Read Biete HOSEA 5 Bible Online

HOSEA 5 - Biete bible

HOSEA 5

¹“O nangni thiampuhei, amahih ringai unla, nangni, Israel mihei nin ikuar sung unla, O rêng insungkuahei, ringai rei. Diknan roi nin rêl rang a nit a; khanniseh, Mizpaah châng nin kam a, Tabor tlâng idênin lên nin zar a.

²Sitim munah khan dîp inthûk tak nin choih a; khasikin, nin rêngkan kuttum nangni kî tho rang a nit.

³Efraim chu ki riat infel a, Israel chu keima ata rithup thei no nih. Atûnah hin Israel kha ân rê tâk sikin porinche takkan ai om tâk a nit.

⁴“An Pathian tianga ngat nôk rangin an sual sinhei lak khan â dan khap a. Nochizuar lungril an lâiah a om ngit a, PUMAPA chu an iriat thei ino a nit.

⁵An risongna sikin Israel mihei kha mualinphoi an ta, Israel neh Efraim chu an siatnaah ilîr an ta, Juda mihei khom anmani neh ilîr sâng an ti.

⁶An bera lômhei neh an sial lômhei ilanin PUMAPA zongin fêng an ta; nikhomsela, ani chu mu no nih, ani khan anmani chu ai mâk tâk a nit.

⁷PUMAPA chungah iamom ino takkan an om a; an naihei chu a mihei ni khâi mak e. Khasikah khan atûn chu anmani neh an ram chu inrimang zel ni tâng a ti.

⁸“Gibea khuaah ridoina bekul tum unla, Ramah khuaah bekul tum rei; Beth-Avena ikhêk vung vung unla, ‘O Benjamin, nang an imôk rang tâk,’ ti rei.

⁹Efraim chu kuttum thona nî-ah khan inram nîng a ta, Israel chunga siatna tlung ngêt rang kha ki înpuang a nit.”

¹⁰PUMAPA khan, “Juda ruaituhei khan Israel khah an rûn a, a ram khah an irûk pêk sikin ki ning ai thik a nit. Khasikin, an chungah ki ning thikna chu tui angkan bun ki ti.

¹¹Israel chu sirdena tuangin a om a; ama san thei ino rang chanlamboi arzûl sikin a ram, ama dongtum pial khom a îchân tâk a nit.

¹²Israel chungah siatna ithlun ki ta, Juda mihei chungah khan ramna ithlun ki ti.

¹³“Israel khan a natna a mu a, Juda khan ama sabe a mu tenah khan Israel kha Asuria ziangah a fe a, rêng Jareba ziangah khan mi a tir a; nikhomsela, ani khan lei indam thei mak a, an sabehei khom lei indam thei mak.

¹⁴Israel mihei neh Juda mihei chu sakeibaknei angkan ibông ki ta. Keimah ngêiin sânphor ki ta; khanungchu, marak ki ti. Ki kâizamnâl nin chu sanisuatu tute om no nih.

¹⁵“An siatnahei an ririat a, ki mêl an zong mâkah chu ki mihei khah marak ki ti. An tuangna sikah khan an ne lai zong rang a nit.”