Read Biete HOSEA 8 Bible Online

HOSEA 8 - Biete bible

HOSEA 8

¹PUMAPA khan, “Ki mihei khan ki thuthlung an isiat a, ki dân an zôm no sikin mupui angkan irâlhei chu an hong e! Râlriningna bekul chu mût rei.

²Kin Pathian itia ne koiin, ni mihei kin nit, keini Israelhein chu nang kin iriat a nit ti khom sela,

³anni khan thil iṭha an inôl tâk a nit. Hi sikah hin an irâlhei khan ûm rizûl an ti.

⁴“Ki mihei khan an khâtin rêng an rithlang a, ki riat loiin ruaituhei an rithlang a. An rimangna rangin an tangkarua neh rângkachakin mirmil an siam a.

⁵Samari khopuia mihein sechal rilim chubai an iûn kha kî theimâk a nit. An chungah ki ning ai thik tak tak a nit. An mirmil Pathian kanna hi tik ten takin im an ipai rang tâk?

⁶Israel kutthiamhei mirmil siam kha pathian zel ni mak e. Samaria sechal rilim chubai an iûn ngai kha inrinôi chit la nîng a ti.

⁷Ithli an tu a, phâivosimpui ât an ti. Bu kung iding kha vui no nia, irâ khom isua no nih. Irâ sua ngân khom sela ram dang mihein fah zoi an ti.

⁸Israelhei chu nam danghein an chîm zoi tâk a, bekorok angkan an iom tâk a nit.

⁹Ram sakuartung tuklulilian angkan Israelhei chu anmani lampuiah an rot a. Ṭangpuina zongin Asuria ramah lâizâm an tho a, nam danghei chu anmani rung rangin sum an pêk a.

¹⁰Nikhomsela, anni chu ṭhui bûm ki ta, kuttum thông ki ti. Anni chu Asuria rêngin a sirde tenan chu dengtheina tuang tâng an ti.

¹¹“Israel mihei khan mâichâm an înding tam hih an sual pungna rang bang kêng ai nit. An rangin mâichâm rêng rêng chu sual sinna bang kêng ai nit.

¹²An ta rangin ki dân tep zoi loi ker ziak pêk a; nikhomsela, mi dang ta ranga ringaiin an nôl a.

¹³Ki ziangah ribôlna an lan a, ribôlna sa an fâk a. Nikhomsela, keimah, PUMAPA hin anni chu kî lôm ino a nit. Atûn chu an sualna reh mai ki ta, kuttum thông ki ta; Aigupta ramah kî tir nôk rang a nit.

¹⁴“Israelhei khan in roinpuihei an sin a; nikhomsela, anmani Siamtu kha an ringil a. Judahei khan khopuihei kha an siam a; nikhomsela, mei tir ki ta, an khopuihei neh an in roinpuihei chu kâng inrivâm a ti,” a ti a.