Read Biete JOELA 2 Bible Online

JOELA 2 - Biete bible

JOELA 2

¹Zionah khan bekul mût unla, Ke tlâng rithiangah khan râlriningna rangin mût rei; Hi ram sunga om murdihei kha inthing riseh. PUMAPA nikhua kha a nâi tâk a, a zuang tlung thiai tâk.

²Kha nikhua khah riliap dup a ta, sûm zîng a ta, khua rinîm a ti. Izîngin itlânghei a hong îbô ngai angkan, Ikhâi lôm sipai [1] itam tak, ritha nei tak kha hong rithok an ta, Itlânghei chu hong ibông an ti. Tiklâi khoma la tlung ngai ino, Hi nung khoma tlung nôk khâi ino rang kha hong tlung a ti.

³Ram ikâng angkan an maton kha an fâk thiai a, An ife khêl nung kha chu mei ikâng infâi angkah a nit a, An tlung maah khan chu ram kha Eden rikul angkah a nit a, An khêl nungin chu ramchâr ram iṭôl a nit a, îte izua nei mak.

⁴Sakor lôm angkah an nit, Ridoi sakor angkan irât takkan an itlân a.

⁵Ridoina tâli tlân irî angkan tlângsîpheiah an rikhêl irî sup sup a, Bupôl kâng ichok luai luai angkan neh, Ridoinaa mipui irât tak risiam diam angkah hi an nit.

⁶An matona mipuihei kha an rithla â vâi a, An mêlhei kha a hong mûk zap a.

⁷Mi rât tak angkan an itlân a; ridoi mi angkan kul bangah an lui a, Mahni ridîn chitah itlûn thalkan an fe a, tute â pêt â fuan omak.

⁸Rineng ripol loiin mahni ridînah an fe chit a, Îten an lampui idan thei mak e.

⁹Khopui sungah an richôm a; Kulpui chungah an itlân a; insunghei an lût a, Inru angkan tukverheiah an lût a.

¹⁰An fena kipah rinêng â nîng a, rivân khom â nîng a, Inî neh ithla kha a zîng a, ârsihein an vâr an thup a.

¹¹PUMAPA khan a sipai lômhei thu a pêk a, A thu zômtuhei chu tep zoi loi, ritha nei tak an nit. PUMAPA nikhua kha a roinpui a, inrît tak a nit, Tûm â tuang thei rang?

¹²PUMAPA khan, “Khangkah dôran khom atûnah hin, Nin lungril murdin rilet unla, Bu ngeiin, iṭapin, ngaiinsian, ki tiang hong ngat rei.

¹³Nin puan ni loiin nin lungril thlêr rei,” a ti. PUMAPA nin Pathian tiang ngat rei; Ani chu mi lunginkham thei tak neh khorngainaa sip a nit a, Lungrivuai neh lungkhamliannaa sip, thil ṭhano thlun nuam ngai ino a nit.

¹⁴PUMAPA nin Pathian khan lung nangni inkham nôk a ta, Nin tiang ngat nôk a ta, ilan rang ibai neh uain, Nin nei theina rangin ṭhat nangni vur no nih iti tûm â ria?

¹⁵Ziona khan bekul tum unla, Bu ngei zoro serinrithiang unla, inkhômpui ilian tak siam rei.

¹⁶Mipui bûm unla, ân khômhei kha thâr inrithiang rei. Itarhei koi bûm unla, naipanghei, rinunêk lâihei bûm unla, Moineitu kha a chontana rithokin hong suak sela, Imoi khom a chontan sungril ata hong suak riseh.

¹⁷PUMAPA sinthotu thiampuhei kha, Tempil thapuk neh mâichâm kârah khan ṭap sela, “O PUMAPA, ni mihei hi lunginkham inla, Ni dongtumhei hi nam danghei, Nuizabûr neh phengsan rangin phal no roh. Ithôm kha mihei khan, An Pathian kha taktiang im ai om tâk an iti rang?” ti riseh.

¹⁸Khanungchu, PUMAPA khan a ram kha a ngaisak a, A mihei khom lung ân kham tâk a.

¹⁹PUMAPA khan a mihei ziangah, “Ringai rei, nin ziangah bu hei, uain hei, riak hei zuang ithlun ki ta, amakhan khop nin ti; Nam danghei lâiah khan sîrinsian nangni in-om tlak khâi no ning e.

²⁰Nikhomsela, mar tianga rithoka nangni hong idoi rang lômhei kha, Ilah takah inrimang vang ki ta, Ram ichâr neh inṭênah infêng ki ti. A masa pôl chu sak tiang tuipuiah, A nung ita pôl kha thlang tiang tuikhanglianah. An ruak ithu hong inam vung vung a ta, Natinsat takka thil an isiat sikin anni khom isehchit ki ti,” a ti a.

²¹O leilung, ṭi non la, râifânin lôm roh, PUMAPA khan thil roinpui takhei a tho tâk a.

²²Ramsahei, ṭi no rei; ramchâr chu loisûlin a hong sip nôk tâk, Thinghei khom a hong irâ a, Theipui kunghei neh grep ruihei kha a hong irâ nôk tâk.

²³Nangni Zion naihei o, lôm rei, PUMAPA nin Pathianah khan lôm rei, Rua masa kha inrup bang kan nangni a pêk a, Matona angkan nin rang rua nungkhôn khom ân sûr a.

²⁴Rîzôl kha bun sip a ta, Sômkhurhei khom uain neh riakhein sip liam a ti.

²⁵Ikhâi lômhein an fâk isiat riai kumhei nêka kum iṭha kumhei in-om nôk ki ti. Ikhâi intâm, a lôm lôma hong dûl dûlhei kha, Ki sipai lôm, nin zianga ki hong itir kêng an init.

²⁶Fâknêk itam takkah nei nin ta, khop nin ti, Khanchu, nin lâia thil rikhêl tak tak ithotu, PUMAPA nin Pathian chu chôiinrisâng nin ta, Ki mihei kha mualinphoiin om tlak khâi no nih.

²⁷Khante, Israelhei lâiah ki om a, PUMAPA nin Pathian ki nit a, Pathian dang zel omak iti riang nin ti; Ki mihei chu mualinphoi tlak khâi no tin u.

²⁸“Khatikah khan chu hingka hin hong ni tâng a ta, Mi murdi chungah ker thla vur ki ta, Khanchu, nin naipahei, nin nainuhein ki thu ril an ta, Nin itarhein rimangah phan an ta, Nin vânglâihein inlârnahei mûng an ti.

²⁹Khatikin chu ke sompahei, ke somnuhei chungah khom ker thla vur ki ti.

³⁰Rinêngah neh rivânah risinsiana thil rikhêlhei inlang ki ta, Thisenhei, meihei, meikhûhei om a ti.

³¹Inî hong zîng a ta, ithla khom thisen angkan hong sen a ti; PUMAPA nikhua roinpui tak neh inrît tak kha a zuang tlung maah khan.

³²Tukhom PUMAPA riming rilamhei ka chu inzôk nîng an ta, Zion tlângah neh Jerusalema om mi ṭhenkah chu zôk an ta, Ki mi rithlanghei chu zôk an ti,” PUMAPAN ai ti angkah khan.