Read Biete HOSEA 11 Bible Online

HOSEA 11 - Biete bible

HOSEA 11

¹PUMAPA khan, “Israel nam chu a naipang lâi ata lung ki thlung a, Aigupta ram ata ki naipa rangin kî koi suak a nit.

²Nikhomsela, ki koi rizing dôrkah an ne lat tîr tîr a. Baal ziangah an ribôl a, Mirmil ziangah namhoi an ihâl ngai a nit.

³Khannisela, keiman a nit, Israel chu ilôn ki înrisei. Ki mihei chu ke bânin ke pom a, Nikhomsela, anmani ki hong idonsui a nit iti reh mak e.

⁴Anni chu lungthlungna neh lungkhamnan ki tiang ki kâi a, Ke pom a, ke ṭângah ken ribei a, Iduam takkan anni chu ifah rang kî pêk ngai a nit.

⁵Khannisela, ki ziangah kîr nuam mak a, Khasikin, Aigupta ramah tir kîr nôk ki ta, An chungah khan Asuria inlal a ti.

⁶An khopuihei chu khandai khan rifang a ta, An kulpuihei chu isehchit nîng a ti. A nit, an khât roisak an zôm sikin ki mihei chu inrimang ki ti.

⁷Ki mihei khan nung an ne isong tên tên a nit. An ringkol ribât rik rai sikin irung an ta, Nikhomsela, tutên idom pêk no nih.

⁸O Israel ingkan im nang ithla rak thei tâng ki ta? Ingkan im nang marak thei tâng ki ta? Ingkan im Adma[6] angkan nang inrimang thei ki ta? Ingkan im Zeboim angkan nang hêm thei ki ta? Khangkana tho rangin ki lungrilin ne phal no nih. Ni chunga ki lungthlungna hi ai natinsat a nit.

⁹Ki ningthikna natinsat tak sikah khan kuttum nang tho khâi no ning a, Israel chu inrimang nôk khâi no ning e. Kei chu miriam ni loiin Pathian kêng kî nit. Nin zianga om Mirithianga chu ki nit. Ningthik pumin zuang khâi no ning e.

¹⁰“An irâlhei chungah sakeibaknei angkana ker ông tikin chu ki mihei khan ne zui tâng an ti. Thlang tianga rithokin ki ziangah rimot takkan hong zun zun an ti.

¹¹Aigupta ata iva lôm angkan neh Asuria ata vaṭhu angkan hong an ti. Khante, an ram chu inlua nôk ki ti. Keimah, PUMAPA thusuak a nit,” a ti a.

¹²PUMAPA khan, “Israel mihei khan milak neh lêmna thun an ne hual a, Juda mihei khom, keimah Pathian rithiang neh iamom chungah an la irhel mai a nit.