Read Biete HOSEA 14 Bible Online

HOSEA 14 - Biete bible

HOSEA 14

¹O Israel mihei, PUMAPA nin Pathian ziangah kîr nôk rei, nin sualna sikin nin ilîr tâk a.

²PUMAPA ziangah kîr nôk unla, hingkana ṭongṭaina hi a ziangah lan rei, “Kin siatna murdi ne ngaidam inla, kin ṭongṭaina ne ham pêk roh. Khanchu, kin ṭonginkung lam angkan nang chôiinrisâng kin ti.

³Asuria khan ne saninzôk thei no nia, ridoi sakorhei khan ne vênginzôk thei ual no nih. Kin kut suak mirmilhei ziangah khan kin pathian nin nit, ti khâi no ning ung e. Farahei khan nangmah-ah hin lungkhamna an lei imu ngai a nit,” itin.

⁴PUMAPA khan, “Ki mihei chu an nung ritolna hi indam ki ta, An chunga ki ningthikna arkiang tâk a, Anni chu ki lungril murdin lung thlung ki ti.

⁵Ram iṭôla ridofîm angkan Israel mihei ziangah om ki ta. Anni chu lili angkan hong pâr an ta, Lebanon tlâng thing angkan idet takkan rizung kâi a ti.

⁶Â ṭanghei chu inbûr lûp a ta, Â enhoi zia chu oliv thing angkah nîng a ti. Lebanon tlânga sidar thing angkan â nam riuai vang a ti.

⁷Ki dâilîm nuaiah hong lêng nôk an ta, Bu angkan thuar dût an ta, Grep râng angkan kûr ngut an ti. Lebanon uain angkan an riming inthang a ti.

⁸Israel mihei khan mirmilhei neh rimanna ite nei khâi no nia; An ṭongṭainahei sâm ki ta, Anni chu donsui ki ti. Fâr thing iring zun angkana omin anni chu ihoih ki ti. An ṭhatvurna tinrêng nâr chu ki nit,” a ti a.

⁹Tukhom mi vâr kangânin chu hihei hih rethiam sela, an lungrilah vong riseh. PUMAPA lampuihei chu â dik a, mi dikhei khan an irô rang a nit. Nikhomsela, mi siahei rêk khan chu amakhah an ngaisak no sikin an îba ngai a nit.