi keiman doi ki ta, kuttum thông ki ti. Anmani doi rangin nam tin ṭanginrual an ta, an siatna sikin kuttum tuang an ti.

¹¹“Israel chu bu chîl inuam tak serât rilâ inrisei tâk angkah a nit ngai a. Nikhomsela, a ring enihoi takah khan ringkol inribât tâng ki ta, sin intak insin tâng ki ti. Juda kha âlkâitun siam ki ta, Israel khan hârbihei inrinôi a ti.

¹²Nin rinênghei tukilet unla, mahni ta rangin felna tu unla, lungkhamlianna ât rei; keimah nin PUMAPA tiang ngat nôk zoro a nit tâk; khanchu, zuang ki ta nin chungah ṭhatvurna insûr ki ti.

¹³Khannisela, siatna nin tu a, porinchena nin ât a. Nin milak ril irâ khah nin ifâk ngai a nit. “Nin tâlihei neh nin sipaihei tamnaah hin ner ngat sikin,

¹⁴Ni mihei chungah ridoina tlung a ta, ni kulpui murdi chu isehchit nîng a ti. Rêng Salmanan ridoi nî-a Beth-Arbel khua a îsiat chit a, nunaihei ai that inrimang chit angkah khan nîng a ti.

¹⁵Nangni Bethel mihei o, nin sualna natinsat tak sikin kha thil khah nin chungah zuang tlung a ti. Israel rêng khom ridoi riphut kaneh thi zel a ti,” a ti a.