Read Biete HOSEA 12 Bible Online

HOSEA 12 - Biete bible

HOSEA 12

¹Israel mihei khan zîng ata ni tlâk idêna an isin tinrêng hih chanlamboi neh rimangna kah a nit. An lâiah rilêmna neh risualna a pung ual ual a. Asuria neh thu an thlung a, Aiguptaah khan riak ai thon inlût a nit,” a ti a.

²PUMAPA khan Juda mihei chungah khom demna ai nei a nit. Israel khom a om dân angkah takin kuttum thông a ta, a sintho angkah takin thung a ti.

³An chibul Jakoba khom khah a nu sûla rithokin ân zirpuipa Esauva kechângkôiah a zuang man a. A hong puitlingin Pathian arbuanpui a;

⁴a nit, vântirtôn arbuanpuia â nê tâk a. A ṭap a, ṭhatvurna a ngên a. Khante, Bethel munah khan Pathian chu Jakoba ziangah a zuang inlâr a, ani chu â sôn a.

⁵PUMAPA Pathian, Tinrêngthothei chu PUMAPA a nit a, ama riming ichingin chubai iûn rang a nit.

⁶Khasikin, O Jakoba richihei, nin Pathianah ringat mai unla, a ziangah kîr nôk rei. Iamom neh idik takkan om unla, nin Pathian sintho rang khah ngâk ṭian rei.

⁷PUMAPA khan, “Kanan mihei angkan Israel mihei khan ritâna dik ino an mang a, mihei ilêm ringot an inuam a nit.

⁸‘Ei richong ok tâk a, richon ei bûm ok tâk. Ei sinthona tinrêngah lak îte thil ṭhano an mu rang omak a,’ an ti a.

⁹Nikhomsela, keimah hi Aigupta rama rithoka nangni ṭhui suaktu PUMAPA nin Pathian chu ki nit a. Ramchâra nin ziangah ki zuang lâia angkah khan puan inah nangni lân om nôk ki ti.

¹⁰“Zânthlahei ziangah thu ke sîr a, inlârna itam takka ki pêk a. Zânthlahei imangin riningna thu ki mihei chu kî pêk ngai a nit.

¹¹Khannisela, Gileadah khan mirmil chubai an ûn a, kha chubai iûntuhei kangân chu thîng an ti. Gilgalah khan serâtchal an lan ngai a; a nit, an mâichâmhei chu hali âla lung ibuk khôm pipai angkah nîng a ti,” a ti a.

¹²Jakoba khan Mesopotamia ramah lâizâm a tho a, nupui ilon sin a tho a, bera ai enkol ngai a nit.

¹³Zânthla mangin Israel mihei chu Aigupta rama rithokin PUMAPA khan a ṭhui isua a. Zânthla ngir imangin a hong idonsui ngai a nit.

¹⁴Israel mihei lakin PUMAPA ning an inthik tak tak a; khasikin, an thisen isua mo chu anmanin pêl an ti. PUMAPA mualphoi an sak sikin mualinphoiin om ngêt an ti.