Read Biete HOSEA 4 Bible Online

HOSEA 4 - Biete bible

HOSEA 4

¹O, Israel richihei, PUMAPA thu chu ringai rei: “Hi ramah hin thutak neh lungkhamna neh Pathian riatna omak sikin Pumapa khan hi ram iluatuhei thiamno a închang a nit.

²An ṭonginkunghei nâk nâk an ikhiak a; milak an tho a, mi an that a, inru an tho a, an inrê a, risualna a pung a, thisen isuana chu rizom zatkan a om a.

³Khasikah khan ram chu ṭôl a ta, a sunga om tinrêng chu thi vang an ti; A nit, ramsahei, chungavuang ivahei neh tuikhangliana ingahei tinrêng chu rimang vang an ti,” ai ti a nit.

⁴PUMAPA khan, “Tutên mipuihei kha sêl no sela, ridem risak no riseh, kî sêl chu nangmani thiampuhei kha nin nit.

⁵Sûn neh zân chanlamboiin nin ibâ a, zânthlahei khom nangmani angkah khah an nit. Ni nu, Israel chu ki inrimang rang a nit.

⁶Ki mihei chu keimah an ne riat nuam no sikin an irmang a nit. Nangmani thiampuhei khomin keima riatna nin heng a, ken riseina nin nôl a, khasikah khan kei khomin ki thiampu nin nitna nangni kî heng tâk a nit. Nin naihei khom ki thiampu ti khâi no ning e.

⁷“Thiampu nin pung tam dôrkah ki chungah nin isual tîr tîr a; khasikin, nin roinpuina chu mualphoina nangni inchang pêk ki ti.

⁸Ki mihei sualna mangin nin richong tûr tûr a. Khasikah khan insual mai rangin nin inuam a nit.

⁹Mipuihei angkan nangni thiampuhei khom dengtheina tuang nin ti. Nin pualoina sikah khan kuttum nangni thông ki ta, nin sintho lam angkah takin nangni thung ki ti.

¹⁰Thillana nin dongtum chu fâng nin ta; nikhomsela, khop ual no tin u. Chi ṭhatna pathianhei [3] chubai ûn khom unla, nai nei intam ual no tin u, PUMAPA ngaisak loi a, pathian dang nin biak sikin,” a ti a.

¹¹PUMAPA khan, “Hurnahei, uainhei, zuhei khan ki mihei riatthiamna lungril a lâk inrimang ngai.

¹²Ki mihei khan thing mirmilheiah inlârna an zong a, an irol khan an iriat nuam kha â ril ngai a. An ne mâk tâk a. Nupang, nochizuar ichang angkan pathian dang ziangah an irpêk tâk a nit.

¹³Tlângsîpheiah khan an ribôl a, mualheiah, thingkung dâilîm nuai ihoiheiah khan namhoi an hâl a. “Khasikah khan nin nainuhei khan nochizuar an song a, nin imoinuhei khan inrê an isong a nit.

¹⁴Nin nainuhei nochizuarin an om a, nin imoihei an inrê khomin kuttum tho no ning e. Nangmani ngêi khom nochizuarhei neh nin infiar a, mâichâm nochizuarhei neh khan sanong ribôlna nin lan ngai a. Thuvârin ai ti angkan, ‘Riatthiamna nei ino mipuihei chu ilîr an ti.’

¹⁵“Israel nangman nochizuar ni song tâk khoma Juda luan song tlak no riseh. Gilgalah hei, Beth-Avenah [4] hei ribôlna lan rangin fe no rei, amakhan PUMAPA ring riming ichingin ṭongrikhâm no rei.

¹⁶Sakuartung rilate tuklulilian angkan Israelhei chu an tuklul a lian a. Ingkan im berate angkan phûlah ke fa thei rang a?

¹⁷Israel mihei chu mirmil pathian zêkna nuaiah an om tâk a. An nuam lam lamin om ta riseh.

¹⁸Zu an in ngek zoiin chu nochizuarnaah khan an riphal riai ngai a. Roinpuina nêkan chu thil izakpui iom chu an ringai innat ual a.

¹⁹Phâivopui isêm angkan sêm invuangin la om an ta, an sanong ribôlnaah khan la zak ngêt an ti.