Read Biete JOELA 1 Bible Online

JOELA 1 - Biete bible

JOELA 1

¹Pethuela naipa Joela ziangah PUMAPA thu zuang itlung kha:

²Nangni itarhei o, amahih ringai unla, Hi rama om murdihei o, nin ikuar sung rei. Amahih nin zoro lâi neh nin puhei zoro lâi khomin a om tâk ngai im?

³Amakhah nin naihei iril unla, Nin naihei khan an naihei iril sela, An nai nôkhei khan rikhûk dang iril thiai riseh.

⁴Ikhâi intâmin chimu an fâk a, Lômkan an fâk bân khah lôm dangin an hong fâk nôk a, An lai zua te te khah lôm dangin an hong fâk infâi vang a.

⁵Zu du mihei har unla, ṭap ngûi ngûi rei, Uain idu mihei, irung vong vong rei. Uain iin rang nei khâi no tin u.

⁶Ikhâi lômin ei ram an hong tuam a, Irât tak an nit a, tep zoi loi an nit; An hâ chu sakeibaknei hâ angkah a nit a; Sakeibaknei iliantak hapui angkah a nit.

⁷Grep rui an isiat a, ki theipui kung an fâk inmûi a, Arkôl an fâk zoi a, â ṭanghei chu a châr zoi tâk.

⁸Nungâkin a vânglâi pasal hual ithi ai sûn angkan, Borapuan isilin ṭap ngûi ngûi rei.

⁹PUMAPA ina lan rang uainhei, thlâihei om khâi mak, PUMAPA sinthotu thiampuhei khom an bei a dong zoi tâk.

¹⁰Loi a siat zoi a, rinêng a châr vang a, bu a mûi zoi tâk, Grep kung khom a châr a, Oliv kung khom a thêm zoi tâk.

¹¹O nangni loi neituhei, ngaiinseh unla, O nangni grep rui enkoltuhei, ṭap rei; Loiah khan bu neh barli iât rang om khâi mak.

¹²Grep rui kha a thêm a, theipui kung kha arzual a, Theisen kunghei, itûm kunghei, appil kunghei, Loia thing murdihei khom kha an thêm tâk a; Miriamhei lômna kha a ṭuai zoi tâk.

¹³Nangni thiampuhei, borapuan sil unla ṭap rei; Nangni mâichâm sinthotuhei, ikhêk rak rak rei, Nangni ki Pathian sinthotuhei, O hong unla, borapuan isilin zântluanin zal rei, Nin Pathian zianga lan rang ibai neh uain om khâi mak.

¹⁴Bu ngei zoro serinrithiang unla, Inkhômpui ilian siam unla, PUMAPA nin Pathian inah khan, Itarhei neh hi rama om murdihei kha ṭhui bûm unla, PUMAPA kha isam rei.

¹⁵Ân khôk vang na! PUMAPA nikhua kha a nâi tâk a. Tinrêngthotheian rimangna a zuang îthlun rang a nit.

¹⁶Ei mitmuah ifarua om khâi mak a, A nit, ei Pathian inah lômna neh râifânna kha a boi zoi tâk.

¹⁷Rinêng châr sikin chihei kha hârbi nuaiheiah khan an mon zoi a, Buhei a châr zoi sikin panga thun rang om khâi mak a, Fasiarhei khom a ram tâk.

¹⁸Ramsahei neh ran rualhei lunginzîngin an irâm vung a, Loisûl iring ipet rang nei khâi mak a, A nit, bera lômhei khomin an ituang titak a nit.

¹⁹O PUMAPA nang ke sam; Mei khan ramchâr loisûl mun kha a kâng riai tâk a, Meichok khan ram thing murdi kha a kâng infâi riai tâk.

²⁰A nit, ramsahei khomin tui rihâlin nang an isam a, Vadungtehei kha a kang riai a, Mei khan loisûlhei kha a kâng infâi zoi tâk.