Read Biete HOSEA 13 Bible Online

HOSEA 13 - Biete bible

HOSEA 13

¹Zoro thleng tâkah khan chu Efraim namin thu â sîrin chu Israel nam danghei kha an rilo a lei inthing ngai a. Israel mihei lâiah ringai inlut an lei nit ngai a. Nikhomsela, Baal ziangah ripen an isual tâk a, hi sikah hin an ithi rang a nit.

²Atûnah hin an isual ual ual a. An tangkarua mangin mirmil an siam a, khahei murdi kha kutithiamhei lungsuaka siam a nit pumin mihei kha, “Ribôlna hong lan rei,” an ti a. Ingkan im serâtte rilim kha mihein an ifôp thei tâk nâ!

³Khasikin, ki mihei hi zînga sûm angkan neh zîng rido boi zel ngai angkan boi an ti. Rîzôla farsi, phâivuan ai sêm inrimang ngai angkah neh meikhû angkan rimang an ti.

⁴PUMAPA khan, “Kei chu Aigupta ram ata nangni ṭhui suaktu PUMAPA nin Pathian chu ki nit, keima tino chu Pathian dang nei mak chei. Keima ban hi nangni saninringtu dang omak.

⁵Ram iṭôl ramchâra nangni hong idonsuitu kha ki nit.

⁶Nikhomsela, ram iṭha nin hong chuan tenan chu nin khopin nin thlâi tâk a; khanungchu, nin hong risong a, nin ne irngil tâk a nit.

⁷Khasikin, nin ta rangin sakeibaknei angkah ki nit tâk a. Keite angkan lampuiah nangni ki îruang ṭian rang a nit.

⁸Ivom a tê chân angkan nangni risualpui ki ta, nangni sânphor ki ti. Khante, sakeibaknei angkan a mun zelah nangni fân rimang ki ta, ramsahei angkan sânphor chitin om nin ti.

⁹“O Israel, nangni ki înrimang rang a nit. Tu ngân im nang isan thei rang tâk na!

¹⁰Ni khopui murdi inzôk theitu rang ni rêng khah atûnah hin taktiang im ai om tâk? Rêng neh ruaituhei ne peh roh, nî tihei kha taktiang im an iom tâk?

¹¹Ningthik pumin rêng nang ki pêk a, ki ningmurin anni kha kî lâk inrimang nôk tâk a nit.

¹²“Israel siatna chu riziak tap a nit a, a sualna chu richik tap a nit.

¹³A ta rangin naiha sêna kha zuang tlung zel a ta; nikhomsela, a zoro thapah sûlbâia zuang om nuam ino nai angkah hi a nit.

¹⁴Seol sinthotheina ata anni chu ritlan no ning a, thina ata saninzôk no ning e. O, thina ni rîhei kha zuang chôi roh, O Seol nen rimangna kha zuang chôi roh. Hi mihei hih lunginkham tlak khâi no ning e.

¹⁵Israel chu vângsak inṭum takkan om khom sela, ramchâra rithokin khosak ithli lum tir ki ta, a tuikuanghei neh a tuinârhei chu inkang vang a ti. A thil ilu tinrêng khom ilah pêk vang nîng a ti.

¹⁶Samaria chu ki chungah arhel sikin dengthei intuang ki ti. A mihei chu khandaia inlîrin om an ta. An naitesenhei chu rinênga pai inrinôi chit nîng a ta, an nupang, naivong lâihêi chu sân ithlêr nîng an ti.”