Read Biete HOSEA 7 Bible Online

HOSEA 7 - Biete bible

HOSEA 7

¹“Ki mi Israelhei indam a, vângsak inṭuma siam nôk ki tum ikipah an siatna neh an porinchena ringot kî mu a nit. An rilêm risak a, insungheiah an rirok a, an rirûk a, lampuiheiah mihei an îrok ngai a nit.

²An siatna murdi ki riat mai iti an lungrilin ngaitua mak a, an sualna khan a chîm tâk a, kî mu ṭian mai a nit,” a ti a.

³PUMAPA khan, “Mihei khan an milak phiarrûkah khan rêng neh milianhei kha an lêm a.

⁴An rêngkan inrê neh milak an nit a. Ibai isiamtûn â bai iurna ranga thing itua sa nang khâi loi rakka a lungthu a înlum ngai angkah hin thilsual itho an inuam tak tak a nit.

⁵Rêng ruaiṭhe nî-ah khan rêng neh milianhei kha uain an inrui buai ngai a. Rêng khom mualinphoi takkan a om ngai a.

⁶Mi an phiarrûk a, an lungril chu lungthu angkan a lum vung vung a. An ningthikna chu zân khovârin ar-ût a, zîngah chu meichok angkan a hong ichok suak ngai a nit.

⁷“An ningthik rikhêlin an roirêltuhei an that a. An rênghei chu khat khatkan an that inrimang ngai a; nikhomsela, tute zelin ṭangpuina zongin ne sam ngai mak e,” a ti a.

⁸PUMAPA khan, “Israelhei chu ibai suang min ino angkah an nit. An kôlvêla nam danghei chungah an ringat a.

⁹Ram dang mihei khan an râtna an ifâk zoi pêk a nit iti lak reh mak a. An sûnhei itep zoi diam a nit tâk a; khannisela, anni lakin reh mak e.

¹⁰Israel mihei risongna khan anmani demin â khêk suak a. Nikhomsela, hihei murdi khomah hin keimah PUMAPA an Pathian ziang tiang kîr nuam mak a, izong khom ne zong nuam mak e.

¹¹Israel chu ṭhuriang lungmôl, riatthiamna nei ino angkah a nit a; sanna zongin a kârah Aigupta â sam a, a kârah Asuria tiang a pan a.

¹²Nikhomsela, an fe lâiin an chungah ki lênhei zar ki ta, chungavuang iva angkan man ki ti. An siatna sikin anni chu kuttum kî tho rang a nit.

¹³“An chung ân khôk e! Ki ziang ata an rot a, ki chungah an rihel tâk a. Rimangna an chungah ai tlung rang a nit. Keiman chu anni saninzôk ki nuam a; nikhomsela, anni chu a pelêmin chubai an ne ûn a.

¹⁴An lungril takin ne koi mak a, an khum lâizôlah an ichiar ritlok pipai a nit. Bu neh uain ingeiin an inkhôm a, ki chungah lak an rihel natinsat mai a.

¹⁵Keiman chu ki donsui a, ken rât a; khanniseh, ki chungah thil ṭhano an iphan rûk ngai a nit.

¹⁶Nung an ne song a, chanlamboi pathian tiang mâi an ngat a. Hi mihei hih thalngul ikôi mangmunboi angkah an nit. An milianhei chu an ṭong risong sikin khandaiin ilîr an ta; Aigupta mihei nuizabûr nîng an ti.”